Хив райондин мектебариъ, бицIидарин багъариъ, гъуларин администрацйириъ, культурайин хулариъ ва библиотекйириъ мялимарин пишекарвалин йигъаз бахш дапIнайи саб жерге серенжемар кIули гъухну.

 

 

4-пи октябриъ Хив райондин культурайин хулаъ яркьуди Мялимдин йигъ къаршуламиш гъапIнийи. Уч духьнайи мялимарин арайиъ 50 йистIан артухъ вахтна мялимвал дапIнайи ва гьадму гъуллугъназ уьмур бахш апIури имбу зегьметнан ветеранар, РФ-дин ва РД-йин лайикьлу мялимар ва гъарашугъар айи.

Серенжемдин иштиракчйирин улихь тебрикнан гафар хьади, Хив райондин глава Ярмет Ярметов ва райондин образованиейин отделин кIулиъ айи Назаряли Асланов удучIвну гъулхнийи.
Чпин улхбариъ дурари, мялимар марцци кIваан пишекарвалин йигъахъди тебрик апIури, дурариз мюгькам сагъ’вал, хизандиъ шадвал хьувал, хъасин, сабдиканра вижна ктарди, баярихь юкIв дипну, хушниинди ляхин апIувал ккун гъапIнийи.

Серенжемдин аьхириъ «РД-йин лайикьлу мялим», «РФ-дин образованиейин лайикьлу гъуллугъчи» кIуру ччвурарин, медаларин сагьиб гъахьи мялимар Хив райондин администрацияйин, РД-йин образованиейинна илимдин ва РФ-дин мярифатнан министерствйирин терефнаан чухсагъул мялум апIбан кагъзариинди лишанлу гъапIнийи.