Урусатдин Федерацияйи, Донецкдин ва Луганскдин халкьдин республикйир Украинайин нацистарин аьзабнаккан азад апIбан бадали, мялум гъапIу хусуси метлеб айи дявдин операция ккебгъхъанмина магьа саки сад йис шула. Думу операция ккебгъруган, дявдин женгар шлуваликан саризра хабар адайи. Гьаму вахтнан арайиъ Урусатдин кьушмари хайлин гъалибвалар гъадагъну. Урусатдин армияйин кьувват аьхюб вушра, ригъ алабхъру терефнан саки вари уьлк-йири, США-йи, Урусатди гъабхурайи дявдин операцияйиз чпин аьксивал улупури, Украина яракьдихъди бегьемди тямин апIура.
Экспертарин фикриинди, дявдин женгар яркьу сяргьятариин гъахурайивалиан Урусатдин эскрарин кьадар гьубкIри адрувализ лигну, ккудубшу йисан 21-пи сентябриъ ихь уьлкейиъ бегьем дару мобилизация мялум гъапIнийи. Натижайиъ Урусатдин армия 300 агъзуриинакьан эскрариинди артухъ гъабхьнийи. Гьелбетда, контрактдиинди дявдин гъуллугънаъ айидариз лазим вуйи алабхьруб, ипIруб бегьемди ашра, тазади армияйин жергйириз гъафидариз техникайин, ипIрубдин, алаб-хьрубдин кьитвал гъабхьну. Хъа далу терефнаъ айи агьалйири – бизнесменари, гьюкмин кIулиъ айидари, аьдати зегьметкешари Ватандин маракьар уьрхбахьан чпира ярхла дарувал улупуз хъюгъну. Рягьимлувалин ляхнарикан газатдин машариъ хайлин гъибикIунча. Рягьимлувалин ляхнарра жюрбежюрдар шулу, гъийин макьалайиъ узу мюгьтал гъапIу саб ляхникан ктибтуз ккундузуз.
Гьаму улихьна йигъари, ич редакцияйиъ лихурайи журналист риш кьюб ишикI айи пакет хьади ляхниз гъафнийи. «Аьхю пакетдиъди ляхниз фу хурава?», кIури, дугъаз суал тувунза. «50-пи уьлчмейин 2 жут берцйир», – жаваб туву Наргизди. Дугъкан берцйир гьапIрудар вуш, ихтилат апIуб ккун гъапIнийза.
«Гьямусяаьт Украинайиъ кIули гъябгъюрайи хусуси метлеб айи дявдин операция-йиъ йиз багахьлуйирра иштирак шула. Лап кми-кмиди даршра, бязиган дурари узузра бикIури шулу. ЦIийи йис улубкьайиз улихьна Украинайиъ хусуси метлеб айи дявдин операцияйиъ иштирак шулайи ич эмейин бали узуз гъибикIну: «Гьамусяаьт кьюрдун вахт вушра, узухъди гъуллугъ гъабхурайи урус бай гъячIяргъю кроссовкйир алди лицура. Армияйиъ эскрарин тяминвал харжиб дар, хъа гьадму балин ликарин аьхюшназ гъилигу алахьрудар адар. Дугъан ликриин алахьрудар 49-пи уьлчмейин ву. Гьадму ич дус-тран язухъди вузуз, пулра хътапIурза, жан чи, эгер увхьан шулуш, Дагъустандиъ гьадгъан ликариин улуршру уьлчмейин берцйир дирхрур аш, масу гъадагъуз мумкинвал абг». Гъардши гьамци гъапиган, кIваз аьзаб гъабхьнийиз. Дишлади зенгар апIуз хъюгъюнза. Улихьнаси ихь эскрариз Табасаран райондиан рягьимлувалин кюмек хътапIруган, ихь табасаранжвуву гъидирху берцйир хътаувал кIваин гъабхьнийиз. Табасаран райондин администрацияйиз зенг гъапIнийза, душв’ан узуз Куркакк гъулан советдин телефондин нумра хътапIнийи. Гьадму нумрайиз дих дапIну, берцйир дирхрурихьна йиз тIалаб рубкьувал ккун гъапIнийза. Сад йигълан думу касди, узуз телефондиан дих дапIну, чпи 45-пи уьлчмейиинатIан берцйир дирхрури адруваликан гъапнийи.
Хъа гьамус, ликар даргъну, гъячIяргъю кроссовкйир алахьну дявдин женгнаъ айи урус бай кIваълан гьархрадайиз. Берцйир агувал давам апIурайза.
«Табасарандин нурар» газатдин сар ужур дуст а – Жабир Мягьямедов. Думура ликариин алахьрудар дихрударихъди таниш ву. Йиз тIалабнакан гьадгъазра мялум гъапIнийза. Дугъура Мягьячгъалайиъ ликариин алахьрудар дирхру карханайин телефондин саб нумра хътапIнийи. Гьадму нумрайиз дих гъапIиган, карханайин вакили чпин ликариин алахьрудар дирхру гъуллугъчйир ЦIийи йисандин тятIилариз деетнайиваликан гъапнийи. Гьаци вушра, гьар йигъан зенгар апIури гъахьунза. Январин 4-пи йигъазкьан дурарин телефон кутIубшвнайи, дидхъантинара телефон гъадабгърур адайи. 9-пи январиъ телефондин зенгназ «гьай» гъапнийи. Телефондихъан узухъди улхурайири, закур складдиъ аш лигурза дупну, хъайигъан гвачIнинган дих апIувал ккун гъапIнийи. Йиз зенгар апIувал сад йигъанра сикин гъапIундарза. Кьюд йигълан, складдиъ 50-пи уьлчмейин 2 жут берцйир айиваликан гъапнийи. Гьамци кьюд жут берцйирин пул хъадапIну, дурар магьа узухьна хъуркьна. Берцйир гизаф манишин ка-йидар дар, посылкайиъ ужудар мани атIнарра ивурза, саб уьлчмейин аьхюди вушра, мани атIнарилан алахьуз ужуди хьибди. Гьамус СВО айи йи-шваз гъягърур дагну, гьаму берцйир хътаъбанди вуза», – гъапнийи йиз гъарашугъди.
Чухсагъул, Наргиз, уву гъизигу зегьметназ.
Эгер ихь арайиъ гьаму йиз гъарашугъси жара касдин аьзаб чанубси кьабул апIру, ужуб юкIв айи инсанар артухъ айиш, дюн’я ислягь, мублагъ хьибдийи.
Гьамусяаьт, Ватандин маракьар уьрхюри, СВО гъябгъюрайи йишваъ айи ихь эскрариз далу терефнаъ айи ватанагьлийири чпин тереф уьбхюрайиваликан, гьаммишан чпикан фикир апIурайиваликан, гъалибвал гъадабгъну, дурар чпин хизанарихьна кьяляхъ гъювализ ухьу ккилигурайиваликан аьгъяди ккунду.
