Февралин 5-пи йигъан Дербент шагьрин вари халкьарин культурйирин ва динарин тарихдин Музейиъ Дагъустандин Огни шагьриъ яшамиш шулайи художник Мягьямед Мурадовдин сабпи ражари вуди «Вахтарин аьлакьа» кIуру хусуси выставка кIули гъубшну.
Серенжемдиъ Дербент шагьрин главайин заместитель Жалалудин Аьлирзаев, шагьрин администрация-йин культурайин отделин кIулин пишекар Гюльпери Мирзабалаева, Мягьячгъала шагьриан дуфнайи искусствойин пишекар Жамиля Дагирова, Дагъ.Огни шагьрин культурайин Хулан директор Феруза Мягьямедова, табасаран драмтеатрин коллектив, Имшнигъ гъулан агьалйир, гьацира искусствойихъ юкIв хъайи касар иштирак гъахьну.
Серенжем ачмиш апIури, музейин директорин заместитель Самиля Нажафовайи уч духьнайидар Мягьямед Мурадовдин уьмрин ва яратмиш апIбан рякъярихъди таниш гъапIну.
Уткан табиаьтдиинди ва гюрчег халачйир урхури гъахьивалиинди адлу вуйи Табасаран райондин Имшнигъ гъулаъ бабкан гъахьи Мягьямед Мурадовди бицIи вахтнахъан мина халачйирин мурсларин рангариз, чешнйириз, табиаьтдин утканвализ фикир туври гъахьну. Мектеб ккудубкIбан кьяляхъ, жигьил бай ДГПУ-йин художество-йинна графикайин факультетдик урхуз кучIвру. 1991-пи йисан хъуркьувалиинди заан образование гъадабгъу жигьил пишекар багъри гъулан мектебдиъ ляхниъ учIвру. ЦIиб вахтналан думу чан уьмрин юлдаш Маркизатдихъди Дагъустандин Огнийиз удучIвну гъюру ва мушваъ халачйирин фабрикайиъ лихуз хъюгъру.
Думуган дугъу «Сафар», «Тапанча», «Дербент» ва гьацира жара халачйирин швнуб-саб чешнйир ужуб дережайиз дигиш апIуру.
Гьаддихъан мина художник Мурадовди, халачйирин чешнйирси, халкьдин тарихдихъна хътакури, чан хусуси хатIниинди зигурайи шиклариъ гьамусдин нукьсанвалар улупури, дурарихьан ярхла духьну ккунивал тасдикь апIура. Дугъриданра, художникди гъизигу багъри юрднахьна ккунишин улупурайи шиклариз дилигну, дурарихьан гьудучIвуз шулдар. Дурар гьарсар касди чахьан шлуси «урхура». Устадвалиинди, мани рангариинди дизигнайи шиклари искусствойихьна маракьлувал адрударра гьяйран апIуру.
Урусатдин художникарин Союздин член, табасаран драмайин театрин художник Аьбдурягьман Уьсмановди, Гюльпери Мирзабалаевайи, Жамиля Дагировайи, Фероза Мягьямедовайи, Эльмира Аьшурбеговайи, му музейин пишекар, художник Андроник Муратовди ва жарадари му йигъан Мягьямед Мурадовдин яратмиш апIбариз заан кьимат тувну.
«Узу зигурайи шикларин сюжетар ихь уьмриан гъада-гъураза. Ихь дагълу юрднаъ яшамиш шулайи гьарсаб халкьдиз чан культура а. Узуз ухьу думу культурайихьан ярхла духьну ккундарзуз. Ихь чIалар гъудургиш, ухькан фужар хьиди?»
– гьамци кIура сикинсуз юкIв айи художникди. Гьаддиз Мягьямед Мурадовди чан «КIваинди гъибт», «Уьмрин бегьер», «Сессуз мяъли», «Кюгьне Дербент» ва гьацира жара дизигнайи шиклариъ гъийин наслариз жвуван тарихдихьна, культурайихьна илтIикIуб теклиф апIура. Ихь халкьди дуланажагъдиъ ишлетмиш апIури гъахьи сяняаьткарвалин алатариинди художникди чан, уьмрихьна вуйи лигбариз тамашичйириз фикир тувуз гъитра. Дизигнайи гьарсаб шиклиз чан тарих а. Му йигъан гизафдари Мягьямед Мурадовдиз суалар тувнийи, ва му кьаназ кIваинди гъубзру серенжемдиъ иштирак гъахьидарин юкIвариз диди ужуб саягънан тясир гъапIувал тасдикь апIураза.
Аьхиримжи йисари учв яшамиш улайи шагьрин искусствойин 1-пи мектебдиъ лихурайи М.Мурадовдин ученикарира, республикайиъ гъягъру жюрбежюр конкурсариъ иштирак шули, сабпи йишвар гъадагъура.
Ихь ватанагьли, бажаранлу художник ккудушу йисари жюрбежюр жара художникарихъди сатIиди ихь республикайиъ кIули гъушу хайлин выставкйириъ иштирак гъахьну ва швнуб-саб дипломдиинди ва гьюрматнан грамотйириинди лишанлу гъапIну.
Бажаранлу художникси, Мягьямед Мурадов ужур кюлфетчира ву. Дугъан уьмрин юлдаш Маркизатра табасаран чIал кивру мялимди лихура. Дурариз сар ришна кьюр бай а. Абйир-бабарин чIалнахьна, багъри культурайихьна вуйи ккунивали дурарин веледаризра тясир гъапIну. Му хизандиъ багъри чIалнахьна вуйи гьюрматра аьхюб ву.
Мягьямед Мурадов ич газатдин коллективдин терефнаан кIваантIан му ужуб гьядисайихъди тебрик апIури, дугъаз ва дугъан хизандиз хъуркьувалар ккун апIураза. Выставка мартин 5-пи йигъаз давам хьибди.
