Уву уьмриъ нумуна вучуз

 

 

Хив ва Табасаран районарин гъулариз, гъулариан шагьрариз кючюрмиш духьнайи ихь ватанагьлийириз Аьбдусемед Нюдюрмягьямедов малла ва Зилдикк гъулан имам Семедси машгьур вуйи. Дугъу чан уьмрин аьхюну пай му гъуллугъназ бахш гъапIну. Хив ва Табасаран районариъ, Дербент, Дагъустандин Огни, Мягьячгъала шагьрариъ Аьбдусемеддин иштирак’вал адарди табасаранарин машкврарин, мевлюдарин, яшлуйирин мажлисар гьеле-меле кIули гъягъюри гъахьундар.

Дугъу халуйихъан, аьхю абйир-бабарихъан, хъа гьацира 1997-пи йисан гирами гьяждиз гъушиган гъадагъу ва чав китабариан кIул’инди гъудургъу аьраб чIалнаан аьгъювалар ва гъудуркьу дикIбар гъи сан-гьисаб адрубкьан касарихьна дурукьна. Чахьна илтIикIу фунур касдизра, гьам мистаъ, гьамсана хулаъ, чаз гьуркIну айи кьат’и аьгъюваларин дарсар туври гъахьну.

Табасаран ва Хив районарин гъулариъ Аьбдусемед Нюдюрмягьямедов мусурман диндикан шиърар дикIру, дурар аьхю устадвалиинди урхру, тюрк, фарс, аьраб ва азербайжан чIалар аьгъю, табасаранарин тарихдиан жюрбежюр ихтилатар ктитру ва зигьимлу, гьякьлу инсанар ва уьмур ккуни кас вуйи. Дугъу Тюркистандин Сулеймандин табасаран чIалназ таржума дапIнайи, Мягьямад Пайгъамбар (с.а.в.) дюн’яйилан аьхиратдиз гъягъюваликан кадабгънайи риваятди Аьбдусемед Недурмягьямедовдиз яратмиш апIбан рякъюъ аьхю бажаранвал айиваликан шагьидвал апIура.

Aьбдусемед Нюдюрмягьямедов гъябгъюрайи йисан 12-пи апрелиъ кечмиш гъахьну ва багъри гъулаъ кивну.