Дагъустандин халкьарин сабвал, гъирагъдилан гъафи хялижвдихьна айи гьякь-гьюрмат, аьхюр-бицIир гюзет апIувал, табиаьтдин гьяйран шлу лишнар гъяркъган, ихь юрднан такабур йишвариин аьшкьламиш шулайи туристарин кьадар йислан-йисаз артухъ шула.
Амма саб бязи терефар уларикк ккахьган, дурари, табиаьт мешребсуз апIури, дид’ина хурайи аьрвалар, гьарар-кюлериз, яр-йимишдиз апIурайи тясир гъябкъиган, кIваан гьарай гъябгъюрайиз.
Гъи Хив райондин чIат-чIурдилан ул илбицруган, сифтена-сифте рякъюрайи ва ЧIир’арин гъулан сяргьятариин ерлешмиш духьнайи гъван адабцIру карьерар гьацдар йишварикан садар ву.
Ав, саб терефнахъанди фикир гъапIган, жара ляхин-кар адру гъулариъ яшамиш шулайи элугълийириз му фициб-вушра ляхин ва кьюб кепек ву. Гьацира гъи гъулариъ тикмиш апIурайи лизи гъвандин хулар, улихьдин шюшдиндар гьадагъури, хъаърайи гъвандин ивнар гъяркъган, гевюлра ачухъ шулу. Ккадабхънайи саб рякъ дюз алапIруган кюмекназ бакар шулайивалра, кечмиш гъахьи кас сикин апIругандиз накьваригъна майит фаракьат гъапIиган, накьдин цалик кивру шибар жархар ва кIулихъ хъубсру гъван тувбан, гьацира гюмбтиз вуйи кюмекарра дурарикан бихъурахьуз.
Амма, йицIур касди уьл ипIуру, йисар-вазарик дих гъапIган гьай кIуру кIури, филадизкьан ккебехъну гъузхьа?
Улар тIаъну табиаьтдиз лигруган, хал-хизан хъади сейир апIуз гъягъруган, яр-йимиш уч апIуз чIат-чIурдиз удучIвруган, рякъ-хулиз фикир тувган, думу карьерари багарихь ерлешмиш духьнайи гъулариз фициб тясир апIураш, мялум шулахьуз.
Амсишин али йигъари ктарди, миди вуйи вахтна хьуб-йирхьуб карьериан гьар йигъан асккан гьисаб йирхьуб-ургуб машин гъванар, блокар адатIура. Хъа гъванар адатIурайиган арайиз гъюрайи лизи бишируг наанди гъябгъюра? АдатIу швнуб-саб тонна гъванар, гъюри, КамАЗариъди гьаму рякъяриъди гъахура. Мициб гъагънакк ккайи ихь рякъяр фицдар хьиди, гьацира йисар-вазарик гужназ уликкна хурайдар.
Йиз фикриан, гъи багарихь ерлешмиш духьнайи гъуландарин арайиъ, аьхир адарди ипну гъалин сес айи, гьам ибан кьумрахъ апIури варкI-варкI лихурайи карьерарикан гъалабулугъвал кади ва му сес фила хтабтIуйкIан кIури, ккилигурайидар адарди гьич даршул…
Арайиз дуфнайи аьгьвалатнахъди аьлакьалу дурарин фикир фициб вуш, макьала газатдиъ чап даIну, агьалйири думу гъурхган, мялум хьидихьуз.
