Мялимдин йигъ жара маркврарихь тевиган, башкъа гьюрматниинди тафавутлу шула, гьаз гъапиш гьарсар касдин юкIвариъ мялимарикан вуйи фикрар уьмурлугъдиз гъузна. Хъа мялимариз фукьан гизаф ужудар гафар бахш дапIна!
Гъи ухьуз рябкъюри-рябкъюри уьлкера, дидихъди сабси мектебра дигиш шула. Деврин мялимари мектебдиъ урхурайидарикан, ужудар аьгъюваларси, рюгьнан кьувват, сабурлувал ва саспиган дирбаш’валра ккун апIура. Рази апIурайиб гьадму вуки, гъагъивализ ва читинвалариз дилигди, му пише ктабгъурайи инсанар ихь арайиъ гизаф а. Урусатдин фунуб регион, шагьур, поселок гъадабгъишра, душвариъ баркаллу зегьмет зигурайи табасаран мялимар алахьуру.
Инсандихъди таниш духьну, сюгьбат гъапIубси, думу касди чан уьмур чаз ккуни пишейиз бахш дапIнайивалин гъавриъ шулу. Наргиз Фарзялиевара гьацдар инсанарикан ву.
Наргиз Аьлимурадовна Фарзялиева Ленинградский областдин Мурино шагьрин 4-пи нумрайин мектебдиъ математикайин дарсар кивру мялимди лихура. Наргиздин абйир-бабар Табасаран райондин Жвулли гъул’ан ву. Гьадму саб вахтна дугъан адаш чан хал-хизандихъди Дагъустандин Огни шагьриз кючмиш шулу. Наргиз Дагъ. Огни шагьрин 3-пи нумрайин мектеб ккудубкIну, ДГУ-йин математикайин факультетдик урхуз кучIвру.
Университет ккудубкIган, думу 1988-пи йисан направлениейиинди Табасаран райондин ЧвулатI гъулан мектебдиз гьаъру. Думу гъулаъ мялимди лихуз дугъаз сад йисантIан кьисмат гъабхьундайи, фицики жигьил мялим хайлин йишвариз швушвди ча кIури, гъюз хъюгънийи. Амма дугъан кьисмат чахъди сабси саб мектебдиъ, саб классдиъ урхури гъахьи Рягьмандиз шулу. Думуган Рягьман, Пензайиъ тикилишчивалин институт ккудубкIну, гьадушваъ ляхниъ дийигънайи. Дугъу чан таза хизанра Пензайиз хъади гъягъюру. Пензайиъ Наргизди инжинервалинна тикилишчивалин институтдиъра ва электрикар гьязур апIру училищейиъра дарсар киври гъахьнийи. 1994-пи йисан дурар Пензайиан багъри ватандиз кьяляхъ хъадакну гъюру, ва Наргиз чан багъри мектебдиъ директорин тербияйин ляхнариз лигру заместителди ва математикайин дарсар кивру мялимди лихуз хъюгъру.
Рягьмандиз ва Наргиздиз кьюр риш ва сар бай а. Шубари Санкт-Петербургдиъ медицинайин училище, хъа бали — мединститут ккудукIну, медицинайин центрариъ лихура. Дурар Санкт-Петербургдиз кючмиш духьну, магьа 10 йис ву.
«Гьарсар жигьил, гележегдиз вуйи пише ктабгъруган, аьхюдарин насигьятарихъ хъпехъуру, хъа хайлиндари чпиз кьабул вуйи пишекрарин цIарнаъ хьуз ккунди, чпин абйир-бабарин пише ктабгъуру. Ич хизандиъ мялимар адарич. Амма узуз му пише гьеле мектебдиъ имиди ккуниб вуйзуз. Гьадму саб вахтна узу урхурайи мектебдин директор вуйи Гум’арин Зейфуллагь Аьбдуллаевди учуз математикайиан дарсар киври гъахьну. Дугъан дарс кивбан къайда, дарснахьна вуйи янашмиш’вал, урхурайидарикан ккун апIурайи аьгъювалар ва тIалаблувал уьмурлугъ гьархударзуз. Узу му пише ктабгъувал асас вуди гьадму мялимдикан асиллу гъабхьну», – кIваин апIура Наргиз Аьлимурадовайи.
Наргиз Фарзялиевайин мялимвалин тажруба 40 йисахьна шула. Хайлин урхурайидариз, абйир-бабариз, ляхнин гъарашугъариз думу варитIан ужур мялим гъахьну. Дугъаз бицIидариз математикайиан жюрбежюр аьламатар ва аьмлар улупувал, математикайин цирклиан фикирлувал артмиш апIувал, дарсариъ маракьлу апIру дюшюшар улупувал лап важиблу ву. Гьарсар урхурайирихьна дугъу рякъ абгуру. Думу тIалаблур, ляхин апIуз ккунир, урхурайидарихъди рягьятди мясляаьт арайиз хрур ву. Дугъан дарсар гьарган маракьлудар ва урхбан материаларихъди бегьемди ацIнайидар вуди шулу.
«Наргиз Аьлимурадовна гьякьлувал уьбхрур, тIалаблур, амма сабурлур, кIван саламатур ва варидариз фикир туврур ву. Дугъу вари дарсар гъавриъ ахъруси, гьии чIалниинди кивру. Учуз математикайиан имтигьнар тувуз гучIударчуз», – кIура дугъан ученикари.
Наргиз Фарзялиевайи чан 40 йисандин педагогвалин зегьметнан рякъюъ швнуб-саб насил ужуб юкIв айи, бажаранлу, дирбаш выпускникар гьязур гъапIну. Дурарин арайиъ мялимар, духтрар, туканчйир, эскрар ва жарадар а. Гьар йисан октябрин 5-пи йигъан дугъу чан ученикарихьан мани гафар кайи кагъзар гъадагъура. Гъит думу кагъзар гъюблан-гъюбаз хъана артухъ ишри.
