Аьхиримжи йисари Милли проект «Образование» ихь республикайиъ хъуркьувалар ва ужудар натижйир арайиз хури, уьмрин гьяятназ кечирмиш апIура. Дидин дахилнаъди гъубшу йисан вари Урусатдин ккергъбан мектебариъ урхурайи баяр-шубариз пулсузди мани хураг тувувал тямин гъапIну. Думу хураг уьлкейин ккергъбан классариз гъягъюрайи 7 миллиондихьна бицIидари гъадабгъури гъахьну.
Шагьрариъ «Кванториум» кIуру бицIидарин технопаркар арццбан проектдин артмиш’вал гъябгъюрайи йисанра давам хьибди. Дагъустандиъ дициб технопарк 2018-пи йисан Илмарин бицIи академияйин бинайиин абццнийи, хъа 2020-пи йисан дидин бинайиин мобильный технопарк ачмиш гъапIну.
2021-пи йисан «Кванториум» паркар арццбан къайда гьюдюхну, гьамус технопаркар мектебарин бинайиин арццра, ачмиш апIура ва дурар образованиейин илимдинна технологияйин циркларин программйир уьмрин гьяятназ кечермиш апIбаъ иштирак шула.
Ихь республикайиъ «Кванториум» технопарк Мягьячгъала шагьрин 61-пи нумрайин мектебдин бинайиин абццну. Мидланра гъайри, пулсузди аьлава образование цифровой артмиш’валин «IT-куб» центрариъ гъадабгъуз шулу. Дагъустандиъ цифровой образование-йин центрар шубуб а. Дурар Илмарин бицIи академияйиъ, Каспийск шагьрин 11-пи нумрайин гимназияйиъ ва Буйнагъск шагьриъ Советарин Союздин Игит А. Хуторянскийдин ччвурнахъ хъайи гимназияйиъ арццна. 2022-пи йисан республикайиъ кьюбсана «IT-куб» центр арццуз планламиш дапIна.
Къайд дапIнайи милли проектдин дахилнаъди кIулиз адабгъурайи «Точки роста» программайира дагълу гъулариъ айи баяр-шубаризра деврин технологйирин мумкинвалар улупуз ва чпин бажаранвал ачмиш апIуз кюмек тувра.
Республикайин 39 муниципалитетдин дагълу гъуларин ва 2 бицIи шагьрарин мектебариъ 171 деврин образованиейин «Точки роста» центр арццра. Думу центрар асас ва аьлава образованиейин цIийиди алау программйириинди лихура.
Къайд дапIну ккундуки, дагъустандин мектебариъ 6-11-пи классариъ урхурайи 25 агъзуртIан артухъ ученикар улихь ккамиди пишекарвалин тестирование гъабхру «Гележегдиз билет» федералин проектдиъ иштирак шула. Думу серенжемарра «Образование» милли проектдин дахилнаъди гъахурайидар ву. «Гележегдиз билет» платформа кьюб жюрейин ву — мектебдин ва уьмуми дережайин.
Урхбаъ, спортдиъ, яратмишарин ва жара цирклариъ бажаранвал кайи бицIидар агуз зигьимлу бицIидарин «Сириус» кIуру образованиейин центри ва дидин бинайиин ачмиш дапIнайи региондин центрари кюмек тувра.
Милли проект «Образование» гьеле гьяракатнаъ убчIври ами. Дидин ляхнин натижйирихъди учву гележегдиъра таниш апIидича. Хъа гьамус, ихь районариъ думу проектдин артмиш’вал фициб вуш ахтармиш апIурхьа.
Табасаран райондин образованиейин управлениейин кIули айи Аьбдусалам Гьясановдин гафариинди, райондиъ милли проект «Образование» уьмриз кечирмиш апIури, гъийин йигъаз жюрбежюр гъуларин мектебариъ 33 «Точка роста» центрар арццна. Мидланра гъайри, ккебгърайи урхбан йисан дицисдар центрар райондиъ 10-сана арццбанди ву.
Хив райондин образованиейин отделин начальникдин заместитель Азадин Юсуфовди учуз туву мялуматариинди, гъи-закур Ургъа ва Сюгют гъулариъ «Точка роста» центрар арццру. Дурарра кади райондиъ уьмуми гьисабариинди 11 центр гьяракатнаъ хьиди.
Хив райондиъ 29 мектеб а. Дурарикан 18 кьяландар, 6 тамам дару кьялан ва имбудар ккергъбан мектебар ву. Гьадму вари мектебарин 1-4-пи классариъ урхурайи баяр-шубариз саб чIеве мани хураг тувра.
