Гьаму йигъари Хив райондин «Расиъ» дерейиъ ерлешмиш дубхьнайи ич хутIлиъ айи гъуршин, цIа кипну, гъубгнич (шиклиъ). Гъуршин, гъваин хьуцIурихьнакьан сагъу шифрар алди, хъа гъирагъбужагъдилан тикйир-кIусар курсри, ккабалгнайиб вуйи. ХутIил чавра кIан’ан-кIулиз гьадабтIну, ижми дапIнайи.

 

 

Гъуршин чIатар-чIурариъ айидари, мал-къарайихъ хъай- идари, рягьятвал гъадабгъру, ушв гьибтру далдикк йишвси ишлетмиш апIурайи. Хъа варитIан гьяйиф шлуб гьадму вуки, кьюб ражари дубшвну, уч дапIну, ккадабгънайи люцерна укI гъуршникк саламат дапIнайча. Кипариан гьисаб гъапIиш, душвакк имид-амдар варж кипрахьна гъебццу люцерна ккайи. Хъа дидихъ фициб зегьмет ва жафа зигураш, думу швнубан хиларигъян апIураш, варидиз мялум вухьуз.

Ухьухь айту а: «Дажи убччвуз даршиган, палан гъубччвну». КIуруб, кайиб аш, машнаъ пуз даршлу агъдабни учуз гьамциб хаинкар ляхин гъапIну. Узу жара касдиин хаин гъахьир, дугъаз а, узуз гьаз адар кIуру хиялкьан кIваан гъябгърур дарза ва хасиятнан гьаму лишан йиз уьмрин варитIан аьхю бахт вуйибра гьисаб апIураза. Гъулажвуваз рубдин зарар тувайиз, йикIуб ктабгъурза. Жара касдин гьялал зегьметниин хаин вуди, дид’ин хил иливуз ккунди, гъулажвуваз муртайин зарар тувуз кьаст айи касдин, жвуван унтIаъ айи ул вушра кIарза, яракар дарибшри чаз. Гъит диван Аллагьди апIри чан!