РД-йин сагъламвал уьбхбан Министерствойин пресс-гъуллугънаан туврайи мялуматариз асас вуди, гъябгъюрайи йис ккебгъхъан мина гъийин йигъаз республикайиъ кIамкIар уьзриан агьалйир аьзарлу хьпан 23 дюшюш гьисабназ гъадагъна.

Аьзарлу гъахьидарин аьхюну пай бицIидар ву.

КIваин апIуз ккундучуз, гъубшу йисан му уьзриан 280 кас аьзарлу гъахьнийи. 2017-пи йисахъди тевиган, му уьзриан иццру хьпан улупбар 4 ражари за духьна.

«КIамкIар уьзрин инфекция гьяракатниинди тарабгъурайивалин асас себеб – думу уьзриан вакцинация гъабхувализ къаршувал улупурайивал ву. Агьалйириз прививкйир апIбахьан гучI ка. Аьхюнуб пай абйир-бабари, Интернетдин жюрбежюр сайтариъ прививкйирикан зарар а кIуру жюрейин дюз дару мялуматар урхури, дурарихъ хъугъри, чпин веледариз вакцинация апIуз къадагъа апIура. Натижайиъ, гьадму саб вахтна зяиф гъахьи гъагъи уьзрар гъи хъанара кьяляхъ гъюра ва гужал шула.

КIамкIар – гъагъи уьзрарикан саб ву. Диди инсандин беден лап зяиф апIуру. «Уьзур дярябкъю абйир-бабариз, дидин жанлуваликан хабар адар. Гъи учхьан думу уьзриз аькси прививка апIувалиинди хайлин агьалйир аьжалин бацаригъян гъядягъюз гъабхьивалин гизаф кьадар дюшюшарикан пуз шулу»,

– къайд гъапIнийи ич сюгьбатнаъ РД-йин сагъламвал уьбхбан Министерствойин кIулин эпидемиолог Муслимат Гьясановайи.

Гъийин йигъан Дагъустандин мектебариз ва бицIидарин багъариз кIамкIар ва паротит уьзрариз аькси прививка дарапIу бицIидар кьабул апIурадар. Эпидемия ачмиш хьпан хатIасузвал аш, регионариз гьаму жюрейин уьлчмйир кьабул апIуз ихтияр а.