Улихьганси дарди гьамус дишагьлийиз урхбаз, аьгъювалар гъадагъбаз, жвуван закурин йигъ бадали вая хизан-кюлфетдин мадарнан гъайгъушнаъ ади баркаллу зегьмет зигру пишекарвалин цирклиъ лихбаз абйир-бабарин ва жилирин терефнаанра амин дапIна. Ва гъи гизаф дишагьлийири жюрбежюр цирклариъ заан хъуркьувалар гъазанмиш дапIна. Дурарин цIарнаъ, гьелбетда, табасаран дишагьлийирра а.
Гъийин йиз макьала ихь ватанагьли Аида Аьлимирзаевайикан вуйиз. Йиз дугъахъди гъабхьи сюгьбат исихъ туврача.
– Аида Жамалудиновна, сифте газат урхурайидариз увкан жикъи мялуматар тувувал ккун апIураза.
– Узу 1995-пи йисан 20-пи декабриъ Дагъустандин Огни шагьриъ Жамалудин ва Багьарат Рамазановарин хизандиъ бабкан гъахьунза. Ич арха-бина Табасаран райондин Жвулли гъул’ан ву. 2013-пи йисан уьру аттестатдиинди ва гъизилин медалиинди Дагъ. Огни шагьрин 3-пи нумрайин мектеб ккудубкIунза, хъа 2017-пи йисан ДГУ-йин «Гьюкуматдин ва муниципалитетдин управление» направлениейиан сифте бакалавриат, хъасин 2019-пи йисан магистратура уьру дипломдиинди ккудубкIнийза.
Сач хьадну, аьгъюваларин рякъ давам апIури, Москва шагьриъ РАНХиГС-дин цифровой трансформацияйин ва цифровой экономикайин компетенцйирин ва технологияйин курсариъра жвуван пишекарвалин дережа за гъапIунза.
– Му аьгъювалар гъи фуну ляхниъ ишлетмиш апIурава?
– 2019-пи йисхъан мина гъийин йигъазкьан РД-йин «ИКЦ» ГБУ-йин мялуматаринна чап апIбарин агентствойин отделин стратегияйин проектаринна мялумат жигьатнаан хатIасузвал уьбхбан кIулин пишекарди лихураза. Мидланра савайи, 201-пи йислан мина «Урусатдин Аьжалсуз полкнан» региондиъ айи отделениейин вакилра вуза.
– Пишекарвалин рякъюъ фицдар хъуркьувалар айив?
– Гъийин йигъаз экономикайинна идара апIбан, социологияйинна политикайин цирклариан 40-тIан артухъ илмин макьалйир чап дапIназа. Гьеле урхури имиди, гьам ихь уьлкейиъ, гьам региондиъ гъюгъюрайи конкурсариъ, олимпиадйириъ, фестивалариъ, конференцйириъ иштирак шули, гизаф ражари жюрбежюр дип-ломарин, грамотйирин, кубкйирин, чухсагъул мялум апIбан кагъзарин сагьибра гъахьунза.
– Узуз хабар айиганси, цIиб улихьнаси яв СМИ-йин электронный энциклопедияйин «Дагъустандин ччвурар» кIуру проект Дагъустан Республикайин Главайин грантарин проектарин гъалибчи гъабхьну. Думу проект фтиз бахш дапIнайив?
– Ав, ктабхъу йисан 29-пи декабриъ Сергей Меликовди республикайин Главайин грантарин проектарин конкурсдин гъалибчйирихъди гюрюш кIули гъубхнийи ва душваъ узура тялукь дипломдиинди лишанлу гъапIнийи
Проектдин асас метлеб – аргъаж шулайи наслариз дагъустан халкьарин тарихдикан, чIалнакан, медениятдикан, къанун-къайдайикан, саб гафниинди, вари терефарихъанди ва пишекарвалин цирклариъ ватанпервервалин хатI ади ихь уьлке улиъ ва заан дережайиъ уьбхбаъ чпин лайикьлу пай киву касарикан, дурарин уьмрикан ва яратмиш’валин рякъкан мялуматар туври, дурар марцциди фикриъ уьрх-баз кюмек тувувал ву. Проект кIулиз адабгъури, СМИ-йин жюрбежюр дакьатариъ 200-тIан артухъ макьалйир чап апIидиза. Гьадму гьисабнаан, гъи Ватан ва дидин закурин гележег бадали Украинайин мулкариин гъябгъюрайи хусуси метлеб айи дявдин операцияйиъ иштирак шули, чпин уьмрар фида гъапIу игитариканра. Гъит ватанпервервалин хатI уьбхюрайи инсанар ихь жигьил наслариз нумуна ишри, ва дурариз, фтиинди ва шлиинди ухьу дамагъ ва фурс апIуруш, аьгъю ибшри!
– Му ляхин кIули гъабхуз увуз шли вая фти кюмек тувра?
– Саб гъапиб, фициб ва фунуб ляхин-карнахьна вушра жвуван аьшкь ва гьевес ади ккунду. Кьюб гъапиб, гьадму аьшкь ва гьевес ляхниъ ишлетмиш апIуз гевюл ачухъ апIру, жандиз гьавйир ва манишнан ялав тувру хизан-кюлфет лазим ву. Гьаму терефнаанра узу бахтлу кас вуза. Йиз уьмрин юлдаш Исламдихъди (дугъу Урусатдин оборонайин министерствойин КIулин яшайишдинна коммунальный управлениейин Астрахань шагьриъ айи филиалиъ юристди ляхин апIура) кьюр велед тербияламиш апIури, хушбахт уьмур хъапIрача. Гъит гьаруриз уьмриъ чаз ккуниганси туври!
– Интервью тувбаз аферин, Аида Жамалудиновна. Газатдин редакцияйин терефнаан гъалибвалин йишв гъадабгъувал увуз кIваантIан тебрик, хъа ляхниъ заан хъуркьувалар хьуб ккун апIурача.
