Гьаму гьяфтайиъ Хив райондин ЦРБ-йиз ерли агьалйирин сагъламвал мюгькам апIбан ва дурарин уьзрарин улихьишв бисбан метлеб ади, СанктПетербургдиан духтрарин бригада гъафнийи.

Уьлкейин Кафари меркездиан духтрар гъюрайиваликан райондин агьалйир йигъар ккимиди ерли телевидениейиан, WhatsApp-диан ва чан хусуси Telegram каналиан райондин ЦРБ-йин кIулин духтир Индира Багъичевайи хабардар гъапIнийи.

16-пи августдилан 18-пи августдиина гъяйиз иццрушнан лишнар кайи агьалйир невролог Камалудин Аьлиевди, хирург, онколог, флеболог Казбек Къазимагомедовди, травматолог, хирург, уролог, УЗИ-йин диагностикайин пишекар Анисджон Турсуновди кьабул апIури гъахьнийи. Десте-дестеди чпихьна илтIикIурайи агьалйирикан бизар ва аьсси дарди, дурари шубуд йигъандин арайиъ уьзрари ккагънайи райондин агьалйирин дердериз дарман апIури, сагъламвал уьбхбан ва мюгькам апIбан бадали дурариз мянфяаьтлу насигьятар туври, пулсузди вуйи консультацйирра гъухнийи.

Дидлан савайи, Урусатдиан дуфнайи пишекрари, агьалйирикан, лазим гъабхьиш, чпихьна илтIикIуб ккун гъапIнийи ва дурарихьна чпин адресар тувнийи.

«Гъи ихь арайиъ тарабгънайи гъагъи уьзриз дилигди, инсанарин сагъламвалин гъайгъушнаъ ади ва дидин мюгькам тереф уьбхюри, учву алдагъу ликариз, ичв иццурайрихьна вуйи мани янашмиш’вализ, дурариз гъапIу гъюдли гафариз, учву гъуху консультацйириз ва, учу дих гъапIиган, гьамци бакар шулайивализ райондин администрацияйин, больницайин коллективдин ва агьалйирин терефнаан кIвантIан чухсагъул мялум апIураза», – гъапнийи Индира Багъичевайи Санкт-Петербургдиан дуфнайи духтрариз