Игитар кIваълан гьархидархьа!
Газатдин машариъ «Игитар кIваълан гьархидархьа» рубрикайиъ Урусатдин яракьлу кьувватарин дахилнаъди Украинайиъ гъябгъюрайи хусуси метлеб айи дявдин операцияйиъ игитариси чпин гъуллугънан буржи тамам апIурайи ихь баярикан ктибтувал давам апIурача.
Къазанфер Сулейманович Сулейманов 1987-пи йисан Табасаран райондин Жвулли гъулаъ Сулейман ва Зейнабат Сулеймановарин хизандиъ бабкан гъахьнийи. Жвул’арин уьмуми образованиейин кьялан мектеб ккудубкIбан кьяляхъ думу жюрбежюр тикилишчивалин ляхнарихъ гъахьну. Кьюд йисан Петропавловск-Камчатский шагьриъ гъилихну.
2009-пи йисан Казанфер Сулейманов РФ-дин Яракьлу кьувватарин жергйириъ гъуллугъ апIури гъахьну. 2013-пи йисан думу Тихий океандин флотдин инженервалин подразделенйириъ дявдин гъуллугъназ кьабул гъапIнийи. 2015-пи йисан Курилариин али Матуа кIуру островдиин Урусатдин оборонайин министерствойин Урусатдин географияйин обществойи (РГО) гъубху экспедицияйин ляхниъ иштирак гъахьнийи. Къазанфер Сулеймановди чаин али гъуллугънан вазифйир намуслувалиинди тамам апIури гъахьну. Туву табшуругъ жавабдарвалиинди кIулиз адабгъру матросдикан командование гьаммишан рази вуйи.
Урусатдин Президентди Украинайиъ хусуси метлеб айи операция мялум апIбан кьяляхъ контрактдин бинайиинди гъуллугъ апIурайи матрос Къазанфер Сулейманов БТГР-йин дахилнаъди Украинайиз командировкайиз гьаънийи. 17-пи мартдиъ думу Украинайиз гъафну. Гьарганси гьамусра, командованиейи чан улихь диву месэлйир дугъу, жарарихьан саб тягьнара кипуз даршлуганси, тамам апIурайи.
Июлин 7-пи йигъан матрос Сулеймановди хъапIрайи «КамАЗ» Польшайиъ гьязур гъапIу минайиин гъутIубкIну. Зийнар духьнайи жигьил дявдин авиацияйин кюмекниинди ЛНР-дин Луганск шагьриз, хъасин Ростовдиз, цIибси рягьят шулайиб гъябкъиган, Москвайиъ Вишневскийдин ччвурнахъ хъайи институтдиз гъухнийи. Эскрин ликариз духьнайи зийнар лап гъагъидар вуйи. 6-пи августди, матрос Къазанфер Сулейманов амриз дарфиди гъакIну. Дугъан хулаъ жигьил хпир ва кьюр бицIи риш гъузну.
КIваина хуз ккундузуз, Къазанфер Сулеймановдикан «Табасарандин нурар» газатдиъ 2020-пи йисан августдин вазлин 32-пи нумрайиъра гъибикIнийча. Думуган отпускдиз багъри гъулаз дуфнайи бали, гизаф йисари марцц дарапIди гъубзнайи гъулан кIанакк ккайи рукьан ягъли гъяд кьуршарихьан марцц дапIну, гъядун мягьрижариз шир гъивнийи. Дугъу гъуландариз учв гьаммишандиз кIваинди гъитру ляхин гъапIнийи.
– Дальний Восток, табиаьтдин гьавйириз гъилигиган, инсанариз яшамиш хьуз думукьан рягьят йишв дар. Гьаци вушра, узура, гъардашра, контрактдин бинайиинди гъуллугъ апIури, яшамиш шулайча. Багъри гъулхьан, жву- ван майил-мадатдихьан гизаф ярхлаъ ашра, кьюр гъардаш сатIиди айивали учу сар-сариз лапра багахь апIурайи. Ерли агьалйирихъдира ужуб аьлакьа айич. Абйир-бабари учуз ужуб тербия тувну. Дюн’яйин фунуб пIипIнаъ ашра, инсанвал мудубганай, жан баяр, кIури шуйи ич дадайи. Къазанферин дерд йиз кIваан затра адрабгъур. Дугъан 35 йистIан дайи… Аьхиримжи йисари учу азад вахтра гьаммишан сатIиди адапIури шуйча. Дявдин гъуллугъчйирин ляхин гьамциб ву. Жвуван ихтияр жвуван хилиъ адар, уву къул гъизигу контрактдиъ вари яв мажбурнамйир ачухъди улупна, – ктибтура Къазанфердин чве Небиюллагь Сулеймановди.
Къазанфер Сулейманов хизандиъ 5-пи, варитIан бицIину велед вуйи. Дугъаз шубур гъардаш ва сар чи айи. Дада Зейнабат чан аьхюну балин хизандихъди гъулаъ яшамиш шула.
– Гъи узухьан фу пуз шулухъа? Дявдин гъуллугъ кадабгъну, ярхла йишвариз ляхин апIуз гъягъруган, узу баяр Аллагьдиина аманат гъапIунза. Дюн’яйин аьгьвалат гьамкьан читин шлуб шлиз аьгъяйихъа?! Украинайиъ хусуси метлеб айи операцияйиъ, гьаму дявдин гъагъи женгариъ узу балихъ мягьрум гъахьнушра, уьлкейин кIулиъ айирин ляхин сабанра тянкьид гъапIур дарза. Къазанфер йиз бицIину бай вуйиз. Учв хасиятнан гизаф ужур, чаллан тина саризра гиран ктрапIрур, аьхюдарин гьюрмат-хатир уьбхюз аьгъюр вуйи. Бай гьар йисан саб ражари отпускдиз гъюри шуйи. Гъулаз гъафиганра вари багахьлуйирилан илтIикIну, гьаруриз чахьан удукьру кюмек апIуз мумкинвал абгуйи. Узуз дерд дарибшри дупну, дугъу учв наана гьаънаш, фуну ляхнихъ хъаш, кIурира шулдайи. Бализ гъагъи зиян гъабхьнийи… Думу, кьюбиб ликар ккадаршра, чIивиди гъузнийиш ккундийзуз, чан хизандин кIулиъди, бицIи шубар фици аьхю шулаш рябкъюри… Къазанферин уьмур бадали духтрари чпихьан шлу зегьмет гъизигну, амма Аллагьдин кьадар гьамциб гъабхьну, – кIура Зейнабат бажийи. Думу, жигьил уьмрихъ мягьрум гъахьи чан балихъ, жигьилди имиди ачIни гъахьи чан швушвахъ, йитим гъахьи чан худул шубарихъ ишура.
Узу гьаму макьала бикIуз хъюгъруган, Урусатди Украинайиъ хусуси мет- леб айи дявдин операция ккебгъну 173-пи йигъ гъяб- гъюрайи. Дявдин женгар давам шули ими, дявдин опера- цияйин аьхир гьеле рябкъюрадар. Аьхиримжи йигъари Украинайин артиллерияйи Европайиъ чIатхударикан саб вуйи Запорожский АЭС-диз, гьадму гьисабнаъди ишлетмиш дапIну гъубзу ядерный убгруб айи йишваз йивбар апIура. Мялуматарин дакьатари туврайи хабрариинди, Киев Запорожьейин атомный станция дагъитмиш апIуз гьязур шула. КIваъ сагъ апIуз даршлу дердер айи дадйиризра, жилар дявдиъ айи дишагьлийиризра сабур тув, Сар Аллагь. Дяви ккудубкIну, ихь жигьилар вари сагъ-саламатди чпин хи- занариз кьяляхъ гъюри!
