Йиз дуст, ич бай, сагъул увуз – игитриз,
Лап гьарурин юкIвар гизаф шад гъапIу.
Увкан гъахьну намуслу бай аьхириз
Табасаран халкьдин кьимат за гъапIу.
Машгьур авчи, Чювекк гъулан агьали Аьбдуллагь Сефербеговдиз бахш дапIнайи Манаф Шамхаловдин гьаму цIарар советарин вахтари мектебдиъ урхури гъахьи гьарсар табасаран шураз ва бализ кIваъланди аьгъяйи. «Снайпер Аьбдуллагь» шиърин цIарариъ ватанпервервал гужли апIру, уву табасаран халкьдин вакил вуйивали дамарариъ ифи гьялакди ва гьевеслуди жабгъуз гъитру аьжайиб кьувват айи, дурари инсан игитвалихьна, ватан бадали жан тувуз гьязурвалихьна рюгьламиш апIуйи.
Гъи ухьуз табасаран поэзияйиъ гьамцдар юкIвариъ гъати гьиссар арайиз хру, инсанарик паплар кивру цIарар гьуркIрадар. Аьбдуллагь Сефербеговдин игитвалин ирс давам апIру, абйириланмина гъубзнайи ва ифдик кибикьнайи дирбаш’вал чIиви апIурайи кьягьялар гъи ухьуз гизаф ахьуз – гьаци вуйивал гьамусяаьт гъунши уьлкейин дявдин чюллериъ гъягъюрайи гъати женгариъ чпи асланарси улупурайи табасаран жигьилари субут апIура. Хъа дурарин гьунарариз бахш дапIнайи цIарар, гьяйифки, арайиъ адар. Гъийин игитарин гьунарарра гафарин кIалбариъ, ебцIну гъизилси убзну, даимлугъдиз ядигар апIуз лайикьлу ву.
Му важиблу ляхин дапIну ккунивалин гъавриъ айидар гизаф а. Табасаран игитарикан бикIурайидар, дурарин суратар зигурайидар, дурариз мяълийир бахш апIурайидар, гьелелиг, жара халкьарин вакилар ву. Гьаци, улихьнаси Урусатдин писателарин Союздин правлениейин секретарь, урус шаир Владимир Силкинди Нурмягьямед Гьяжимягьямедовдиз, Энвер Набиевдиз, Руслан Къурбановдиз ва жара дагъустан игитариз шиърар гъидикIну. Урусатдин Игит Руслан Къурбановдиз бахш дапIнайи «Мягьячгъалайиъ гюрюш» шиъриъ дугъу ихь дирбаш ватанагьлийин чIиви сурат арайиз дубхна, дугъан инсанвал, жвуван миллетдиз чан игитвалиинди гъабхи шадвал улупна:
Гъягъюрава, хъа мухриъ убгураяв Хяд!
Гьюрмат кади лигуравуз агъсакълар,
ГъюдучIвунва дявдин цIигъян яд –
Тамарзуди ккилигуравуз дагълар.
Хъа Ингушетияйиан вуйи художник Елена Сухоруковайи гьамусяаьт Назрандиъ чав ччимдин бинайин вуйи рангариинди вая кьалмиинди каънайи хусуси метлеб айи операцияйин 50 иштиракчийин суратарин выставка тешкил дапIна. Художникдин метлеб – чан выставка жигьилариз ватанпервервалин ва ватандаш’валин тербия тувру дакьатси ишлетмиш апIувал, жямяаьтлугъдин фикриъ Урусатдин Игитарикан тарихи гьякьлувализ жаваб тувру ядигар яратмиш апIувал ву. Выставкайиз кьюр дагъустанлуйин суратарра адагъна – Табасаран райондин Мягьярягъ гъулан агьали, йикIбан кьяляхъ Кьягьялвалин ордендин сагьиб гъахьи Сагьиб Турабовдин ва Юхари-СтIал гъулан агьали Аслан Мягьямедовдин.
Художникдин гафариинди, думу му кьюрид эскрарин машариъ рябкъюрайи дугъривали, рюгьнан марццивали, дирбаш’вали ва кIван ачухъвали тяжуб гъапIну. «Мицисдар касар писвализ ва жасусвализ затра яракар хьидар, дурар зяифдар ва аьжузар уьрхюз яратмиш дапIнайидар ву… Сагьибди ва Асланди чпин уьмур фида дапIну, заан игитвал улупну, ислягь уьмур багахь апIбан бадали, чпихьан шлуб вари гъапIну. Дурарин шиклар гъяркъхъантина, дурарин уларин лигувал ва кIубан рюгьлу машар йиз уларихь гъира дийигъну ими», – ктибтнийи Елена Сухоруковайи. Художникдин гафариинди, дугъу гьамусяаьт Сагьиб Турабовдин сабсан – ччимдин рангарин кюмекниинди – сурат зигура.
Макьалайин аьхириъ табасаран художникарихьна, шаирарихьна, композиторарихьна, багъри халкьдин кьягьяларин гьунарариз жвуван цIийи эсерариъ лайикьлу кьимат тувуб ккун апIури, илтIикIураза. Закур, вахт улдубчIвган, ухьуз хъана «бицIи халкь», «зяиф тарих хъайи халкь» дарпбан бадали. Ухьу ихь гъюрайи насил жара халкьарин игитарин нумунайиинди ваъ, жвуван игитарихъан чешне бисури, тербияламиш апIбан бадали.
Шиклиъ: Е. Сухоруковайи кьалмиинди гъизигу Сагьиб Турабовдин сурат.
