Уж’вал – фукьан аьхю мяна ада му гафнаъ. Уж’вал – му инсандин рюгьнан аьгьвалат ву. Думу рябкъруб дар, амма думу гьисс апIуз шулу.

 

 

Бязи вахтари уж’вал ухьуз аьдати ляхнариъ алахъурахьуз: ужуб гафнаъ, мани лигбаъ, бицIи кюмекнаъ. Амма гьаму бицIи дюшюшарира кIваз хуш хьуз гъитру. Уву айи йишван гьава уж’вали абцIнайиган, ккундушра-ккундаршра, инсан ужур шулу.

Узуз уьмриъ хайлин ужудар инсанар алахъунзуз. Дурар чпин ляхнарииндиси, уларииндира жарадарихьан тафавутлу шула. Улар – рюгьнан гюзгю ву, дурари кучIал апIудар. Думу уларикан кидибтуз вая дурар суратназ хуз шулдар, амма дурариз лигруган, кIваз мани шулу.

Гьарсар кас уж’валин мянайиъ гьар жюрейиинди гъавриъ ахъру. Саспидари дидиз кьимат, инсандин ляхнариз дилигну тувру, хъа бязидари – гафариз лигну.

Уьмрин тажрубайи улупурайиганси, уж’вал ухьуз сифтена-сифте ухьу арайиз гъахи, тербия туву инсанари улупурахьуз. Ав, уж’вал – адашна дада ву. Гьарсар адашди ва дадайи чан веледдиз уж’вал ккун апIура. Дурари саб вахтнара веледдиз я чIуруб, я хаинвал апIудар. Хъа абана баб? Му ихь багъри инсанар фунуб вахтнара ухьуз чпин гьюрмат, хатир тувуз ва чпин фикир, фагьум ухьухъди пай апIуз гьязур ву.

Фунур касдинра кIваъ уж’вализ йишв а. Амма уж’вал гьисс апIуз ва гьар йигъан думу жарадарихъди пай апIуз варидариз аьгъдар.

Аюхю пай дюшюшариъ ужувлан ляхнар тямягьсуздар ва нефс адрудар ву. Дурар кьаст ади ваъ, хъа инсанарихьна гьюрмат ади, дурарин гъавриъ ади, кюмек ибшри кIури арайиз хура. Инсанди фукьан гизаф уж’валин ляхнар арайиз хуруш, гьадмукьан думу ужур, саламатур ва рюгьнан марццир хьиди. Уж’вал апIуз алдабгъу гьарсаб гам инсандиз гьавайиди гъюдубчIвудар. Диди инсандин рюгьнан кьувват ужуб терефназди дигиш хьуз, гъагъи дюшюшариъ кюмек хьуз, цIийи дустар агуз кюмек апIуру. Ужуб юкIв айи инсанариз жямяаьтдин терефнаан гьарган заан кьимат ва гьюрмат а.