Гьар йисан ноябрин вазлин аьхиримжи элгьет йигъан Урусатдиъ дадйирин Йигъ къайд апIуру. Гъийин Литературайин машнаъ гьарсар касдин уьмриъ варитIан багьалу му инсандиз ихь шаирари бахш дапIнайи шиърар туврача. 

 

 

 

Гюлбика Уьмарова
Дада

Аьзиз дада, гюзгю вува йиз уьмрин,
гафар вуяв, гьякьлударси, лап ширин.
Аьхир адру шадвал айир улариъ,
Умунвал – кIваъ, манишинра – хилариъ.

Шуйва, дада, гьалварик каъри кюкйир,
вазлин аквнакк ктитуйва махъвар сюгьрин…
Вува дюаь, дава-дарман, дада йиз,
адар аьхир увкан вуйи мяълийиз.

Сар касдира шадвал тувдар увуси,
гьарсар велед вуйир улин ниниси.
Гюрчег дюн’я узуз пешкеш дапIнайи,
аьхир адру икрам ккуни дадайиз.

Гьич айинхъа жара инсан, увусир,
уьбхюз аьгъюр фициб-вушра жини сир.
Рягьим-сабур вува, дада, фагьмин йиз,
ккудудубкIур увкан вуйи мяъли йиз.

Вуйиз дада гюзел бика такабур!
Вуйиз дада гъизил ригъдин аку нур!
Вуйиз дада чирагъ, нугъат йиз уьмрин!
Кьисматниин шад вуза, дада, ширин.

 

 

Идаят Аьлескеров
Баб-дишагьли

Сикинсуз вува, дада, му жилиин,
ГьапIруб вуйкIан яраб кьувват яв жандин?
Дарна кьимат адру жафайин эйси,
Уву фицир дарнахъа, баб-дишагьли?!

Жил’ин дишагьлийин бахт ву баб хьувал,
«Дада» гаф ебхьуб веледдин мелзналан.
ХъапIра дугъу мушваъ уьмур чан гьялал,
Кади фикрик гьаммишан веледдикан.

Бабаз велед, веледдиз баб ву ширин,
Адар дурартIан багъридар жилиин.
Уьмрин мяналу аьламдиъ бабарин
Баламар ву, лай-лай гъиву чав кьяб’ин.

Алди шинт’ин ишурайи бицIирин,
НивкI дарди йишвар цIиб гъушнин бабарин!
Мюгьтал вуза, гьапIруб ву юкIв дурарин
Убшри айиб вари сабур жиларин.

Гъяри йисар, зяиф шулу ихь бабар:
Машнаъ кьарцIар – веледарикан фикрар,
Бузар кушар – уьмриъ гъахьи гъайгъушнар.
Инсафсуз ву му дюн’яйин къарарар.

Теклиф вуйиз тяфайиз инсанарин,
КIвак кучруб зат дапIну ккундар бабарин.
«Дада» гафнаъ убшну а дюн’я вари –
Фицир рягьимлур вуш, лиг, баб-дишагьли.

 

 

Эльмира Аьшурбегова
Вари дюн’я яв кIваъ убшнайи, дада

Вари дюн’я яв кIваъ убшнайи, дада:
Веледарра, халра-гъулра, аьдатра.
Гъабгур дайва рягьят йишварихь далда,
Бизар гъахьир дайва уьмриккан затра.

Гъягъюрайи рякъюъкьан гьялак дарди,
Вардин гъагъ алдарди гъузуз шулдайвхьан.
Хилиъ ляхин, униъ бицIир адарди
Деъну уву кIваин апIуз шулдарзхьан.

Гъибтундарва яв кIван цIадал чаъ адруб,
Яв зегьмет кадруб адар дюн’яйиъ йиз.
Фтиз гъилигиш – дидиъ уву рякъюру,
Фу гъеебхьиш – уву кIваина гъюриз.

Яв гьякь мухриъ убшнайи вари дюн’я.
Вари дюн’яйиъ рябкъюриз сурат яв.

 

 

ТIагьир Мирзакеримов
Бабан юкIв

Ужуб фу аш дюн’яйиъ, хьуб веледдиз
Метлеб вуди либцури шул бабан юкIв.
ЧIуруб дарибшри кIури дугъан жандиз,
Веледдихъан убгури шул бабан юкIв.

Бабаз чан юкIв адабгъишра дар гьяйиф,
Шулуш ужуб дидкан багъри веледдиз.
Иццури, чав духьну ашра лап зяиф,
Гъаразнаъ шул баб сагъ’валин веледдин.

КуркIну ккунду ригъдин нурар чан балик,
Ибшри кIури дугъан кIул’ин акувал.
Дерд-хажалат дарибшри гьич ихь бабак.
Гьяйиф дарин дугъаз рябкъюз чIурувал.

Бабаз ккунду дюн’яра дубхьну ислягь,
Веледра чан вуди гьарган архаин.
Ав, бабари уьбхюра уьмур ислягь,
Веледариз дярябкъюз дяви хаин.

 

 

Шюшеханум Керимова
Дадайин хилар

Яв хилархъан гъюри азуз ниъ уьлин,
Дерниъ гъубжу, туканариъ дибрихъру,
Рягьятвал фу вушра аьгъдру дурарик,
Кай тIилисим – ляхниан ляхин бихъру.

Бистниъ, хяраъ, хутIлиъ, хулаъ – гьарвахтна,
Зирек хилар шуйи зегьметнаъ халис.
ЦIикIарра гьязур дапIну швнуб-саб рангнан,
Дуркьаригъ ришуйва халачи, кумис.

Йиз хиларихьан гъабхьундар, явдари
ГъапIуб вари текрар апIуз, я хьибдар.
Дерник кивну, дубжну уьл веледариз
Тувуз узхьан, гьелелиг, удукьундар.

Зяиф духьнашра яв хилар, улари
Агури шулу дапIну ккуни ляхнар.
Ришури халачйир, кумсар фикрариъ,
Дирхурава гьаци шубариз ккурттар.

Алахьунвуз фукьан вушра гъайгъушнар,
Аьхю хизан кIули гъабхуб дар рягьят.
Дарвуз кьабул гъи кьабивалин лишнар,
Гъушу вахтар кIваин хурва гьарсяаьт.

Дернин уьлин ицци ниъ гъюри азуз,
Гъира сикинвал дибрихъу хилархъан.
ЮкIв шадди, жан сагъди уву рякъюз
Шулайивал, уьмриъ аьхю бахт вузуз.

 

 

Аьбдуллагь Аьбдурягьманов
Багьа кIалбар

Рякъюъ гьахъган узуз яшлу дишагьли,
Дугъан машнаъ агуруза яв кIалбар.
Лизи кушар, цIиб пашман вуй яв улар…
Хиял шулу, ву раст дархьи гъузидар.

Гъабхьну вушул кIури узкан вуз гиран,
Йивураза йитим гъабши кIваз гъурдар.
Гьаммишандиз микIси гъубшну вахт узхьан,
ЮкIв иццура, артухъ ккунди ву, дада.

Кьанди узу уьмрин гъавриъ гьаз гъахьну?
Уву имдруб кIван зиянси гъубзиди.
Дерднаъ аза, хъана яв сес гъеебхьну,
Гъача ахъли зухьна, дада, нивкIукди.

Хиял вуйиз, ухьу жара зат хьидар,
БицIиганси карсдива зу яв мухрик.
ИчIи гъахьну уву имдру йиз йигъар,
Дердну карсну аза гьамус чан мухрик.

Ккун дубхьназуз йисар кьяляхъ илтIикIуз,
Хъана рякъюз яв жигьилвал, ихь хулар.
Багьа вуйи яв назук лигуб уьбхюз,
Гьаъри кIваан уву ккуни йиз нурар.

 

 

Къизейбат Гьяжиибрагьимова
Узуз «Дада» гъапиган

Фукьан гъилицнийкIан узу шагьрариъ,
Гьялакди либхури ифи дамариъ,
Абгуз аьхир адру дадавалин сир…
Уьмрин хьадукра вуйза аьхю йисир.

МучIу дубхьнайи кIваз чуччу нур тувну,
Аллагьдин чан пайнак йизубра кивну.
Чуччун шуру «дада» кIуру гаф гъапниз,
Аьзаб кайи кIваз дарман шлуганси йиз.

Ригъди дубгну айи жил фици мархьли
ЧIиви гъапIнуш, уьмур абцIниз мянайи.
БицIи шуру апIруган «дада» текрар,
МучIу завуъ узузра кархьну хядар.

«Дада вуза!» – гъапунза табиаьтдиз,
Завуъ ничхрариз ва нирин лепйириз,
КIурнайиан жабгъурайи кIегьсиб штуз…
Гъилицунза хулаъ, кIури цалариз.

КтIубшвурайи кIван гьиссназ нефес тувну,
Нурар рагъурайи шидси, уьлдюбгъну,
Дадавалин мaнишин шураз туври,
Йиз уьмрин метлебназ жилгъа гъибихъну.

 

 

Аьбдусалам Асланов
Бабан зегьмет

Эй, фагьумсуз кас, уву фикир апIин,
Лиг, баб имиди, дугъаз гьюрмат апIин.
Бабу гъизигу зегьмет гьархиш уву,
Валлагь, аьхиратдихъ, хъугъ, мягьрум шулву.

Нагагь увхьан гъабхьундарш гьюрмат апIуз,
Баб сагъди миди, дугъаз ужуб гаф пуз,
ТIагъру мапIан, дюаь зир’ят апIуз,
Гьарган гьязурди гъуз баб рази ктауз.

Баб! АйкIан учвтIан гирами гаф!
Багьалу вухьуз, вушра учв шубуб гьярф.
Увуз му уткан аку дюн’я тувбаз
Икрам апIин, гиран макадапIан бабаз.

УрчIвуб вазли бабу чан фуниъ дюрхну,
Шубуд йисан чан мухрикан никк тувну.
Габанси яв кьяляхъ гьарган баб гъахьну,
Ликри хьайиз, уву чан униъ гъюрхну.

Уву фукьан гъапIишра бабаз гьюрмат,
Дубхну тувишра саб миллиард манат,
Гьич магьархан, лиг, вуйиз увуз миннат –
Ктипуз даршул бабан зегьметнан кьимат.

Велед, мапIан бабан назук юкIв кабаб,
Читинвалариъ ахъган, агурва баб.
Аьгъю йибхь, валлагь, даршул дердназ кабаб,
Эгер гъапIиш багъри бабан жан хараб.

Аьхю духьну, уву яв хал ккебгъиган,
Жара жвуван риш духну хулаъ аъган,
Миккиван бабу гъизигу зегьмет ликрикк,
Лиг гьа, мииливан дугъан кIваин миркк.

Ярхла мапIан бабхьан чан ккуни худлар,
Гъит жан-юкIв апIри ва алдагъри хабар.
Йисариккьан хъади гъач гъулаз дурар,
Рякъюз улариз чан багъдин йимишар.

Киву багъ зазари ккапIуз мигъибтан,
Яв абин васият жил’ин мидипан.
Баб ужагъдиъ сарна-сарди мигъитан,
Яв хпирихъди удучIвну шагьриз мягъян.

 

 

Сунаханум Исаева-Гьяжикъурбанова
Дадйир уьрхяй

Уьмрин микIлахь гьебчра йисар айи сиф,
Гизаф хъимдар му сифрахъ удрар, гьяйиф,
Магьа кабхьна дадайин кушарик йиф,
Ужи рябкъдар улариз – гъюбчIвну а диф.

Гьяйиф, дадйир ухьуз гьаргандиз гъуздар,
Уьмрин кIакнахьна умбрар ву лап уздар,
Думу кIакI варидариз шулдар мютIюгъ,
Гагь-гагь сар гьергру завуз, духьну пIямпIюгъ…

Дюн’яйиъ варитIан ухьу ккунидар,
Фицдар ухьу вушра, гьяйран вуйидар…
АпIин, велед, ккунивал бабаз ашкар,
Аьбкъинава дугъан кIваз аьхю машквар.

Имишри кIваъ дадайин гюзел лай-лай,
Ширин гаф гьяйиф мапIан дадайиз, бай.
КIваинди гъит дадайин нивкIсуз йишвар,
Кьабивализ дугъан йихь мюгькам йирфар.