Февралин 5-пи йигъан Дагъустан Республикайин Халкьдин Собраниейин председатель Хизри Шихсяидов кIулиъ ади Дагъустандин делегация, кьюбиб республикйирин арайиъ сяргьятар тяйин апIбахъди аьлакьалу ляхнар тешкил апIбаз бахш дапIнайи заседаниейиъ иштирак хьувал метлеб вуди, Грозныйдиз гъушну.

Делегацияйин дахилнаъ РД-йин министрар, парламентдин комитетарин членар, бязи районарин главйир ва гьацдар жара касар айи.

Заседание ачмиш апIури, Чечен Республикайин парла-ментдин председатель Мягьямед Даудовди къайд гъапIганси, комиссияйи Урусатдин Президентди ва Гьюкуматди уьлкейин субъектарин арайиъ сяргьятар тяйин апIбан гьякьнаан дивнайи месэла тамам апIбиин ляхин гъабхура.

Заседаниейин эвелиъ Чечен Республикайин ва Дагъустан Республикайин парламентарин арайиъ аьлакьйир тешкил апIбан гьякьнаан Йикьрарикк къул гъизигнийи.

Заседаниейин иштиракчйири интерактивный картайик сяргьятарихъ хъайи аьтрафариз гъилигну, бязи месэлйир гьял гъапIну. Гъунши районарин администрацйирин главйири гъуншйирихъди чпин наразивалар адруваликан гъапну. М.Даудовди аьлава гъапIну:

 «Ухьу сяргьятар улупурадархьа, сяргьятар улупна, ихь месэла – кьувватнаъ айи къанундиз асас вуди, сяргьятар тяйин апIбиин сатIиди ляхин гъабхувал ву».

Заседание ккудубкIбан кьяляхъ, Дагъустандин делегация Чечен Республикайин глава Рамзан Кьадыровди кьабул гъапIну.