«Табасарандин нурар» газатдин цIиб улихьнаси чапдиан удучIву нумрйириъ учу, ихь республикайиъ бабан чIалар ва литературйир кивру мялимарин арайиъ варитIан ужур мялим ашкар апIбан конкурс кIули гъябгъюрайиваликан мялуматар туври, душваъ иштирак шулайи ихь ватандашарикан бикIури гъахьнийча. Магьа гьаму йигъари думу конкурсдин республикайин дережайин натижйир гъивну.
Конкурс мартдин 13-пи йигълан 21-пи йигъаз Мягьячгъала шагьрин 11-пи нумрайин гимназияйиъ ва Дагъустандин образованиейин артмиш’валин институтдиъ кIули гъубхнийи. Конкурсдин республикайин пайнаъ 26 райондиан ва 8 шагьриан 34 мялимди иштирак’вал гъапIну.
«Гъи ухьу аьхю ва гизаф миллетар айи, гьарсаб халкьди чан чIал ва диалектар уьрхюрайи уьлкейиъ яшамиш шулахьа. ЧIаларин жюрбежюрвал – му культурайихьан, тарихнахьан ва аьсрарин аьдатарихьан жара апIуз даршлу ирс ву. Тарихну улупурайиганси, бабан чIалнахьна вуйи вижнасузвали милли культура зяиф апIура, жигьиларин милли ухшарвал дубгури, дурар саб жюрейинра лишнар ва гьиссар адру инсафсуз дестйириз илтIикIура. Гьаддиз бицIидарин ва живанарин бабан чIалнахьна вуйи ккунивал зяиф хьуз гъидритди, чIалнан мяналувал ва метлеблувал улупну ккунду», – къайд гъапIнийи конкурсдин натижйир йивбан шадлугънан серенжемдиъ РД-йин Правительствойин председателин заместитель Муслим Телякавовди.
РД-йин Халкьдин Собра-ниейин образованиейин ва илимдин комитетдин кIулиъ айи Елена Павлюченкойи ва РД-йин образованиейинна илимдин министр Ягь’я Бучаевди конкурсдин гъалибчйириз ва иштиракчйириз тебрикнан гафар гъапнийи.
Конкурсдин натижйириинди, сабпи йишв Мягьячгъала шагьрин 11-пи нумрайин гимназияйиъ авар чIал киврайи мялим Мягьямед Манаповди гъазанмиш гъапIну. Кьюбпи йишван сагьиб Табасаран райондин Рушв’ил гъулан мектебдиъ табасаран чIал ва литература киврайи мялим Лейла Сефербегова гъахьну. Хъа шубубпи йишв Гъизилюрт шагьрин 8-пи нумрайин мектебдиъ авар чIал киврайи мялим Шамесэдо Нур-мягьямедовайи гъадабгъну.
«Гьаму конкурсдиъ узу, йиз мектебдинси, ихь респуб-ликайин меркездин терефра уьбхюрайза. Гьаддиз узу аьхю жавабдарвал гьисс апIурайза. ИкибаштIан, фукьан вушра гъагъиди вуйи. Конкурс саб гьяфтатIан артухъ йигъари кIули гъубшнийи. Вари мялимари чпин улихь дивнайи месэла лайикьлуди кIулиз адабгъну. Ихь республикайин тереф федеральный дережайиъра лайикьлуди уьбхюз чалишмиш хьидиза», – гъапнийи Мягьямед Манаповди.
Конкурсдин кьяляхъ, чаз алахьу читинваларикан ва сабпи йишв гъадабгъуз фти манигъ’вал гъапIнуш гьерхри, узу ихь ватанагьли Лейла Сефербе-говайихьнара илтIикIнийза.
«Конкурс улихьна йисаритIан заан гьязурлугвал ва тешкиллувал ади кIули гъубхнийи. Жюрийин вакилар конкурсдиъ иштирак шулайи гьарсар мялимдихьна гьякьлуди янашмиш шулайи. Конкурсдиъ иштирак шулайи вари мялимарин кьяляхъ РД-йин образованиейин министерство, Тахо-Годийин ччвурнахъ хъайи институт ва ДИРО даягъси дийигъну гъахьну.
Узу конкурсдин сабпи йигъланмина йиз мумкинвалариин хъугъ’вал алди гъягъюрайза. Вари иштиракчйир кьадарсуз гужалди гьязур духьну дуфнайи. Хъа гьаци вушра, классдин сяаьтра, дарс гъабхбан къайдара, методикайин мастерскаяра, мастер-классра варитIан заан дережайиъди кIули гъухунза. Жюрийин вакилариз йиз мумкинвалар рякъюрайи, гьаддиз узуз артухъси суаларра туври гъахьну. Хъа сабпи йишваз удучIвуз фу-вуш гьубкIундайи. Гьаци вушра, жара мялимар табасаранариз кьюбпи йишв тувувалиин мюгьтал духьнайи. Читинваларикан улхуруш, дарс гъабхру вахтна компьютер чIур гъабхьивалин ва техникайи читин гьялнаъ итувалин дюшюшар гъахьнийиз. Сабсана пуз ккундузуз, конкурсдиъ иштирак шулайи вари мялимар сар-сарихьна гьюрмат айидар, бахилвал дарапIрудар вуйи. Хайлиндарихъди дуствалин аьлакьйир уьрхюрача», – къайд гъапI-нийи Лейла Сефербеговайи.
Багарихьди учу Лейла-йикан, дугъан ляхникан ва хъуркьуваларикан газатдиз яркьу макьала гьязур апIидича.
Конкурсдиъ гъалибвалин йишвар гъадагъдар Дагъустандин образованиейин ва илимдин министерствойин ва РФ-дин халкьдин образованиейинна илимдин гъуллугъчйирин профсоюздин терефнаан дипломариинди ва пулин пешкешариинди лишанлу гъапIну.
