Январин 25-пи йигъан Урусатдиъ Студентдин йигъ къайд апIуру. Жараси дидиз Татьянайин йигъра кIури шулу. Думу йигъ 2007-пи йисан Урусатдин тарихи йигъарин сиягьназ гъадабгъну, хъа кьюд йис улихьна, яна 2005-пи йисан 25-пи январиъ, РФ-дин Президентдин къарарниинди му йигъ Студентдин йигъси къайд апIувал тяйин гъапIнийи. Амма тарихдиъ му йигъ 18-пи аьсрихъанмина къайд апIури аьдат а.
Аьдатарихьан учура ярхла шуладарча. Ва, учву шагьидар шулайиганси, гьарсаб машквриз тялукь вуйи макьал-йирра гьязур апIуз мумкинвал абгурача. Къайд апIуз ккундузузки, ужудар аьгъювалариинди урхурайи, спортдин, культурайин, жямяаьтлугъдин, экономикайин, волонтервалин цирклариъ хъуркьувалар улупурайи ихь студентар гизаф а. Ва дурарикан сар Сара Аьлимягьямедовара ву.
Режиссер Леонид Гайдайин машгьур комедияйик кайи «студент, спортсмен ва успагьи риш» кIуру гафар ихь Сарайизра лайикь ву. Ужуб, гъяни юкIв айи, начар апIру, амма гьаммишан шаду инчI кайи ва чав урхурайи колледждиъ гьюрмат гъазанмиш дапIнайи Сара Аьлимягьямедова Дербент райондин Чинар гъул’ан ву. Дугъан адашна дада Заурбег ва Гьялимат Аьлимягьямедовар Чинар гъулаз Табасаран райондин Туриф гъул’ан кючмиш гъахьидар вуйи.
Сарайи Чинар гъулан мектеб заан аьгъювалариинди ккудубкIну. Гьамусяаьт дугъу Санкт-Петербург шагьриъ гьюкуматдин фельдшерарин медицинайин колледждин 2-пи курснаъ урхура. Сабпи курсра ва кьюбпи курснан 1-пи семестра Сарайи вари хьубариз ккудукIну.
Дугъаз чав кадабгънайи пише лап кьабулди ву. Колледждиъ урхуб ккудубкIиган, шуру медицинайин вуздик кучIвуз ният дапIна.
«Йиз кIваъ айи метлеб – колледж уьру дипломдиинди ккудубкIну, медицинайин вуздик урхуз кучIвну, гележегдиъ ужур духтир хьувал вуйиз. Вуйиш, хирург-духтир духьну ккундийзуз. Яшайиш хьпаъра, урхбаъра читинвалар адарзуз. Эгер улихь кьаст дивнаш, аьгъювалар гъадагъуз читинди дар. Гьамусяаьт йиз аьхю баб Дестегюл ва Гьяжизал аба Туриф гъулаъ яшамиш шула. Бабу узуз кми-кмиди зенгар апIури шулу. Дугъу узуз жвув аьхю шагьриъ дюзди гъахбакан насигьятар тувру. Хьадну чахьна гъулаз дих апIуру. Дугъу чаз капельниц-йир ва рубар дивну ккуниваликан кIури шулзуз. Узу йиз баб сагъ апIурза. Сабсана, узу дагълу риш вуза. Йиз ватан Табасаран вуйиз. Бабан насигьятар узу гьаммишан кIваъ уьрхюрза. Дугъу саб вахтнара чIуруб пидар. Дурар гьархуз мумкинвалра адарзуз, гьаз гъапиш узу Санкт-Петербургдиъ ич ккуни эмдихь – Зулфикьарихь яшамиш шулаза. Гьаддиз узу йиз абайин хулаъ айиганси гьисс апIураза. Хъа багъри инсанар багахь хьайиган, дурарикан кюмек бихъруган, кIваъ айи мурад-метлебарихъ хъуркьуз шулу», – кIура ич сюгьбатнаъ Сара Аьлимягьямедовайи.
Аьгъювалар гъадагъбалан гъайри, Сара шашкйир уйнамиш апIбиин ва литературайиин машгъул ву. Мисалназ, гьеле мектебдиъ урхури имиди думу гьарган табасаран чIалниинди шиърар урхбан конкурсариъ иштирак шуйи. Улихьнаси Сарайи чпин колледждиъ шашкйир уйнамиш апIбан талитариъ сабпи йишв гъадабгъну ва шагьрин вузарин ва ссузарин арайиъ кIули гъуху талитариъ финализ удучIвну. Гьадушваъ Сара кьюбпи йишван сагьиб гъахьну. Мектебдиъра ва гьамус колледждиъ урхурайиганра Сара хайлин гьюрматнан грамотйириинди ва дипломариинди лишанлу дапIна.
Гьамцир ву ихь Сара – фикирлур, дирбашур, ужуб хасият хъайир, чан метлебарихъ хъуркьуз дурумлуди гамар алдагъурайир, бажаранвал ва гьевес кайир. Чпин колледждиъ дугъу хайлин ихь дагълу шубарихъди мани аьлакьйир уьрхюра. Студент вахтар варитIан ужудар ву, кIури шулу, хъа Сарайин гьеле вари улихь хьми.
Гьамусяаьт Сара дарсариъ а. Саб гьяфтайилан дугъан больницайиъ практика ккебгъру.
Сара, яв кIваъ айи хиялар кIулиз удучIври. Уву яв мурад-метлебарихъ хъуркьрубдиин ва гележегдиъ ихь уьлкейиъ сарсана ужур медсестра вая ужур духтир артухъ шлувалиин инанмиш вуча.
