Гъи йиз макьалайиъ, гьюрматлу газат урхурайидар, саб маракьлу дюшюшдикан ктибтуз ккундузуз – фици мюгьюббатну инсандиз ц1ийи кьувватар тувруш.
Онлайн жюрейиинди табасаран чIалнан дарсар киври, кьюд йискьан вуйиз. Дюзди гъапиш, чIал дубгъуз ккунидарин кьадарра думукьан аьхюб дар, гьаци вушра, вахт-вахтарик, чIал агъю апIуз ккундучуз кIурудар арайиз удучIвури шулу. Саб ражари узуз сар шуру гъибикIнийи: «Узуз, гафар апIуз шлуганси, табасаран чIал дубгъуз ккундузуз, амма литературайин чIал ваъ, хъа нугъатнан». Фикир гъапIза: «Йиз багъри чIалра (ничIрасарин нугъат) саки литературайинубдиз багахь ву, узура литературайин чIалнахъди ляхин апIураза, хъа му шураз фици дарс кивдикIан?».
Вушра, бисмиллагь дупну, ляхнихъ хъюгънийча. Сифте му шурхьан, табасаран чIалниинди гафар дапIну, думу фтинкIа гъавриъ шулаш, гьерхнийза. Риш табасаран чIалнан затра гъавриъ ахърадайи. Сарун дугъаз фу жюрейиинди кIуруш, фикрикк ккахънийзу: «Белки, узу дугъан нугъатниинди дюзди гафар апIурадашул?».
Вушра гьар йигъан дугъаз 1-1,5 сяаьтнан арайиъ дарс киври гъахьунза. Падежарикан, дурар дигиш апIруган, гафнахъ хъаъру аьхирарикан, варитIан гизаф ишлетмиш апIру ибарйирикан, саб гафниинди, му шураз чIал дубгъуз варитIан рягьти жюрейиинди ктибтури гъахьунза. Амма дугъу, суалнаан суал адабгъури, чавра, узузра аьсси апIури гъахьну. Фуну жюрейиинди гъапишра, думу зат гъавриъ шулдайи. Хъанара фикир апIурза: «Я кас, табасаранлуйиз зат чIал агъдаршра, саб-кьюб гафнанкьан думу гъавриъ ахъру. Хъа му риш гьаз гъавриъ ахърадар?»
Яваш-явашди кIурайи гафарин думу цIи-цIибди гъавриъ ахъуз хъюгънийи… Амма гьаци инжик духьнайзуки, сарун дугъаз дарсар ктриварза кIури, кьаст гъапIунза. Вушра, сабур дапIну, ккебгънайи ляхин кIулиз адабгъну ккундийи. Нубатнан ражари дарс ккебгърайи вахтна, дугъу узуз гъапи: «Наргиз Сейдуллаевна, узхьан чIал дубгъуз даршулайиваликан, узу гъавриъ адрахърайиваликан увуз хъял гъюра хьиди. Багъишламиш апIин. Узу табасаран риш дарза. Москвайиъ бабкан гъахьи татар риш вуза. Табасаран чIал дубгъбан метлеб гьадму вуйизки, узу швуваз ча дупнайи бай табасаран ву. Эгер чпин нугъатнан чIал узу дуд-рубгъиш, дугъу швуваз гъахударзаву, гъапнийиз».
Му гафар гъеерхьган, гьаз вуш Раминайиз (ччвур гьюдюхна) кюмек апIуз ккун гъабхьунзуз. Белки, табасаран бали дугъаз кучIлар апIурашул кIурира, фикир гъапIунза. Гьадму йигъланмина сарун ич дарсар аьдати дару жюрейиинди гъахуз хъюгъюнча. Саб-кьюб сяаьтнан арайиъ учу гафар апIури гъахьунча. Гафарра фицдар? Сижари швушваз бирмиш гъапIиган, швушву фу дупIну ккундуш, дугъахъди гъабхру сюгьбатнакан, аьхюр-бицIириз гьюрмат улупури, апIру гафарикан ва гь. ж. Мидин кьяляхъ саб ваз хьайиз, татар шуру табасаран чIалниинди гафар апIуз хъюгъну. Гъи дугъу саспи табасаранлуйиритIан уччвуди ихь чIалниинди гафар апIура.
Гьаму йисан хьадан вазариъ дурарин сумчирра гъабхьну. Раминайин гафариинди, татар швушваз табасаранарин хизандиз гъяйизра табасаран чIал агъювалиин мирасар мюгьтал духьна.
«Учу Москвайиъ сумчир гъапIунча. Эгер Дагъустандиъ сумчир гъапIнийиш, увузра теклиф апIидийза. Гъюру йисан узу Дагъустандиз, Табасаран райондиз хъади гъюр кIури, умуд кивраза. Гьадмуган, цIиб вахтна гъулаъ гъузну, хъанара артухъси чIал дубгъуз ккундузуз. Гьаддихъан, сарун табасаранлу вуза, пузра хьибдизухьан», — кIура татар шуру.
Хъа узура йиз терефнаан дугъаз бахт ккун гъапIунза. Дугъан табасаранлу хьуз улихь дивнайи метлеб кIулиз удубчIври.
