Аьхиримжи 1,6-2 йисарин арайиъ Дагъустандиъ цифрайин телевидение тешкил апIувализ фикир тувуз хъюгъна. Дербент шагьриъ ва Дербент райондиъ мидихъди аьлакьалу месэлйир фици гьял апIураш ахтармиш апIуз ккури, узу Жалгъан гъулаъ айи радиойинна телевидениейин станцияйин начальник Тагъи Агъаевдихъди гюрюшмиш гъахьунза.
Урусатдиъ аналог кутIубшвну адру регионар цифрайин телевиденийихъна гъювалин ляхин июлин 3-пи йигъаз планламиш дапIнайи. Хъа арайиъ гъузнайи месэлйир гьисабназ гъадагъну, аналог кутIубшвувал октябрин вазлиз гъибтну.
Дугъу къайд гъапIганси, Жалгъан гъулаъ ягъли йишв`ин дивнайи (гьюлин штун дережайихьан 720 метр зина) мачтайин ягълишин 161 метр ву. Цифрайин телевидение хьайиз, му станцияйиъ 162 кас лихури гъахьну. Гьамусяаьт душваъ имбудар 42 кас ву.
«Гьамус ляхин цIиб дубхьна. Гьар сменайиъ 3 касди ляхин апIура. 3 йигъан гъилиху ич пишекрари 4 йигъан рягьятвал гъадабгъура. Пишекрарра гизаф йисарин тажруба айидар вуйич. Гьар сменайиъ кIулин инженер, кIулин электромеханик, электромонтёр шула. Сар пишекри чаз аьгъюб чан бализра улупура. Думу жигьилиз техникайихъди аьлакьалу образованиера а. Агьалйир цифрайин телевидениейиин гизаф разиди ву. Улихьди аьхю мархь убгъруган, диф гъяйи вахтна 8-пи, 9-пи каналари Казахстандин программйир улупури шуйи. Гьамусяаьт гизафдари цифрайин телевизорар масу гъадагъна. Йирси телевизорар айидари 700-800 манатдиз вуйи блокар масу гъадагъура, ва «Триколор» антеннйир масу гъадагъайиз, дурар гъадагъуб ужу вуйивалин гъавриъ шула», – кIура ич сюгьбатнаъ Тагъи Гюльмягьямедовичди.
Му тешкилатдин пишекрар Советарин вахтари диву дараматариъ яшамиш шула. Мушваъ дурариз лазим вуйиб вари а. ИпIруб дурари гьарсари чпихьди хьади гъюра. Йиз сюгьбатчийи тасдикь гъапIганси, дурарин станцияйи Дербент шагьур, Дербент, СтIал-Сулейман, Табасаран районарихъди ляхин гъабхура.
«Дагъустандин жилин машнан кIалиб Таджикистандин жилин машнан кIалибси читинуб ву. Гьаддиз сигнал дибрисру бицIи гъуларра а. Бязи вахтари ригъди манигъ’вал апIури, сигнал дубгури шулу. Йиз фикриан, багарихьди вари инсанарин цифрайин телевидение хьибди. Дидин ери лап ужуб ву, ва диди 20 канал улупура», – давам гъапIну Т.Г.Агъаевди.
Гизаф йисари му цирклиъ ляхин апIурайи Тагъи Гюльмягьямедовичди ич сюгьбатнаъ телевидениейиан улупбаъ духьнайи дигиш`валариин гизаф учв рази вуйиб тасдикь гъапIну ва вари агьалйириз цифрайин телевидение кьабулди вуйиваликан гъапну.
