Февралин вазлиъ республикайин вари районариъ ва шагьрариъ вари Урусатдин «ВаритIан ужур мялим 2023» конкурсдин муниципальный дережайин пай кIули гъубшну. Думу конкурсдиъ Дагъустандин Огни шагьрин 2-пи нумрайин мектебдиъ табасаран чIал ва литература киврайи ихь ватанагьли, саб вахтна Хив райондин Кьуликк гъул’ан Дагъустандин Огни шагьриз кючмиш гъахьи ва гьамусяаьт душваъ чан хал-хизандихъди яшамиш шулайи Гюлишан Мусаевайи сабпи йишв гъадабгъну.

 

 

Дагъустандин Огни шагьриъ 8 мектеб а. Сифте конкурс мектебарин айитI кIули гъубхнийи. Хъасин гьарсаб мектебдиъ гъалиб гъахьи 8 мялим муниципальный дережайиз удучIвну.

«Узу конкурсдиз Абумуслим Жяфаровдин яратмиш апIбариан ва «ДарчIиди кивур» поэмайиан дарс гьязур гъапIнийза. Сифте авторикан кидибтну, слайдариинди писателин яратмишарихъди таниш апIбиина улдучIвнийза. Жюрийи, аргъаж шулайи наслиз туврайи ватанпервервалин тербияйиз ва насигьятназ лигну, йиз дарсназ варитIан заан кьимат дивнийи. А.Жяфаровдин поэмайихъди таниш дару кас гьеле-меле адаршул. Ва думу кIваз гуж тувру дявдин темайиан дарс кивузра гъагъиди вуйи. Конкурсдин кьяляхъ узухьна жюрийиъ айи сар азербайжан дишагьли гъафнийи. Дугъу, чаз табасаран чIал аьгъдаршра, дарснан гьарсаб гафнан кьатI’иди гъавриъ гъахьиваликан, саб фициб вуш сюгьри учв поэмайин вахтназ гъурхуваликан ва чаз дарс лап кьабул гъабхьиваликан гъапнийзуз. Дугъриданра, саб вахтна жюрийин саки вари вакилари улариина гъафи нивгъар марцц апIури, уларикк ккабхьнийиз. Хъа узу узуз гъюрайи нивгъвар гужназ дерккнийза», – ктибтура Гюлишан Мусаевайи ич сюгьбатнаъ.

Гюлишан Мусаевайи Дагъус-тандин Огни шагьрин варитIан ужур мялимдин ччвур лайикьлуди гъазанмиш гъапIну. Гьамус думу конкурсдин мартдин эвелариъ шлу республикайин пайназ гьязур шула. Душваъ Дагъустандин вари районарин ва шагьрарин образованиейин идарйирин муниципальный пайнаъ гъалиб гъахьи 60-рихьна мялимар иштирак хьиди.
Гюлишан Мусаевайикан ктибтури имиди сабсана далил къайд дарапIди гъитуз шулдар. Гъябгъюрайи йисан январин вазлиъ «Бабан чIалариз кьюбпи нефес» кIуру республикайин конкурс кIули гъубшнийи. Душваъ йиз макьалайин игитри «Бабан чIал кивру мялимдин методикайин аьгъювалар уч апIру сундух» номинацияйиъ сабпи йишв, хъа дугъан ученикари «Диалог. Бабан чIал уьбхбаан йиз фикрар» номинацияйиъ кьюбпи йишв гъадагъну.

«Урхурайидариз, ихь кюгьне аьдатарикан ктибтруган, агьли касарихъди чпи гюрюшариз гъахруган вая, шаирар-писателариз теклиф дапIну, ачухъ дарс гъабхруган, лап кьабулди шулу. Узу дурариз гьарсаб дарс маракьлуди гъабхуз чалишмиш шулаза. ИкибаштIан, читинваларра алахьуру. Мисалназ, узу ич мектебдиъ 1-пи классдиан 10-пи классдиинакьан вари табасаранариз дарсар кивраза. Улихьна йисари гьяфтайиъ бабан чIалназ кьюб сяаьт жара дапIнайи. Гьамус гьяфтайиъ саб сяаьт бабан чIалназ ва саб – литературайиз улупна. Гьяфтайиъ саб сяаьтна бабан чIал кивра кIури, чIал дубгъуз читинди ву. Мидланра гъайри, табасаран чIалнан дарснаъ бязи классариъ 20-22 урхурайир а. Думу вахтна гьарсар урхурайириз вахт жара апIуз гьубкIудар. Гьаддиз узу дурарин абйир-бабарихъди аьлакьа уьбхюз чалишмиш шулаза. ИкибаштIан, бабан чIалниинди сабкьан гаф аьгъдру бицIидарра алахьуру. Хъа бабан чIал аьгъдрувал дурарин тахсир дар», – ктибтура Гюлишан Мусаевайи.

Мялимдихъди узу сюгьбат гъабхурайи вахтна, дугъаз швнур-сар бабу ва урхурайидари, хулан ляхнин гьякьнаан чпиз кюмек ккун апIури, зенгар гъапIнийи. Думу Урусатдин конкурсдин республикайин дережайин пайназра гьязур хьуз, вари зенгаризра жавабар тувуз, мектебдин дарсарра кивуз, чан веледариз ва хизандин месэл-йиризра фикир тувуз хъуркьра. Халис табасаран дишагьли, ужур хизандин дада ва бажаранлу мялим Гюлишан Мусаевайин ччвур ухьуз хъана ебхьур кIури, миж кивраза. Гъит дугъаз гележегдиъра хъуркьувалар ишри.