Сабпи май Табасаран райондин Урзигъ гъулан агьалйириз кьюб терефнаан машкврин йигъ гъабхьну. Хьадукран ва зегьметнан машкварси, душваъ спортдин цIийи майдан ачмиш апIбан машкварра къайд гъапIну.
Думу серенжемдиз гъулан гъвалахъ хъайи майдандиина, гъулан агьалйирси, гъунши гъуларианра, гьацира Урзигъ гъул’ан жара йишвариз яшамиш хьуз удучIвну душнайи хайлин агьалйирра дуфнайи.
Спортдин майдан ачмиш апIбан серенжемдиз райондин глава Мягьямед Къурбанов, райадминистрацияйин гъуллугъчйир, жюрбежюр идарйирин кIулиъ айидар, «Къужник гъулан совет» МО СП-йин глава Шябан Ибрагьимов ва жара касар гъафнийи.
Серенжем ачмиш апIури, Мягьямед Къурбановди гъулан агьалйир майдин машкврихъди ва спортдин майдан ачмиш апIбахъди тебрик гъапIнийи. «Райондиъ физкультурайин ва спортдин ме- сэлйириз аьхю фикир тувра. Ихь метлеб – вари гъулариъ шлубкьан гизаф жигьилар спортдиина жалб апIувал, дурарин сагъламвал мюгькам апIувал, ихь жигьилар ватанперверарди тербияламиш апIувал вуйихь. Дици хьпан бадали, райондиъ шартIарра яратмиш апIура. Хъа райондин спортдин талитариъ Къужник гъулан администрацияйиз дахил шулайи гъулариан, гьадму гьисабнаан Урзигъ гъул’ан, вуйи жигьилари аьхиримжи йисари заан активвал ва хъуркьувалар улупура. Йиз фикриан, спортдин майдан ачмиш апIували жигьилариз хъана заан мумкинвалар ачмиш апIиди», – гъапнийи райондин главайи.
Серенжемдиъ Къужник гъулан администрацияйин кIулиъ айи Шябан Ибрагьимовди, гъи спортдин майдан ачмиш апIбан маш-квар, саб Урзигъ гъуланси, гъулан поселениейиз дахил шулайи жямяаьтарин машкварра ву, гьаз гъапиш гъулан поселениейин саб жерге имбу гъулариъра дицисдар тикилишар аьхирихъна гъюра, гъапнийи. Дици хьували бицIидариз, живанариз физкультурайиин ва спортдиин машгъул хьуз, дурар харжи гъиллигъарихьан ярхла апIуз ужудар шартIар яратмиш апIура. «Къужник гъулан совет» МО СП-йиз дахил шулайи гъулариъ аьхиримжи вахтна хайлин уж’валнан дигиш’валар гъахьну. Месела, Къужник, Шилла ва Кьюракк гъуларин кьялан мектебарин дараматар дибдиан рас апIбан ляхнар кIули гъухну, 2017-2018-пи урхбан йисан Улуз гъулан баяр-шубар цIийи мектебдиз гъушну, гьацира гъулан поселениейин аьтрафариин рякъяр рас ва тикмиш апIбан ляхнар давам шула. Думу ляхнар кIули гъахбаъ улихьнаси РД-йин Халкьдин Собраниейин депутат, хъа гьамус райондин глава вуйи Мягьямед Къурбановди аьхю роль уйнамиш гъапIну», – гъапнийи Шябан Ибрагьимовди.
Шадвалин серенжемдиъ удучIвну улхури, Урзигъ гъулан агьали Ражаб Расуловди (думу Дербент шагьриъ яшамиш шула) гъулаъ волейбол артмиш апIбан, асас вуди 1990-пи йисари, живанар спортдин думу жюрейиина рюгьламиш апIбан бадали, чав, чан гъардшари ва жара жигьилари фициб ляхин гъабхури гъахьнуш, ктибтну. Дугъу жигьилариз волейбол уйнамиш апIру туп багъиш гъапIну ва гьадму йигъан кIули гъягъюрайи зонайин талитариъ варитIан ужурсир волейболистдиз тувуз кубок гъабхну. Ражаб Расуловди серенжемдиз уч духьнайидар машкврихъди ва спортдин майдан абццбахъди тебрик гъапIну.
Серенжемдиъ гъулан жигьиларин терефнаан Салман Аьлиев, зегьметнан ветеран ТIеиб Мазанов ва жарадар удучIвну гъулхну. Дурари чпин гъулаъ баяр-шубариз дициб уьмарат дивбаз райондин кIулиъ айидариз аьхю чухсагъул мялум гъапIнийи.
Улхбарин кьяляхъ, спортдин майдандиин «Къужник гъулан совет» МО СП-йиз дахил шулайи гъуларин командйирин арайиъ волейболиан сабпи йишв бадали вуйи талитар давам гъахьнийи. Натижайиъ сабпи йишв Хьарагъ гъулан командайи гъазанмиш гъапIнийи. Кьюбпи йишваз Урзигъ гъулан команда лайикь гъабхьну, хъа шубубпи йишв Къужник ва Улуз гъуларин командйири чпин арайиъ пай гъапIну.
