Улихьнаси «Дагъустан» РИА-йин сайтдиъ, чпи тахсиркарвал апIурайиваликан хабар дарди, дустагъдиъ ахъу кьюр дишагьлийикан мялуматар тувнайи. Хъа улихьна йисан сар табасаран дишагьлира гьамциб дюшюшдиъ ахъну. Дугъан, чан бализ кюмек апIураза кIури, хиял вуйи. Узу фтикан улхураш, учву гъавриъ хьпан бадали, хъайи-хъайибси ктибтидиза.
Рягьимлудар, гъюдли юкIв айидар, жарадариз кюмекназ гъюрудар, гъайгъу зигрудар – йиз гъийин макьалайин игитар гьаму жюрейин хасият хъайидар ву. Бязи дюшюшариъ ужуб хасиятнура бала хуру.
Дагъустандиан вуйи Татьяна Александрова аьдати пенсионер хпир вуйи. Гъуни-гъуншйирихъди гьюлихъна лицуз гъягъюри, вари дишагьлийиризси дугъазра гьавйирикан, туканарин кьиматарикан, шагьрин хабрарикан улхуз ккуниб вуйи. Думу чан худул Катяйира арабир шад апIури шуйи. Дугъан худул, ужуб уьмур абгури, харижи уьлкйириз гъушну. БицIи вахтналан Катяйи бабаз чаз пул гьубкIри адруваликан, учв айи йишваъ яшамиш хьуз пул артухъ лазим вуйиваликан кагъаз гъибикIнийи ва дугъкан чаз кюмекназ сабцIиб пул хътапIуб ккун гъапIнийи.
«Узу худлиз кюмек вуди пул хътапIунза ва дустагъдиъ ахъунзу», – ктибтура Татьяна Александровайи. Думу терроризмдиз пулин дакьатарин кюмек апIувалин маддайиан дустагъдиъ итна.
Кьанди мялум гъабхьиганси, дугъан худул риш Сирияйиз гъушну ва гьаду-шваъ палаткйирин лагериъ яшамиш шули гъахьну.
«Узу саб вахтнара къанун чIур гъапIур, жара касдиз чIуруб гъапIур дарза. Узу гьамушваъ гьаз а? Узу фу тахсир кади дустагъдиъ итна?» – гъавриъ адарди, ишури, гьерхра кьаби бабу. Чан тахсиркарвал гьякьикьат вуйиб думу гьеле гъавриъ шуладар.
Татьяна Александрова айи тахсиркрар дюз рякъюз хру колонияйиъ гьадму маддайиан Загьра Мягьямедовара итна. Амма мициб аьгьвалатнахъна думу чан юкIв улубкьнайи бали гъахну. Загьрайин 28 йис ву. Чаз ккун гъахьи балихъди риш социальный сетариъ таниш гъахьнийи. Сифте дурари телефондиан сюгьбатар апIури гъахьну, хъасин жигьилар сатIиди паркариъ лицуз, кинойиз гъягъюз хъюгъну. БицIи вахтналан дурар сумчир апIбакан улхуз хъюгъру. Амма хабарсузди бай жара шагьриз гъягъюру.
«Акимди узуз гъапиганси, думу бицIи вахтназ лихуз гъушну. Думу кьяляхъ гъафиган, учу сумчир апIуз гьязур шулайча. Аким жара йишваъ ашра, учу сикин дарди телефондиан сари-сариз зенгар апIури шуйча. Сад йигъан дугъу узкан, кьяляхъ гъюз рякъюз чаз пул хътапIуб ккун гъапIну. Узу хътапIунза», – ктибтура Загьрайи.
Загьрайи пул хътапIубси, дугъ’ин юкIв улубкьнайи балин шил гъудубгну. Дугъхьан я зенгар, я саб жюрейинра жара хабар гъюри амдайи.
«Саб гьяфтайилан ич хулаз къанун уьбхру органарин вакилар гъафну. ВуйиштIан, думу бай Сирияйиъ айи, ва узу терроризмдиз пулин кюмек гъапIувалин тахсиркар гъапIну», – ишуз юкIв абцIну, сес гъагъиди ктибтура шуру.
Дустагъ апIувалин суддин къарар Загьрайизси, дугъан вари хизандизра гъагъи жаза гъабхьну. «Ич адаш ва дада, гъардаш, жара багахьлуйир узухьна дустагъдиз гъюз мажбур шулайивалиан кIваз лап гъагъи шулайиз», – гьяйифвал кадиси кIура Загьрайи.
Узу зиихъ гъапиганси, табасаран дишагьли Сариятра гьадрарихъди дус-тагъдиъ а. Дугъу чан бализ Сирияйиан кьяляхъ гъюз рякъюз пул хътапIну. Бай гъафундар, хъа дада дустагъдиъ итну.
Му дишагьлийир гьар жюрейин яшариндар вушра, дурарин уьмрин кьисмат саб гъабхьну. Дурар, чпин багахьлуйириз, багъри инсанариз читин йигъан кюмек апIурайи вахтна, чпизра хабар дарди тахсиркрар гъахьну.
Гьамциб дюшюшнаъ ухькан фуж вушра ахъуз мумкин ву. Гъачгъарин счетариина хътапIу пулин кьадар бицIиб вушра, думу тахсиркарвализ къанундиъ кьатI’и гъагъи жаза улупна. Гьаддиз ихтиятвал уьбхяй! Багахьлуйириз вушра, ихтибар алдарди харижи уьлкйирин банкарин счетариина, телефондин нумрйириина, шаксуз рягьимлуварин фондариз ва чарасузди тешкил дапIнайи саб ражарин рягьимлу ляхнариз пул хътапIуз гьялак махьанай.
