Гьар вахтна ихь халкьдин шадлугънан мяракйир, шаирарин яратмиш’валин рякъюз бахш дапIнайи серенжемар тешкил апIбакан мялуматар ва гьацира табасаран драмтеатрин нубатнан спектакль флану йигъан, флану вахтна лезги, къумугъ, авар халкьарин театрарин дараматриъ улупиди кIуру мялуматар гъеерхьиган, кIваан гурп апIуриз. Гьаз? Ухьуз дураринубсиб театрин хал, идара адруган. Табасаран халкьдин театри чан яратмиш апIбар жара миллетдин идарайиъ гьаз улупуру? Дамарариъ халис табасаран халкьдин ифи убхьурайивалиан, йиз халкьдин ирснахъан юкIв убгурайивалиан му суал гьарган мелзниин ализ ва фикриъ айиз.
20-пи декабриъ цIийи йисаз ва 2024-2025-пи йисариз ихь республикайин бюджетдиан сан-гьисабар улупнайи «Дагъ. правда» газатдин машарик, ихь районариз фицдар дакьатар деетнайкIан кIури, гъилигза. Уларикк, Дербент шагьриъ Табасаран халкьдиз театрин дарамат дивуз 2024-2025-пи йисариз 192371,943 млн пулин дакьатар улупнайиган, хъугъай, хътакури гъилигунза. Дишлади ихь театриз регьбервал туврайи Аьлимурад Аьлимурадовдиз зенг гъапIунза. Дугъриди кIуруш, гья-йифки узу дугъаз туву хабар цIийи йисаз муштулугъ гъабхьундайи, фицики улихьна йисарин му жюрейин хабрарира думу аьсси дапIнайи. «Йиччв, йиччв гъапну кIури, ушвниъ ва мелзниин меълишин шулдар, Мейлан. Сабан саб артухъ фукIа пуз шули адарзухьан. Вари вахтназ ккилигуру, хъа вахт сабдизра, кIуруганси, ккилигурхьа, ва вахтну вари улупиди», – гъапнийи дугъу.
Гьамусди ухьуз айи театрин идара, адарди хьайиз фукIара дар, кIурубсиб ву. Театрин коллективдин, гьар йисан гагь мушвак, гагь тушвак пинйир киври, гужназ мадар апIури, швнуд-сад йис шула. КIваин апIуз ккундузуз, лезги халкьдиз СтIал Сулеймандин ччвурнахъ хъайи цIийи театрин хал тикмиш гъапIиган, ухьуз дурарин йирси театр тувнийи.
Табасаран театр РД-йин Правительствойин къарарниинди 2001-пи йисхъан мина арайиз гъафну. Думугандиз бабан чIалниинди вуйи спектаклар Хив ва Табасаран районарин культурайин хулариъ диври гъахьнийи.
Ав, театр халкьдин юкIв, тарих ва ирс ву. Гъи ихь театриъ лихурайи бажаранлу гьарсар артистди халкьдин рюгь ва тарих чIиви апIбаъ хайлин зегьмет зигурайиб гьаруриз мялум вухьуз. Думу гьаци вуйиб ихь театри гьар йисан жюрбежюр конкурсариан, выс-тавкйириан, серенжемариан хурайи гъалибвалин йишвари ва гьацира дагъустандин халкьарин театрарин арайиъ кIули гъубшу конкурс-фестивалиъ Эльмира Аьшурбеговайи дибикIнайи «Эвелин дих» драмайи 1-пи йишв гъадабгъувалира субут апIура.
Гъит дапIнайи ният ва тувнайи гаф сяаьтнаъ абхъри. Улупнайи дакьатар йиш’вина рукьри ва ихь халкьдизра, миди вуйи халкьаризси, театрин хусуси дарамат ибшри!
