Ягълухъар, шалар, шарфар, чухтйир ва хъана жарадар – мурар вари дишагьлийин кулихъ хъахьрудар ву. Кюгьне вахтарихъанмина Дагъустандиъ гьар миллетдин дишагьлийирин алабхьру палатдин арайиъ ягълухъиз лайикьлу йишв жара дапIнайи. Дишагьлийин ягълухъар пекдиндар, шифондиндар, хьайиндар, бамбгиндар, кишра кайидар, кюкю алидар, саб рангнандар, саб гафниинди ккуни жюрйириндар шулу.

 

 

Ягълухъ хъабхьбан метлеб (аьдат гьисабназ гъадабгъурадархьа) аьхюб ву: ягълухъи дишагьлийин кушар, кIул биширугдихьан, ригъдихьан, аьхълушнахьан уьрхюру. Дагъустандиъ сабсан ужуб аьдат ади гъабхьну: кичIихнайи жиларин арайизди дишагьлийи чан ягълухъ гатIабхьиш, дурар жара шули гъахьну. Гьаддиз ягълухъ ислягьвалин лишанси гьисаб апIуру.

Сентябрин 27-пи йигъан Мягьячгъалайиъ регионарин арайиъ «Ягълухъ – ислягьвалин лишан ва халкьдин рюгь» ччвур тувнайи фес-тиваль кIули гъябгъиди. Фестивалиъ культурайин цирклин гъуллугъчйири, яратмиш апIбариин машгъул духьнайи касари, республикайин дишагьлийирин советарин, министерствйирин ва идарйирин, РД-йин яратмиш апIбан союзарин вакилари иштирак’вал апIиди. Серенжем Урусатдин халкьарин культурайин ирснан йисаз бахш вуди кIули гъабхурайиб ву.
Фестиваль гъабхбан метлеб – уьлкейин айитI халкьарин культурйирин аьлакьйир мюгькам апIувал, айи аьдатар уьрхювал, Дагъустандин ягълухъарин утканвал улупувал ву.

Серенжемдин тешкилатчйири туврайи мялуматариинди, Кафари Кавказдин округдин субъектариан , Москвайиан, Москвайин, Оренбургдин ва Волгограддин областариан вуйи хялариз культурайин программа гьязур дапIна.