Хусуси метлеб айи дявдин операция кIули гъабхурайи йишваъ чан улихь дивнайи гъуллугънанна дявдин месэлйир лайикьлуди тамам апIбаз лигну, Табасаран райондиан вуйи Сиражудин Мурадялиев Кьягьялвалин орден тувбаз улупна. Улихьна йигъари Табасаран райондин глава Мягьямед Къурбанов дирбаш эскрихъди гюрюшмиш гъахьну.

 

 

Муниципальный райондин главайи Сиражудин Мурадялиевдиз, чан гъуллугънан вазифйир лайикьлуди тамам апIбаз ва жигьилариз ватандаш’валинна ватанпервервалин тербия тувбак лайи-кьлу пай кивбаз лигну, чухсагъул мялум апIбан кагъаз тувну.

Сиражудин Мурадялиевдиз «Дирбаш’вал улупбаз лигну» медаль а. Думу медаль 2023-пи йисан февралин вазлиъ ихь эскриз, ярквраъ жин духьну, Урусатдин кьушмарин дестейиин цIа уьлюбхнайи Украинайин 7 жасус хьайи йишв аьгъю дапIну, дурар терг апIбаз тувуб вуйи.

Гьамусяаьт Сиражудин Мурадялиевди, женгариъ зиян хьпан кьяляхъ, райондиъ чан сагъламвал къайдайиз хура. Сагъ гъахьиган, дугъу хусуси метлеб айи дявдин операция гъабхурайи йишваз кьяляхъ гъягъюз планламиш дапIна.