Дюн’яйиъ агъзрариинди пишйир а, дурар вари маракьлудар ва важиблудар ву. Амма гьарсар касди думу пишйирикан чаз хуш вуйиб ва кIвак кабсруб кадабгъну ккунду. Гьяйифки, варидарихьан чпин кIваъ айи пишейин эйси хьуз шуладар. Хъа Фарида Шихялиевайихьан гъабхьну. Ва думу уьмурлугъдиз му пише ктабгъувалиин саб дакьикьайиъкьан швумал гъахьундар. Фарида Шихялиева Гъвандикк гъулан бицIидарин багъдин тербиячиди лихура.
Веледар тербияламиш апIувал думукьан гьии ляхин дар, хъа жарадарин бицIидар тербияламиш апIувал – му аьхю жавабдарвалра ву. Амма Фарида Рамазановнайи мидкан фикир апIурадар. БицIидарин багъдиъ айи гьарсар бицIирихьна думу жвуван веледдихьнаси янашмиш шула. Дугъан ачухъ ва гьаммишан разиди вуйи машнан кIалбар, ужуб гаф, мани хилар Гъвандикк гъулан хайлин бицIидариз багъри дадайиндарси гъахьну.
«Фарида Рамазановна бицIидарин багъдиъ тербиячиди лихури, 30 йис шула. Му вахтнан арайиъ дугъу 500-дихьна бицIидариз ужуб тербия тувну. Ав, дугъриданра, Фарида Рамазановнайи чан ляхин вафалуди кIули гъабхура. Дугъу гьар йигъан бицIидар шад ва рази шлу сягьнйир, конкурсар, тамшир тешкил апIура. Хайлин тамшир дугъу чав арайиз гъахну. БицIидар гьаммишан саб фтиин вуш машгъул духьну шулу. Дугъу бицIидариз чпин арайиъ дуствал уьбхюз, сар сариз кюмекназ гъюз, гъапIу чIуру ляхнихъан жавабдарвал гъабхуз улупура. Абйир-бабарин терефнаан ич тербиячйирихьна аьхю гьюрмат а. ГвачIнин ухди бицIидар разиди багъдиз гъюру. Гъафидар Фарида Рамазановнайин хабаъ архьру. Гьамдиинди дугъан ва бицIидарин дугъахьна вуйи гьюрмат рябгъюра.
Дугъкан гизаф улхуз ва ктибтуз шулу. Фарида бажи сабурлур, ужуб хасият хъайир, кIваъ рягьим айир, кюмекнан хил гьачIабккрур, бицIидарин гъайгъушнаъ шлур, ляхин ва бицIидар ккунир ву. Дугъу гьарсар бицIирин кIвахьна чан хусуси рякъ гъабгну. Гьаддиз думу, абйир-бабаризси, вари бицIидаризра ккунду», – гъапну ич сюгьбатнаъ Гъвандикк гъулан бицIидарин багъдин заведующий Радмила Рамазановайи.
Заведующийдин гафариинди, багъдин тербиячйиризра хайлин читинвалар алахьура. Мисалназ, гьамусяаьт багъдиъ 20 бицIир тербияламиш апIура. Дурар вари саб дестейиъ а. БицIидар 2 йислан 7 йис’ина яш айидар ву. Федеральный бицIидарин багъариз улупнайи программйир саб дестейиъ кивну ккунду. Дарсар дурари тамши апIбан къайдайиинди кIули гъахура. Амма лап бицIидарин ва чпин яш 7 йис шудайидарин фикир сабсиб дар. Гьаци вушра, Фарида Шихялиевайин вари бицIидар мектебдиз улихьна вуйи аьгъювалар тувбаан 98% гьязурди шулу. Дугъу зигурайи баркаллу зегьмет гьавайиди гъюдубчIвундар. Фарида Шихялиева Гъвандикк гъулан ва Хив райондин администрацйириан, образованиейин отделин терефнаан швнуб саб гьюрматнан грамотйир ва дипломар тувбииинди лишанлу гъапIну.
«Гъи узуз гьациб мумкинвал ккабхъну имиди, «Табасарандин нурар» газатдин машариантина йиз ляхнин вари юлдшар Тербиячйирин йигъахъди тебрик апIуз ккундузуз. Фунуб бицIидарин багъ гъадабгъишра, душван тербиячйир артистарихьди, художникарихьди, мялимарихьди ва вари ляхнар удукьру устадарихьди тевуз шулу. Амма дурарин варитIан асас бажаранвал – бицIидар ккунивал ву. Жараси хьуб мумкин дар, фицики бицIидариз тербия тувбаъ асас кюмекчйир ккунивал ва сабур ву. Ляхниъ дийигъну имиди, гьарсар гъуллугъчийиз чаз тербиячи ва насигьятчи лазим ву. Йиз ляхнин тажрубайиъ бахтнаанси гьацир кас алахъунзуз. Думу гъира йиз гъвалахъ хъа. Думу йиз ляхнин юлдаш, гьадму саб вахтна, узу бицIи риш вуйиган, багъдиъ йиз тербиячи вуди гъахьи Сифият Аьбдурягьманова ву. Дугъаз икрам апIури, узуз туву дарсариз ва насигьятариз чухсагъул кIураза. Сифият Сеферовнайи гьаму багъдиз чан уьмур бахш гъапIну. Гьамушваъ лихури, дугъан 50 йискьан шула, дурарикан багъдин заведуюшийди 15 йисан гъилихну. Думу дадаси ккун гъахьунзуз. БицIидарихьна ккунивал ва дурарихъан жавабдарвал гьисс апIуз, жвувхьан шлу кюмек тувуз, бицIидар ватанпервервалин тербияйин гьиссариинди вердиш апIуз улупунзуз. Хъа мидихъ хъубкьру жара гьюрмат айиб дар», – гъапну Фарида Шихялиевайи.
Фаридайихъди узу мектебдиъ саб классдиъ 10 йисан гъурхунза. Думу гьадму йисарихъан мина бицIидар ккунир ва ккергъбан классариъ урхурайидариз насигьятар туврур вуйи. Саб классдин шубар уч духьну, гележегдиз ктабгъру пишейикан улхруган, дугъу швнуб-сабан бицIидарин тербиячи хьуз ккуниваликан гъапнийи. Гьаци гъабхьнура ву. Хъа Сифият Аьбдурягьманова багъдиъ йиз тербиячира вуди гъахьнийиз. Дугъан мани хилар, ширин гафар, ачухъ маш ва шаду инчI узу уьмурлугдиз кIваъ уьрхюраза. Сифият бажи ва Фарида лайикьлу тербиячйир ву. Дурариз, багъри гъулаъси, вари Хив райондиъ аьхю гьюрмат а. Дурарси ляхниз вафалу ва бицIидарин гъайгъушнаъ айи инсанар ихь арайиъ имиди, бицIидар саб фикирра дарди дурариина ихтибар апIуз шулу.
