Цци Дагъустан Республикайиъ дюгдин 135 агъзур тоннайин бегьер гъадабгъуз планламиш дапIна. Республикайин гъулан мяишатдин ва ипIру-убхъру сурсатарин министерствойин пресс-гъуллугънан кIулиъ айиМягьямед Аьбдуллаевдин гафариинди, сач ихь региондиъ 31 агъзур гектарин хутIлариан, саб гектариан 42,09 центнер дюгю уч апIури, 129 агъзур тоннайин дюгдин бегьер гъадабгъну. Хъа ццийин йисаз планламиш дапIнайи бегьернан кьадар сачтIан 5% артухъди хьибди.

 

 

«Циркил артмиш апIуз гъирагъдилан вуйи инвесторарра жалб дапIна. Дагъустандиъ гьясил апIурайи дюгдин ицциб тIяъмихъди яваш-явашди саки Урусатдин вари регионар таниш шула. Гьяйифки, сачдихъанмина ццийин 1-пи июлизкьан Дагъустандиан дюгю харижи уьлкйириз экспортдиз гьапIуз къадагъа дапIна. Хъа ихь гьюкуматдиъ кIуруш, асас вуди республикайиан дюгю гъабхурайи регионар Москва ва Санкт-Петербург шагьрар, Краснодарский край, Псковский ва Тамбовский областар ву.

Мидланра гъайри, пуз ккундузузки, аьхиримжи йисари Дагъустандиъ гьясил гъапIу дюгю масу тувуз шлуганси тартиб апIру 4 заводра арццна. Мисал вуди гъадабгъиш, сач Къизлар райондин ООО «Мареновский» тешкилатдиъ сад йигъанна йишвандин арайиъ 250 тонна дюгю тартиб апIру кархана ачмиш гъапIну. Думу республикайиъ дюгю гьясил апIурайи аьхю кархан-йирикан саб ву, пуз шулу», – мялум гъапIнийи Мягьямед Аьбдуллаевди.

Къайд апIуз ккундузузки, Дагъустандиъ дюгдихъди ляхин апIурайи мяишатар асас вуди Къизлар райондиъ (60%) ерлешмиш духьна. Гьацира дюгю убзурайи хутIлар Хасавюрт, Бабаюрт ва Тарумовский районариъра а. Гьадушвариъра гьясил апIурайи дюгюдин ицциб тяаьм Къизлар райондиъ гьясил апIурайи дюгдихьан зат тафавутлуб дар.