Гюльнара Мягьямедова

 
8-пи сентябри «Дагъустан» РИА-йин конференцйир гъахру залиъ «Гьякьлу Урусат» партияйин региондин отделениейин вакилари «ЖКХ-йин кьиматар ва гьякъи» кIул тувнайи пресс-конференция кIули гъубхну. Журналистарин улихь РД-йин Халкьдин Собраниейин председателин заместитель, «Гьякьлу Урусат» партияйин региондин отделениейин cоветдин председатель Камил Давдиев, «Гьякьлу Урусат» партияйин региондин отделениейин советдин член, РД-йин Халкьдин Собраниейин багахь хьайи жигьиларин парламентдин комитетдин председатель Агъалар Юзбегов, РД-йин Халкьдин Собраниейин жигьиларин парламентдин член Тамара Аьгьмадова удучIвну гъулхнийи.

Аьхиримжи йисари ЖКХ-йин игьтияжарихъан туврайи кьиматар гьяракатниинди за шула. 2027-пи ва 2028-пи йисарира кьиматар за апIиди. Гьаму йисан сабпи ражари вуди йисандин арайиъ кьюб ражари кьиматар за апIура. Нубатнан ражари 2026-пи йисан 1-пи октябрилан башламиш дапIну кьиматар за апIбанди ву. Дупну ккундуки, октябрин вазлилан башламиш дапIну кьиматар за шулайи регионарин арайиъ Дагъустан Республика 2-пи йишв’ин ал: Ставрополин крайдиъ кьиматар 22 процентдин, Дагъустан Республикайиъ 19 процентдин за апIбанди ву.
Камил Давдиевди гъапиганси, гъийин йигъаз вуйи кьиматарикан улхуруш, уьлкейин уьмуми улупбарихь тевну, ихь республикайиъ ЖКХ-йин кьиматар варитIан цIибди ву, хъа гьисабназ гъадабгъуб лазим вуки, маважибаринра, пенсйирин кьадарра республикайиъ варитIан цIибди ву.

 
«Эгер ЖКХ-йин кьиматар вари уьлкейиъси за апIбакан улхуруш, пенсйирра, маважибарра вари Урусатдиъ барабардар духьну ккунду», – гъапнийи депутатди.
Камил Давдиевди къайд гъапIганси, «Гьякьлу Урусат» партияйи Государствойин Думайиз йишвариин кьиматар за апIбаз аькси къанунар кьабул апIбан месэла адабгъна. Коммунальный цирклар чарасуз цIийи алаъбан дюшюшар ктарди, муниципалитетариъ индексацияйин дережатIан артухъ кьиматар за апIуз гъидритуб; 1-пи октябрилан кьиматар за апIуз адагънайи планар батIул апIуб; йисандин арайиъ саб ражаритIан артухъ кьиматар за апIуб гъадагъа апIуб; регионариъра, йишвариъра кьиматар за апIбан месэла Государственный Думайихъди албагуб.

 
«Гьякьлу Урусат» партияйи 1-пи октябрилан ЖКХ-йин кьиматар за апIбаз аькси вуйидарин къулар уч апIура.
Ихь республикайиъра 15 агъзурилан зиина касди къулар дизигнайи кагъзар гьязур дапIна. Хъа вари Урусатдиъ саб миллионтIан артухъ ватандашари къулар дизигнайи кагъзар уч дапIна.
«Гьякьлу Урусат» партияйи ЖКХ-йин кьиматар айиси гъитуб тIалаб апIбахъди сабси, ЖКХ яшайишдин циркил вуйивализ дилигну, думу уьлкейин яшайишдинна экономикайин политикайиз илтIибкIну ккуниваликанра кIура. ЖКХ гьюкуматдин месэла ву, ва дидхъан гьюкуматди жавабдарвал дубхну ккунду. Эгер думу фу гаф ву кIури гьерхиш, думу ЖКХ-йин циркил бязи касарин эйсивалиан адабгъну гьюкуматдин ихтиярназ тувуб ву. Жара жюрейиинди думу ЖКХ-йиз кюмек тувуз ва артмиш апIуз думу хьибдар.