Ццийин йисан Дагъустандиъ мектебар ккудукIу 31 бай-шуру ЕГЭ-йиан 100 балл гъазанмиш гъапIну. Дурариз республикайин Глава Сергей Меликовди 100 агъзур манатдин сертификатар тувну. Му премия 2021-пи йисан тасдикь гъапIуб ву.
Урхбахьна заан удукьувалар айи республикайин баяр-шубарин арайиъ ихь ришра а. Табасаран райондин ТIюрягъ гъул’ан вуйи, Мягьячгъала шагьриъ бабкан ва аьхю гъахьи Амина Мукаиловайи урус чIалнаан ЕГЭ 100 баллиз гъибикIну. Дугъу Мягьячгъала шагьрин 39-пи нумрайин лицейиъ урхури гъахьну ва, лицей гъизилин медализ ккудубкIну, бажаранлу риш уьру аттестатдин сагьиб гъахьну.
Улихьнаси Амина газатдин редакцияйиз хялиш гъахьну ва учуз учв му заан хъуркьувалихьна гъахи рякъкан ктибтну.
– Дюз гъапиш, ЕГЭ-йихьна гьязур шлуган, химияйианна биологияйиан репетиторихьна илтIикIнушра, урус чIалнаан репетиторин кюмек лазим гъабхьундарзуз. Му йиз сарпи мялимдин ва хъасин урус чIалнан дарс киври гъахьи ич мялим ПатIимат Мягьямедовнайи хъуркьувалсира гьисаб апIураза, гьаз гъапиш дурар чпин ляхнихьна лап жавабдарвалиинди янашмиш шлудар вуйи. Йизра бицIидихъанмина дарсарихьна аьхю аьшкь айиз, вари хьубариз урхури, узу йиз улихь диву метлебнахъ хъуркьуз зегьмет зигури гъахьунза.
– Дагъустандин Главайихъди гъабхьи ичв гюрюшдикан фицдар хиялар гъузнияв?
– Сергей Алимовичди ич зегьметназ мициб кьимат тувувал лап хушлу вучуз. Гюрюшдиъ дугъахъди жюрбежюр темйириан улхбар гъапIунча, гьадму гьисабнаан республикайиъ туризм артмиш хьпан гьякьнаанра. Узукси, имбу жигьиларикра республикайин кIулиъ айирин мициб янашмиш’вали урхбахьна хъана артухъди рюгь капIруб аьгъязуз.
– Амина, яв фикриан ЕГЭ-йи мектеб ккудубкIурайи жигьилариз хайир туврайин, дарш – зарар?
– ЕГЭ-йи артухъди мумкинвалар ачмиш апIура кIури, фикир вуйиз. Ав, гьелбетда, экзамендин улихь ва думу гъябгъюрайи вахтна гизаф гъалабулугъ’вал шулу, гьаз гъапиш дидин натижайилан гележегдин планар асиллу вуйибдин вари гъавриъ а, ва, мялум вуйиси, чпин гъалаб ккабгъуз даршлударрра шулу. Вушра диди коррупцияйиз мумкинвал гъибтрадар ва удукьувалар айи баяр-шубариз уьлкейин вузарик кучIвуз рякъяр ачмиш апIура.
Къайд: Амина гъулан мяишатдин илмарин доктор, профессор, Дагъустандин аграрный госуниверситетдин сарпи проректор Мукаил Мукаиловдин риш ву. Гьелбетда, мицдар бажаранлу касарин веледарра чпин абйирбабариз ухшар вуйидар шулу.
Мукаил Жабраиловичра шурахъди редакцияйиз хялижв гъахьнийи. Мициб мумкинвал ккубкьну имиди, дугъазра сакьюдар суалар тувнийча.
– Мукаил Жабраилович, жвуван бицIирин хъуркьувал фуну абайизна-бабаз чан хусуси хъуркьувалтIан зади шулу. Шуран урхбахьна мициб гьевес хьувал, гьелбетда, учву туву тербияйин натижа ву. Хизандиъ му месэлайихьна фициб янашмиш’вал вуйичв?
– Заан кьиматариз урхувал тIалаб апIури, бицIидариз илзигувал ич хизандиъ айиб дар. БицIидихъанмина гьаруриз чан вазифйир аьгъя ва дарсар ужуди урхура кIури, хулан ляхнарихьанра дурар азад дапIнадар. Гюзчивал, гьелбетда, дубхьну ккунду. Дарсарихьна бицIирин чан иштагь адарш, гужниинди думу капIуз шлуб дар. Амма абйир-бабар мектебдихьан ярхла духьну ккундар, дина кми-кмиди гъягъюри, соб-ранйириъ иштирак хьуб чарасуз лазим ву, гьаз гъапиш абйир-бабарин жавабдарвал бицIидари чпира гьисс апIуру.
– Сюгьбатназ чухсагъул.
Амина магьа Дагъустандин медицинайин госуниверситетдин стоматологияйин факультетдин 1-пи курснан студентра гъахьну. Дугъаз вуздиъра заан хъуркьувалар гъазанмиш апIури, кадабгънайи пишейиъ ужурсир хьуб ккун апIурхьа.
