Табасаран райондин жигьиларин гизаф гъуллугъар гьуркIру центрин вакилар райондин жямяаьтлугъ уьмриъ, РД-йин жигьиларин ляхнариз лигру министерствойи тешкил апIурайи серенжемариъ, гьацира республикайиъ ва дидин гъирагъариъ кIули гъахурайи жигьиларин жюрбежюр форумариъ, илимдинна тажрубайин конференцйириъ жанлуди иштирак шула.
Мюгьтал хьуз ляхин адар, жямяаьтлугъди вари вахтари жигьилар айи аьгьвалатнакан, дурарин гьялнакан фикир апIури гъахьну, гьаз гъапиш жигьилар фунуб уьлкейинра гележегдин тикилишчйир, дидин «закур» ву.
Аьхиримжи вахтари яшлуйирикан, гьамусдин жигьилар чпиз ккуниб апIрудар, лап темпелдар, я чпикан, я халкьдикан фикир ктрудар ву кIури, гафар ерхьуру. Му фикир дюзуб дар.
Ихь уьлкейин гьюкум гьаммишан егин, гьевеслу жигьилариз политикайин ляхин гъабхбаъ кюмек тувуз чалишмиш шула. Урусатдин субъектариъ жигьиларин парламентар арццра, душвариъ гележегдин политикар ва уьлкейин руководителар гьязур апIура. Гъи баяр-шубариз мектебдин парта-йихъ хъмиди мектебдин парламент, самоуправление фтиз кIуруш аьгъю шула, ва живанари дурарин ляхниъ лап аьхю иштирак’вал апIура.
Табасаран райондиъ Муници-пальный жигьиларин центр 2015-пи йисан тешкил гъапIну. Думу идарайин асас вазифа – гьюкуматдин жигьиларин политика уьмриз юрутмиш апIувал ву.
Жигьиларин центрин кIулиъ айи Руслан Керимовдин гафариинди, Табасаран райондиъ жигьиларин жюрбежюр тешкилатар ляхник кирчна: ТОКС, Юнармия, волонтерарин десте, МГЕР («Саб вуйи Урусат» партияйин Жигьиларин гвардия).
Му тешкилатди гьар йисан 50-тIан артухъ эдеблувалинна ватанпервервалин, экологияйин, фагьум артмиш апIбан, спортдин ва гьацдар жара серенжемар тешкил апIура . Гьацира гьар йисан Табасаран райондиъ жигьиларин аьхю форумар, акцйир, флешмобар, конкурсар кIули гъахура. Жигьиларин центриъ жюрбежюр гьюжатар, бягьсар гъахру клубар а, жямяаьтлугъ проектар дюзмиш апIуз жигьилариз кюмек тувру мастер – классар гъахура.
Ккудубшу йисан райондин культурайин, спортдин ва туризмдин управлениейихъди сатIиди, Гъалибвалин 77 йис хьпаз ва Марат Рягьметовдин рюгьяриз бахш дапIну, «СатIиди ужу ву» проектдиз асас вуди спортдин серенжемар кIули гъухьну. Дурариъ 5000-тIан артухъ мектебариъ урхурайидар ва жигьилар иштирак гъахьну. Ургур чвуччвунна сар чуччун гъалайиин СВО-йин иштиракчйирихъди кIули гъубшу гюрюшдиъ Урусатдин аьхю пайдагъ гьатIабццну, Урусатдин президентдиз ва Урусатдин армияйиз кюмек вуйи акция ва «Учу Урусатдихъанди вуча» кIуру флешмоб кIули гъухну.
Гъубшу йисан октябрин вазли-хъанмина «СатIиди ужу ву» кIуру оперштабдихъди сатIиди «Эскриз посылка», «Эскриз кагъаз» кIуру акцйир кIули гъахура.
«Учу жара терефарианра хайлин серенжемар кIули гъухунча, ва дицдар серенжемар гъахувал аьдатнаъ ипнайич. Месела, коррупцияйихъди женг гъабхбан йигъахъди аьлакьалу вуди прокуратурайин гъуллугъчйирихъди жигьиларин гергми столар тешкил апIувал, ЦIийи йисахъди аьлакьалу серенжемар гъахувал ва жарадар. Мисалназ, «ЦIийи йис – гьарсаб хулаз» акция гъабхурайи вахтна Аяз абайин палтар алахьнайи волонтёрари, райондиъ лицури, баяр-шубариз пешкешар туври гъахьну, асас вуди майиф бицIидариз ва цIибди тяминвал айи хизанариан вуйи баяр-шубариз.
ЦIийи йисанра учу райондин жигьиларихъди вуйи ляхин хъана жанлуди гъабхуз чалишмиш хьидича», – къайд гъапIнийи ич сюгьбатнан аьхириъ Руслан Керимовди.
