2022-пи йисан сабпи 6 вазлин арайиъ Урусатдин Дагъустан Республикайиъ айи УФАС-ди, чав гюзчивал гъабхурайи вари цирклариъ, къанун чIур апIбаз лигну, юридический ва физический касариин 30 миллион манатдин журумар илитIну. ВаритIан гизаф журумар (25 миллион манат) антимонопольный къанун чIур апIувализ лигну гъапIдар ву. Гьюкуматдин закупкйирин цирклиъ гъалатIар деетдариин 5 миллион манатдин журумар илитIнийи.
Гьаму мялуматарихъди республикайин СМИ-йин журналистар Урусатдин Дагъустан Республикайиъ айи УФАС-дин кIул Каир Бабаевди, чпин идарайин гьацI йисандин ляхнин натижйириз бахш дапIнайи пресс-конференцияйиъ таниш гъапIнийи. Гюзчивал гъабхру идарайин кIулиъ айирин гафариинди, улупнайи вахтна юридический ва физический касарихьан антимонопольный къанун чIур апIбан гьякьнаан 92 аьрза гъафну. Думу аьрзйир гьял апIури, антимонопольный къанун чIур апIбан лишнар кади 12 дело гъитIирккну.
Цци 6 вазлин арайиъ Дагъустандин УФАС-ди жюрбежюр дережайин закупкйирин гьякьнаан гъафи 577 аьрзара гьял гъапIну, гьадрарикан 238 аьрза дугъридар вуди, 216 – закупка къанун чIур гъапIдарси гьисаб гъапIну. УФАС-дин гъуллугъчйири 162 касдиз ляхниъ деетнайи гъалатIар дюз апIуз мумкинвал тувну, 388 административный дело гъитIирккну, журумар илитIбан гьякьнаан 360 къарарар адагъну ва журумар илитIдарихьди 4 миллион манатдин журумар тувуз гъитну. Уьмуми гьисабариинди, административ жавабдарвалихъна гъуллугънаъ айи 297 кас, юридический 10 кас ва 287 ватандаш гъахнийи. Вари 446 дело гъитIирккну
