Гьюрматлу мялимар!

Учву пишекарвалин машкврихъди кIваантIан тебрик апIурача.

Мялимвал гизаф читин ва жавабдар кеспи ву. Йисар гъягъюру, деврар гьюдюхюру, цIийи кеспйир арайиз гъюру, цIиб вахтналан бязи кеспйир гьархру, арайиан дургуру, амма мялимдин пише гьарган ихь арайиъ гъубзру. Фукьан деврар дигиш гъахьишра, мялимвалин ва-жиблувал, лазимвал цIиб хьибдар.

Мялимвали инсандикан аьгъюваларси, рюгьнан кьувват, зигьимлувал, эдеблувал, мюгькамвал, дугъривал ва инсандиз хас вуйи хъана жара гъиллигъар тIалаб апIуру.

Мялимарин улихь аргъаж шулайи наслиз тербия тувбан жавабдарвалин месэла дийибгъна. Гъи партйирихъ дуснайи бицIидарикан фужар ктучIвиди? Дурар фуну кеспийин эйсйир хьиди? Уьмур фу метлебназ бахш апIиди? Гьаму суалариз жавабар бицIидариз тербия туврайи мялимдикан, дугъан пишекарваликан, чан ляхнихьна вуйи ккуниваликан гизаф асиллу шула. Мялимари насил тербияламиш апIуру, дурари уьлкейин гележегдиз рякъ улупуру.

Варидарин уьмриъ мялимар гъахьну, дурари ухьуз гьарсариз тербия тувбак лайикьлу пай кивну. Нубатнан ражари мялимарин улихь кIул ис дапIну, «чухсагъул» кIурача.

Учвуз мюгькам сагъвал, кIван сабурлувал, ляхниъ заан хъуркьувалар, кIваъ айи метлебар кIулиз удучIвувал ккун апIурача, учву гъапIу уж’вал учвухь тербия гъадабгъдарин кIваълан дурубшри.

 

Газатдин редакцияйин
коллектив.