Учу газатдин улихьна вуйи нумрайиъ мялум гъапIганси, январин 25-пи йигъан Дагъустандин кIулиъ айи Сергей Меликовди республикайин агьалйирин суалариз «прямой эфириъ» жавабар тувди.

 

 

Гъийин йигъаз «горячий линияйиз» республикайин кIулиъ айириз тувуз агъзуртIан артухъ суалар, илтIикIувалар дуфна.

ВаритIан гизаф суалар агьалйир газдихъди тямин апIбан, региондиъ рякъяр тикмиш апIбан, ЖКХ-йин месэлйириз бахш дапIнайидар ву.

Республикайиъ агьалйириз туврайи медицинайин кюмекнакан, образованиейин цирклиъ гьял дарапIди гъузрайи месэлйирикан, гизафси гъулариъ бицIидарин багъар ва мектебар тикмиш апIбакан, образованиейин идарйир мялимарихъди тямин апIбаканра гизаф суалар дуфна.

Суалар Дагъустандин вари терефариан гъюра: Мягьярамкент райондилан гъадабгъну, Нугъай райондиинакьан. Суалар тувбаъ республикайин вари шагьрар ва районар иштирак шула. Къайд апIувал лазим вуки, респуб-ликайин гъирагъдиъ яшамиш шулайи агьалйирира кмиди суалар хътаура.

КIваин апIурача, эгер учвуз региондин главайиз суал тувуз ккундуш, лихру йигъари гвачIниндин сяаьт 9-диан хябяхъдин сяаьт 6-диз телефондин 98-90-74 нумрайиз дих дапIну, суал тувай, ясана ичв суал VoprosMelirovu.ru. портализ хъадапIай.

«Прямой эфир» республикайин телеканалари ва Главайин ТГ-каналиъ улупиди.