Гюльнара Мягьямедова
Августдин 27-пи йигъан Дагъустандин районариъ ва шагьрариъ участокарин сечкйирин комиссйирин 5 агъзуриинакьан членар сечкичйирихъди мялуматар тувбан ляхин апIуз хъюгънийи. Магьа думу «Информ УИК» проект уьмриз кечирмиш апIрудари чпин ляхин 6-пи сентябри ккудубкIну.

Проектдин метлеб, аьдати агьалйириз сечкйирикан мялуматар тувубси, гьарсар касдин фикрар, арайиъ айи суалар аьгъю апIубра вуйи.

 
Думу йигъари избиркомдин шикил (логотип) кайи лизи чантйир ва мялуматар тувру кагъзар хьайи инсанар кючйириъ алахьуйи. Дурар участокарин сечкйирин комиссияйин членар вуйи. Проектди вари республика гъибиснийи.
Участокарин сечкйирин комиссйирин членари, ватандашарин квартирйириз, хулариз гъягъюри, сечкичйирин суалариз жавабар туври, дурар гъаврикк ккаъбан ляхин гъубхну. Агьалйирин хулариъси, гизаф кьадар ватандашар гъаврикк ккаъбан бадали, комиссйирин членари карханйириъра, урхбан заведенйириъра гюрюшмишар гъухну.

 
Аьхю яшнан инсанариз, зегьметнан ветеранариз чпи гьяспикк ккауб гизаф важиблу ву. Ветеранари чпин зегьметнан рякъкан, чпин жигьил вахтари сечкйир кIули гъягъбакан ктибтури, чпихьна айи гьюрматназ разивал улупури гъахьну. «Информ УИК» гьарсар сечкичийихьна айи гьюрмат улупурайи проект гъабхьну.

 
Сентябрин 4-пи йигъан Проектдин дахилнаъди РД-йин сечкийин комиссияйин председатель Мягьямад Дибиров Дагъустандин гьюкуматдин университетдин студентарихъди гюрюшмиш гъахьнийи. Дурарин арайиъ гъубшу сюгьбатнаъ Мягьямад Дибировди РФ-дин Федеральный Собраниейин Государственный Думайиз ва гьацира Дагъустан Республикайин миржибпи дих апIбан Халкьдин Собраниейиз депутатар ктагъбан сечкйирикан, гьисабназ гъадагънайи кандидатарикан, политикайин партйирикан ва сечкйирин объединенйирикан ктибтнийи.
Серенжемдин иштиракчи, университетдин тарихнан факультетдин 1-пи курснан студент Къурбанов Мягьямадди ич сюгьбатнаъ гьамци гъапнийи: «Цци йиз 18 йис тамам гъабхьнийиз. Узу сабпи ражари сечкйириъ иштирак хьпанди вуза. Гьелбетда, сабпи ражари апIру ляхни кIвак гъалабалугъ кипру. Гьаму серенжемдиъ студентари чпи сес тувру участок фици абгуруш, чпиз фицдар ихтиярар аш, суалар тувнийи. Республикайин Избиркомдин кIулиъ айири учу лап ужуди гъаврикк ккаъну. Дугъу гъапиганси, гьаму сечкйири, вари уьлкейинси, ихь региондинра гележегдиъ артмиш’валин рякъ ккивди. Гьаддиз гьарсар сечкичийи, иллагьки жигьил насли, чпин ватандаш’валин буржи тамам дапIну ккунду. Сюгьбатнан аьхириъ учуз сечкйирикан мялуматар тувру кагъзарра пай гъапIнийи», –гъапнийи Мягьямадди.

 
КIваина хурача: Да-гъустан Республикайиъ 18-20-пи сентябри Госдумайиз, Дагъустандин Халкьдин Собраниейиз ва муниципальный 88 кампанияйиз депутатар ктагъбан сечкйир кIули гъягъиди. 1,7 миллион сечкичийихьан гьарсарихьан чпиз улупнайи 1726 участокдикан сабдиъ сес тувуз хьибди.
Региондиъ сечкйирин ляхниин гюзчивал гъабхуз 4 агъзур касдикан ибарат вуйи десте тешкил дапIна. Дурарихъди аьгъювалар тувбан ляхин дубхна.

 
Гьацира Дагъустандиъ «Ростелекомдин» бинайиин Жямяаьтлугъ гюзчйирин центр ляхник кипди. Пишекрарихьан техникайин кюмекниинди участокариъ айи аьгьвалат йишвнура, йигънура гюзчиваликк гъибтуз ва гюзетмиш дарапIрайи дюшюшар вахтниинди арайиан адагъуз хьибди.

 
Сечкйирин ляхниина кандидатар улупуз хъюгъхъанмина сесер гьисаб апIайизкьан сечкйирин кампанияйин ляхниин гюзчивал гъабхру юристар, политологар, социологар жалб дапIна.

Гьюрматлу ватандашар! 18-20-пи сентябри ичв ватандашвалин буржи тамам апIуз гъачай, ичв сес учвхъанди жарари тувуз мигъитанай.