Улихьнаси Мягьячгъалайиъ, «Дуствалин хуларин» Урусатдин халкьарин выставкйир гъахру залиъ гъяйтагъдин кабчбан сяняаьткарвалин выставка кIули гъубшну. Му серенжем Урусатдин халкьарин медениятдин ирс уьбхбан йисаз ва Гъяйтагъдин уцмийствойин 1500 йис тамам хьпаз бахш дапIнайи.
Выставка «Гъяйтагъдин шубар» ансамблин иштиракчйири ачмиш гъапIнийи. Милли палат али шубар, багъри Гъяйтагъдикан вуйи мяъли апIури ва хиларигъ чпин ватандин багъариан вуйи йимишар айи мугарра ади, уч духьнайидарин улихьна удучIвнийи. Гьарури улупурайи милли палат сюгьрин мяна айи, харжибдихьан уьрхру кюгьне накьишариинди кабчнайи. Успагьи дагълу дишагьлийирин кIул’ин жюрбежюр рангарин накьишарихъди дабалгнайи ягълухъар алийи.
Гъяйтагъ райондин кIулиъ айи Амир Темирбулатовди серенжемдиъ удучIвну улхури, къайд гъапIганси, гъяйтагъдин кабчбан сяняаьткарвал халкьдин яратмишарин гавагьир ву.
«Ич успагьи карчнайи чарчар неинки яратмиш’валин рякъюъ айидариз, хъа гьацира аьдати агьалйиризра маракьлу ву. Дурар вари йишвариъ аьгъю шулу ва вари дюн’яйиз машгьур духьна. Къайд апIуз ккундузузки, Гъяйтагъдин меденият саб гьаму кабчувалиин дийибгънадар, думу жюрбежюруб ву, ва дидиз ич халкьдин аьдатарихъди, намуснан, ужувлан ва ватанпересвалин рюгьлувалихъди аьлакьа айи кюгьне тарихра а. Гьелбетда, думу насларихьан насларихьна рубкьури, гирами гьякалси уьбхюрира а», – гъапну Темирбулатовди. Дугъу мяракайиз уч духьнайидариз гьаму йисан сентябрин вазлиъ къайд апIру Гъяйтагъдин уцмийствойин 1500 йис хьпан юбилейдин серенжемдизра теклиф гъапIну.
Выставкайин дахилнаъди «Гъяйтагъ» кIуру аьдати культурайин центрин директор Зубайдат Гьясановайин ва РАН-дин ДФИЦ-дин илимдин гъуллугъчи Фатима Гьяжаловайин гъяйтагъдин кабчувалин сяняаьткарвализ бахш дапIнайи «Эвелиан гележегдиз» кIуру сатIланди вуйи китабдин ва Амир Темирбулатовдин «Гъяйтагъарин уцмийство» кIуру цIийи китабдин презентация гъабхьну.
«Китабдиин ляхин апIурайи вахтна учу архивдин гизаф материалар ахтармиш гъапIунча. Дурариз асас вуди, Гъяйтагъдин уцмийствойин вахтари гъяйтагъдин карчнайи накьишариз харжибдихьан уьрхбан сюгьрин кьувват а кIури, уцмйири аьхю фикир туври гъахьну. Дурар жара ханарин шубарихъди эвленмиш шлуган, аьлакьйир дюз алаъбан бадали, швушван базарлугъдиъ кабчнайи чарч ади хьувал чарасуз вуди гъабхьну. Дадйири шубариз хушбахтлу, берекетлу ва мюгькам хизан хьпан чпин кIван ниятар хусуси накьишариинди чарчарик атIагуйи. Дурар хъасин хизандин берекетси сундхариъ уьрхюри ва насларихьан насларихьна рукьури гъахьну», – ктибтну Зубайдат Гьясановайи.
Хъа «Гъяйтагъарин уцмийство» китабдиъ гьюкумат арайиз гъафи эвелин йисарихъан хъюгъну, гьюкумдрарин ва аьдати халкьдин уьмрикан, гьюкуматдин къанунарикан, гъяйтагъари харижи уьлкйирин чапхунчйирихъди гъуху женгарикан ктибтура. Дидиъ гьякьлу дюшюшариин асасламиш духьнайи гьядисйир атIагна ва думу уцмийствойин юбилейиз бахш вуди адабгъуб ву.
Серенжемдиъ гьацира филологияйин илмарин доктор Узлипат Гьясанова, РАН-дин ДФИЦ-дин илмин гъуллугъчи Фатима Гьяжалова, жямяаьтлугъ вакилар удучIвну гъулхнийи.
Аьхириъ Дагъустандин лайикьлу артистари Зубайдат Гьясановайин шиърариз мяълийир гъапIнийи.
