Расмия Аьшурбегова
Ягъур ибшри, йиз бай!
Ягъур ибшри, йиз бай, гъарах,
Учв’ин ал гъи читин нубат.
Дамагълуди уьбх яв яракь,
Гъир’ятлуди алдапI бабат.
Гъи дадайин юкIв ву назук,
Сагъ-саламат гъач ихь гъулаз.
БикIуз ккундиз увуз кIажук:
Яв ликар’ин гъач ихь хулаз.
Бабан юкIв апIина ислягь —
Уву адру уьмур дар ву.
Дамагъ кади гъача кьяляхъ,
Бабан дюаь яв гьякал ву.
Багъир Ражабов
Ахсрар
Ахсрар ккивну хуш дагъларигъ,
Дагъдин кIакIар ургура.
Гъушар, гъюжран адру жандиъ,
Уткан, хуррам рагура.
Элиз варлу суфра ккипра
Деврин фараш цIирари.
Йишван мучIу перде кабхьра
ГвачIниндин мерд ахсрари.
Дюн’яйиъ саб лампа кабхьра
ГвачIниндин хуш ахсрари.
Дявдин пис мукьар рагъура
Уьмриин шад мургари.
Аьсрин жигьилвал улубкьну,
Уьмрин ахсрар рякъюра.
Тарихнан жилвар дидисну,
Таза шавгьар либцура.
Сибиржат Рашидова-Къягьриманова
Рягьмат ибшри увуз, игит!
Жини мюгьюббат ипну кIваъ.
Домбассдиан гъафундарва.
Метлеб ади Ватан уьбхбаъ,
Ихь гележег улдубшвунва.
ЙибтIну яснан кIару чухта.
Хъабхьну кIулихъ харайин шал.
Айиз палтар дирхру уста,
Ккебгъунза чаз йиз сир-ишал.
Бирхурайиз палат дугъу,
Гирбишиндин рангнан уьру.
Инсанариз гьич дярябкъюз
Убгурайи йиз юкIв ялгъуз.
Йиз мухриан юкIв адабгъну,
АпIри таза, цIилар кивну.
Малайикди, аьгъдру эргвал,
Уьбхри гъубгу кIван сикинвал.
Мюгьюмед Мюгьюмедов
Ккилигувал
ккабцузди юкIв –
илцифувал –
тяйинсузуб, –
илибкIу гъагъ:
герглач гъвансиб,
лизи дифсиб,
таблихь гьюмсиб,
гъугъу луфран
тек цIупурсиб,
ялгъуз рюгьсиб…
… ккабцузди юкIв.
ДуртIларин Идаят
Бендар
***
Саб вахтнара
рюгьнан самбал буш мапIан,
Шадди лицуз мигъитан
улихь душман.
Рюгь тадабхъиш,
зиян шул, йивну жилкан.
Гъудужвувал
гъулай хьибдар, дугъридан.
***
Бала дуфну,
увуз йивруган жида,
Муулупан
дидиз йирфар – йикIиди.
Гьив жидайин улихь
сабурнан гъалхан,
Анжагъ гьадди
уву гьарган уьрхиди.
***
Мелзну яв сир
ачмиш апIуз мигъитан,
Аьян шулдар,
дуст фуж вуш, хъа фуж – душман.
Уьмри увуз
фукIа дапIнаш ихтибар,
Мелзниин яв
алапIну ккунду самбал.
Сунаханум Исаева-Гьяжикъурбанова
Америкайиз
Фу ккундувуз, гьей, уьлке яд!?
Аллагьди тувривуз жаваб!
Ккундувуз лап дявдин баяд –
Гъябкъюндарвуз яв жил’ин саб.
Увуз дяви вувуз гъазанж,
Аьгъюб дарвуз дявдин гъюрдар.
Рас апӀбу хьундарва гъаллаж
Рюкъдиз илтӀикӀнайи юрдар.
Му гъирагъ – гьюл, тму гъирагъ – гьюл,
Зиихъ – Канада, юрд табигъ.
Исихъинди – саб касиб чюл,
Ацтекарин кутӀубшву ригъ.
Алархьбахьан сикин ву халкь,
Европайин ярхла сяргьят.
Архаин ву апӀбахьан тӀанкь,
Дина дяви хуб дар рягьят.
Яв жил’ина кчӀихбар гъидар,
Алва душв’ин «сарна — сарди».
Ислягьвалин ирчрур гъядар,
Дявйир ккергърур, инсаф дарди.
Му дюн’яйин гьарсаб пӀипӀнягъ
Гъюбччвурва яв жанаврин хъюхъ –
Сабпну душвгъян гъютӀубччвур «вягъ»,
Ликариккишв шул цӀа ва рюкъ.
Малайикдинси дебккну маш,
Вуйиганси варитӀан пак,
ИнчӀнахъ гьитӀибкӀну вягьши гаш,
Мушваъ-тушваъ апӀурва пӀакь.
Дебккну дюн’я чӀимрахь тӀарам,
Яракь тувну, гъадабгъур пул.
Ибшри дициб гъазанж гьярам…
ЧӀимир хътабкур, уьбх гашу ул.
Зарият Къафланова
Уж’вал аьгъю даршлу запад
Гьюкуматар
кюкдин багъ вуйич кIури,
СССР имдруган,
кIул за гъапIдари
Албагу суфрайихъ
хъайи саб хизан
Гъяъну, каъну,
аьлябхъну угърашари.
УргцIур йис гъубшну,
дацIаркну лигури,
Улихь мелз йивури,
гъятIнихъ гъван хъиври.
Учвхъан гъудубгъдар айич
ичра гъачгъар,
ТIараш дапIну,
ичв жергейиз дуфнайдар.
Жвуван Ватандиъ
гъазанмиш апIури,
Наругъалйир
ул хътрубкьру йишваъ диври,
Жин гъапIуб,
аьгъя дурариз, ву гьярам —
Дидин манзил
хьибдар думукьан давам.
Делфуруз Ханялиева
Аьхир фила шул’яв, дяви?
Ислягь халкьар дерднаъ иту,
Шаду юкIвар пашман гъапIу,
Жигьил жанар талаф гъапIу,
Аьхир фила шул’яв, дяви?
Гъургда юкIвар ич бабарин,
Пуч дапIну жанар солдтарин,
Улдубзда нивгъ ич уларин,
Аьхир фила шул’яв, дяви?
Яснаъ ахьнайи бабари
Гъван жибкIура чпин нивгъари,
Мармардашдин ядиграри
Учу ургуб гъита, дяви!
ЦIалцIам гъванариз лигури,
Шиклилан хил алдатури,
Ругдиина нивгъ рубзури,
Бабар кабаб мапIан, дяви!
Шюшеханум Керимова
КIваин гъитурхьа игитар!
Шуладарзхьан, заргну хилар,
Улихьси ялхъвниъ арагъуз.
Герек шуйкIан фицдар мукьмар
Пашман улар аьлхъюз гъитуз?
Женгариъ а жигьил баяр,
КIул’ин алди мархь гюллйирин…
Хулаъ дадйир – дерднаъ юкIвар,
ЧIуру хабрарра женгарин….
Республика СССР-ин,
Белгороддихъ хъучIубкьнайи,
Фу гъабхьунвуз? Урусатди
Увуз фукIа гъапIуб айин?
Фашистарин лишнар каъна
Яв жигьилари жанарик.
Дурариз инсанвал гьархна,
Урусат ву кIур «душмнарин»…
Донбассдикан женгнан хутIил
ДапIну, швнуд йис гъябгъюрайи…
Гъидритри халкьдиз хътабгъуз ил
Душв’ин гюллйир уьлюрхюйи…
-Дурарин бицIидар подвлиъ
Хьиди, хъа ихьдар – багъариъ, –
КIуй Порошенкойи-абдли,
Дявдиз халкь гьязур апIури…
БицIидариз жаза тувру
Аьрсузар ккаъну чан гъючIакк,
Урусатдиз аькси духьну
А Америкайин паччагь.
Паччагь пузра дугъаз шулдар,
Учв наан аш, гъавриъ адар…
Дюн’яйин агъавал апIуз
США-йихьан шули имдар.
Вушра, чарйир а зигури,
Жарадариз илзигури,
«Вакилари» Дюн’яйин ихь,
Халкьар а гъяъри дявйиригъ.
Жарадарин хилар’инди
Гъахура дурари женгар.
Кьувватнакан Урусатдин
Дурариз хабарра адар.
Вари дюн’я вушра аькси,
Санкцйир артухъ шули ашра,
Ихь Игитар а люкьярси
Фашизм терг апIбан гъайгъушнаъ.
– Дявйир вари ккудукIуру
Йикьрар’инди, – кIури шулу.
Гъузди кIваин нивкIси чIуру
Гъагъи йигъар, шадвал адру.
КIваин гъитурхьа игитар,
Душмандин рякъяр гьадатIдар.
Гьархуз адархьуз ихтияр
Ватандин гъайгъу гъизигдар.
Рягьим Рягьман
Мялум дару солдтин накьвдихъ
Дугъан кIулихъ
ччвуркьан капIнадар гъвандик,
Гъюрадар чахъ ишуз
мина дугъан баб.
Кивундар унтI
Гъалибвалин чав пайдгъик,
Дявдиъ ими Солдат –
шлин бай, шлин аба.
Гюллейи, чан
утIубччвубди мухриан,
ЙибкIура гьар йигъан
му Солдтин аьжал.
ИлтIибкIура
Солдат гъургу цIа Жиллан,
Убгури ччивар’ан
дугъкан кучIлин чIал…
Ччвуркьан кадар
дугъан кIулихъ хъай гъвандик.
Йишв гьубкIундар
гъванарик чпин ччвурариз…
Саб ччвур даим гъапIну
дявди му накьвдик
Мялумcуз гъийиху
вари Солдтарин.
Эльмира Аьшурбегова
КIваълан гъубшну, чиб пичар’ан адагъуб
Аьзиз абйир,
ичв гъапIуб гъюдубчIвундар:
Ичв кIурбар’ин
кюкдихъ хъа Европа гъи.
Фашизмдихъди женгнаъ
дивунчва жанар,
Чве халкьар урхюри
дявйириъ гъагъи.
Совет эскри
нацизмдин зулмарихьан
Азад гъапIу
Европайиз лиг уву:
«Чухсагъулин гьюрмат»
хътапIура чибхьан,
Санкцийириъ
шлу-даршлу зегьер иву.
КIваълан гъубшну,
чиб пичар’ан адагъуб,
Концлагерар-
дустгъариан адауб,
Бегьем шлубси
гъи чпин амрарин буйругъ,
Урус эскер йикIуз
апIура гъуллугъ.
Аьзиз абйир,
европа гьюкуматар
Гъи духьну а
США-йин ряятар,
Ва дурархьан
гъуншдиз пуз шули адар:
«Мясляаьт апIинай –
яракь лазим дар!»
Аьзиз абйир,
ичв хизанар гъахьну тIанкь,
Фашизмдихьан
Европа азад апIуз.
Жандиъ арсу
гюллйир ва рукьан кьатIар –
Магьа дилин хътакдари
гъабхиб ухьуз.
Фашизмдихъди женгнаъ
дивунчва жанар,
Чве халкьар урхюри
тарихдиъ гъагъи.
Аьзиз абйир,
ичв гъапIуб гъюдубчIвундар:
Ичв кIурбар’ин
кюкдихъ хъа Европа гъи.
