«Инсан» кIуру рягьимлувалин фонднан филиал Хив райондиъ ачмиш дапIну 10 йистIан артухъ ву. КIул’инди чпин хусуси ляхин гъабхувалихъди сабси, фонднан вакилар райондиъ гъахурайи вари жямяаьтлугъ серенжемариъра жанлуди иштирак шула.

 

Гьамусяаьт Хив райондиъ «Инсан» фондну 1-пи сентябрин гъаншариъди «Мектебдиз велед гьязур апIин» кIуру акция кIулиъ гъабхура. Дидин гьякьнаан райондин имамарин советдин председатель Шябан Салигьовди учуз мялуматар тувнийи.

«Акцияйин метлеб – хилиз кьюб кепек хру ляхинкар хътру абйир-бабар агури, дурарин веледариз, ва гъирагъдилан саб артухъ кюмек адру, аба ясана баб хътру бицIидариз кюмек тувуб ву. Сач Хив райондиъ 50-тIан зиина мицисдар бицIидариз мектебдиз лазим вуйи алатарин кюмек тувунхьа. Ав, акцияйиъ иштирак хьуз саризра, илзигури, миннат апIурайи йишв адарихь. УвутIан артухъ гьатгъу пул хътапIну, кюмек тувну кIури, талитнаъра адархьа. Хъа анжагъ кюмек апIуз юкIв вуйирихьна, дарвал кайириз хил гьачIабккуз кьувват айирихьна илтIикIури, мюгьтаж айидарин шикилра, адресарра туврахьа. Гъит игьтияж айидариз кюмек тувдарин гьарсаб кепек Аллагьди кьабул апIри, дурар чпи ва чпин кюлфетар кIваин алдру балайихьан уьрхри.

Ухьузра гьарсариз ихь веледар бадали ликар алдагъуз кьувват туври.

Хъа ихь жигьил наслин гъюзимбу уьмур акуб ва нурлуб ибшри. Улубкьурайи урхбан йисра дурариз мектебдин кьасйирихъ зигьимлуди ва хайирлуди гъябгъруб ибшри!» – ккун гъапIнийи имамди