«Табасарандин нурар» газатдин «Яв баяр, Табасаран!» рубрикайиъ учу, багъри юрдариан Урусатдин жара шагьрариз кючмиш духьну, гьадушваъ ватандин артмиш’валик чпин баркаллу пай киврайи, багъри гъул, район адлу апIури, заан хъуркьуваларихъна гъафи ва ужуб гележег хъайи ихь ватанагьлийирикан бикIури шулча.

 

 

Йиз гъийин макьалайин игит Насир Нурмягьямедов Табасаран райондин ТинитI гъул’ан ву. 2001-пи йисан багъри мектеб гъизилин медалиинди ккудубкIну, думу Москвайин гьюкуматдин экономикайин, статистикайин ва информатикайин университетдик урхуз кучIвру. Университет ккудубкIбан кьяляхъ, сад йисан армияйиъ Оренбургдин областдин ра-кетйирин кьушмариъ гъуллугъ дапIну гъафир, думу Дербент шагьриъ айи «Волна» кIуру НИИ-йиъ бухгалтерди лихури гъахьнийи.

«2011-пи йисан Мурманск шагьриъ дявдин гимйириин лихурайи йиз дуст, Дагъустандиз чан абйир-бабариин улукьуз гъафир, узухьнара хялижвди гъафнийи. Дугъу узуз чпихьна гимйириина лихуз гъюбан тек-лиф гъапIнийи. Узу, ляхниъ отпуск гъадабгъну, дустрахъди Мурманскдин областдиз гъушнийза. Гьадму йисхъан мина йиз хизандихъди Мурманскдин областдин Полярный шагьриъ яшамиш шулаза. Дугъриданра, дустру чан гаф кIулиз адабгъну. Узу дявдин аьхю гимйириин лихури гъахьнийза. Ляхин бицIи вахтнан арайиъ бинайиан гъудубгънийза. Гимийин командайин идара апIурайидариз йиз жавабдарвал лап кьабулди вуйи. Дурари узуз штун кIанаккди гъягъру дявдин гимйирихъди аьлакьа уьбхру, дурар гьюлиъ айи катI’и йишв ахтармиш апIру ва гюзчиваликк уьбхру гъуллугъ ихтибар гъапIнийи. Штун кIанаккди гъягъру гимйирихьан гъафи мялуматар тартиб апIувалра йиз вазифа вуйи. Мисалназ, штукк ккучIвиган, думу гим-йир рякъюдар, дурар наанди гъягъюраш, дурари фицдар гьяракатар гъахуз ккаш, аьгъю апIуз шулдар. Яна штукк ккубчIву гимийин жилихъди вуйи аьлакьа дубгура. Думу абгру ва дидихъди аьлакьайиъ гъузру Морзейин азбукайиз ухшарвал айи хусуси таблица-чIал а. Дициб гимийиан гъафи мялумат узу, аьдати чIалназ илтIибкIну, ич гимийин кIулиъ айидарихьна, хъа дурарихьан жаваб гьязур дапIну, кьяляхъ туври гъахьунза», – ктибтура Насири.

Насир Нурмягьямедов Кафари флотдин командующийдин терефнаан гьюрматнан грамотйир, премйир, баркаллу зегьмет зигбаз лигну, чухсагъул мялум апIбан кагъзар тувбиинди лишанлу дапIна. Йиз сюгьбатчийин гафариинди, дявдин гимйириин вуйи ляхин, аьхю жавабдарвал айибси, лап хатIалубра, гъагъибра вуйи. «Йигъ-йишв дарпиди, фунуб вахтнара дих дапIну, гимийиина хъуркьуз 45 дакьикьайин вахт тувуйи. Наана ва швнуд йигъаз гъя-гъюраш, дина гъягъбан метлеб фу вуш, мялум апIудайи», – кIваин апIура дугъу.

Саспи вахтари Насириз, гьюлиин лапра аьхю лепйир али вахтна, гими штун кьувватну дабгъиди вая ккабхъди кIури, хияларра гъюйи. Сад йигъан дугъаз Полярный шагьрин МЧС-дианра ляхниз кьабул апIбан теклиф кайи кагъаз гъюру.

«2021-пи йисан дявдин гимийиан МЧС-диз аьхюну инструкторди лихуз гъушунза. Узу саб вахтнара гьии ляхин абгури гъахьундарза. Йиз кIваъ гьарган инсанариз узхьан шлу кюмек апIувал ади гъабхьнийиз. Ва дявдин гимийиинтIан узхьан гьаму гъуллугънаъ инсанариз артухъди кюмек апIуз шлувалиин инанмиш гъахьунза. ИкибаштIан, фуну ляхниъра гъагъи дюшюшар алахьуру. Инсанар балайикк ккахъган, аварияйин вая цIа кабхъбан дюшюшар арайиз гъафиган, сабпи нубатнаъди хъуркьрудар МЧС-дин гъуллугъчйир ву», – къайд апIура Насир Нурмягьямедовди.

Ав, гьаму гъуллугънаъ ди-йигъну, дугъан цIиб вахттIан даршра, Насири чан десте-йихъди сатIиди гъагъи дюшюшариъ ва аварйириъ ахъу хайлин инсанариз кюмек дапIна. Мисалназ, улихьнаси гизаф мертебйирин хулариъ гъуншйириз саб квартирайин ра-ккнаригъ гъяйи арайиан кум гъюдубчIвури гъябкънийи. Дурари гьадмусяаьт МЧС-дин дестейиз зенг апIуру. Насир чан юлдшарихъди вахтниинди цIа кабхънайи хулаз хъуркьру. Душваъ даахнайи сар жилир марцци гьавайихьинди адагъну, духтрар хъуркьайиз Насири дугъаз сабпи кюмек гъапIнийи. Сакьюдар йигъар улихьна, рякъюн хатIа-балайин дюшюшдиъ, машинар гужалди чиб-чпихъ дивну, гъачIаркIнийи ва инсанарихьан дурарин айтIан удучIвуз шуладайи. ЦIа кабхънайи машинарин багахьинди гъя-гъюзра варидариз гучIурайи. Насири чан дестейихъди дурар вахтниинди азад апIуру. Гьаму жюрейин дюшюшар дугъаз саки гьар йигъан алахьура.

Насирин уьмрин юлдаш Людмила Табасаран райондин ФуркIил гъул’ан ву. Дугъу, ДГПУ-йин филологияйин факультет ккудубкIну, Полярный шагьрин саб мектебдиъ урус чIалнаан ва литературайан дарсар кивра. Дурарин бай Мюгьяммаддин 5 йис шула. Насир азад вахтна шиърар дикIбиинра машгъул ву. Асас вуди дугъу чан шиърар гьамусяаьт дюн’яйиъ шулайи гьядисйириз, багахьлуйириз ва СВО-йиъ айи игитариз бахш апIура. Хусуси метлеб айи дявдин операцияйиъ кечмиш гъахьи сарпи Игит Нурмягьямед Гьяжимягьямедовдиз бахш дапIнайи дугъан шиир Дагъустандин вари аьхю паб-ликариъ чап гъапIнийи. Думу шиир гъеебхьиган, Игитрин дадайи Насир гъагну ва дугъаз чпихьна гъюз теклиф гъапIну.

«Узу гьар йисан адашдиин ва дадайиин улукьуз багъри гъулаз гъягъюри шулза. Дурарихъди йиз гъардаш Закирин хизан яшамиш шула. СВО-йиъ иштирак шулайи гъардашлугъ, дявдиъ зийнар духьну, гьамусяаьт Владикавказдиъ госпиталиъ а. Закир дяви ккебгъу сабпи йигъланмина СВО-йиъ айи. Июлин аьхириъ гъагъи зийнар духьну, думу сифте Ростовдин госпиталиъ, хъасин Буйнагъскдиъ, гьамус Владикавказдиъ госпиталиъ реабилитацияйиъ а.

Закири Буйнагъскдиъ айи Урусатдин къушмарин саб частнаъ гъуллугъ апIури, хайлин йисар ву. Думу Чечендин, Сирияйин, Карабахдин, Украинайин дявдин сабпи гьяракатариъ иштирак гъахьну. Дугъаз Гъалибвал хру Георгийин, Кьягьялвалин ва хайлин жара орденар ва медалар тувна», – дамагъ кади ктибтура чан гъардшикан Насири.
Магьа, Табасаран, яв баяр! Гьамцдар ватанпервер табасаранариинди дамагъ дарапIди гъузуз шулдар.