Мялум вуйиганси, 1966-пи йисан кьибла Дагъустандиъ ижмиди жилар гъутIурччвнийи. Думуган Табасаран райондин Бургьанкент гъулан гъуншдиъ айи Хюлюгъ ва Дашлукент гъулар саки гъадаргънийи. Думу гъуларин бязи агьалйир Бургьанкентдиз, тмундар Дагъ. Огни ва Дербент шагьрариз кючмиш гъахьнийи. Гьадму вахтна Бургьанкентдиъ цIийи мектеб дивуз йикьрар гъапIнийи. Мектебдин дарамат Армавир ва Краснодар шагьрариан дуфнайи тикилишчйири силикатдин кирпчарикан дивнийи. Тикилишчивалин ляхнар 1968-пи йисан январиъ ккудукIнийи, ва гьадму вазлиъ душваъ дарсарра кивуз хъюгънийи.
Мектеб аьдати жюрейин ва 192 урхурайириз йишв айиб вуйи. 1980-пи йисан сентябрин вазлиъ думу миржид йисандин мектебдиз илтIибкIнийи. Му мектебдин сарпи директорди Аьбдулмежид Аьлимирзаевди ляхин гъапIнийи.
Аьбдулмежид Аьлимирзаев (шиклиъ) 1938-пи йисан Бургьанкент гъулаъ бабкан гъахьну. Гъулан мектеб ккудубкIган, думу Мягьячгъала шагьриъ ДГУ-йин харижи чIалар аьгъю апIру факультетдиъ немец чIалнан отделениейик урхуз кучIвру. Думу ккудубкIбалан кьяляхъ, жигьил пишекри 1962-пи йисхъан мина 1966-пи йисазкьан Дербент шагьриъ ерлешмиш дубхьнайи педагогвалин училищейиъ дарсар киври гъахьну. Жигьилариз мюгькам аьгъювалар ва тербия туври, думу сикин дарди чан пишекарвалин дережа за апIбиинра машгъул вуди гъахьну. Душваъ юкьуд йисан гъизигу зегьметнан натижайиъ Аьбдулмежид Аьлимирзаевди училищейиъ урхурайи студентариз аьгъювалар ва тербия тувбан ляхин заан дережайиз адабгъуру.
Марцци кIваан, аьшкь ади тамам гъапIу ляхнин натижйирра ужудар шули аьдат ву. Гъи Аьлимирзаевдин хиликк жюрбежюр йишвариъ мялимарди, духтрарди, районарин админис-трацйирин гъуллугъчйирди лихура ва гъилихну. Гизаф йисари Табасаран райондиъ аьхю гъуллугъариъ гъилиху Жяфар Гьяжиевди, Табасаран райондин кIулиъ гъахьи ва хайлин вахтна райондин халкьдин суддин председателди гъилиху Аьлимирза Гьясановди ва хайлин жара касари Аьбдулмежид Аюбович гьаммишан мани гьиссариинди кIваин хури шулу. Дугъан гьякьнаан Аьлимирза Гьясановди гьамци гъапнийи: «Аьбдулмежид Аьлимирзаев учу педагогвалин училищейиъ урхурайи йисари жигьил ва варитIан гьюрмат айи мялимарикан сар вуйи. Думу, чан гьарсаб дарснахьна жавабдарвалиинди янашмиш шули, гьарган ляхнин тажрубайиъ цIийи къайдйир тIаъбиин машгъул вуйи. Гьаддиз дугъу, чав фунуб йишваъ ляхин гъапIишра, хъуркьувалар гъазанмиш апIури гъахьну. Гьарсар студентдихьна хусуси къайдайиинди янашмиш хьувализ, гьарсарин кIвахьна рякъ абгувализ, урхурайи гьарсар балин ва шуран удукьувалар артухъ апIуз шлувализ лигну, вари урхурайидарин терефнаан дугъаз аьхю гьюрмат ади гъабхьну».
Аьбдулмежид Аьлимирзаевдин ляхнихьна вуйи жавабдарвализ Табасаран райондин улихь-кIулихь хьайидари лайикьлу кьимат тувру – дугъаз Бургьанкентдин мектебдин директорди лихуз теклиф апIуру. Гьамци педучилищейин мялим 1967-пи йисхъан мина мектебдин директорди лихуз хъюгъру. Чан регьберваликкди дугъу мектебдиъ мялимарин ужуб, албагу коллективра уч апIуру.
Дюзди 52 йисанкьан Бургьанкент гъулан мектебдин завучди лихури гъахьи Гьяжимягьямед Гьяжимягьямедовди, табасаран чIалнан дарсар кивру мялим Аьбдулягьяд Аьлимирзаевди, географияйин дарсарин мялим, Зейфуллагь Рамазановди, физкультура кивру мялим Къазиаьгьмед Кюрабеговди, ккергъбан классарин мялим Аьлиаьгьмед Исмяиловди, химияйин ва биологияйин дарсарин мялим Аьзизбег Шихягьмедовди, урус чIалнан дарсарин мялим Аьли Кюрабеговди, ккергъбан классарин мялим Сиражудин Мисриевди ва кьяляхъна гъафи хайлин жигьил мялимари дугъахъди сабси ляхин апIури гъахьну.
Мялимди, жиниб дар, швнуб-саб классдиъ дарсар кивру. Дугъан сабишв’инди миржицIур, кьюдварж урхурайир хьуз мумкин ву. Хъа мялимвалин вари уьмриъ дугъан хиликк гъурхдарин кьадар фукьан шуйкIан?! Дурарин арайиъра кьюр саб хасиятнан бицIидар адар. Гьаддиз дурарихьна вуйи рафтарра сабсдар вуди шулдар.
Аьбдулмежид Аьлимирзаевди дарс киву ва тербия туву урхурайидар заан аьгъювалар айидар гъахьну. Дугъу гъизигу зегьметназ ва хъуркьувалариз лигну, му жямяаьтлугъ касдиз, ужур мялимдиз, тербиячийиз Табасаран райондин кIулиъ айидарин, райондин образованиейин управлениейин терефнаан швнуб-саб ражну гьюрматнан грамотйир, кьиматлу пешкешар тувну. Дугъан хъуркьувалар гьюкуматдин терефнаанра лишанлу дарапIди имдар. Аьбдулмежид Аьлимирзаев «Республикайин халкьдин образование-йин отличник» медаль, «РФ-дин уьмуми кьялан образованиейин мектебарин гьюрматлу гъуллугъчи» кIуру ччвур ва «Зегьметнан ветеран» шагьадатнама тувбиинди лишанлу гъапIну.
Аьбдулмежид Аьлимирзаев, ужур регьберси, мялимси ва тербиячиси, аьхю ва албагу хизандин кIулра вуйи. Дугъу чан уьмрин юлдаш Нарият Сулемановайихъди 5 велед – сар риш ва юкьур бай – аьхю ва тербияламиш гъапIну ва дурариз варидариз заан образованиера тувну.
Аьбдулмежид Аьлимирзаев, 64 йисан яшнаъ ади, 2002-пи йисан 27-пи октябриъ кечмиш гъахьнийи. Гьюрматлу мялим ихь арайиан душну, 20 йис дубхьна, амма гъира, Дагъустандин фунуб шагьриз, райондиз гъушишра, ичв райондиъ гьамцир дирбаш мялим, мектебдин директор ади гъахьнийи кIури, думу кIваин апIру касар гизаф ими. Мицисдар ужудар инсанар ихь арайиан гъушнушра, дурар кIваина хуб ихь гьарурин буржи ву.
