Гъубшу йисан сентябрин вазлиъ Урусатдиъ кIули гъубшу бегьем дару мобилизацияйи гизаф инсанарин фикриз тясир гъапIну. Думуган СВО-йиз гъягъюз даккнидар ва чпин хушниинди Ватан уьбхюз гьязур вуйидар кьюб йишваз жара гъахьнийи. Гьаддихъанмина инсанариз, хъана мобилизация хьибди кIури, гучI ка.
Гъийин йигъаз Урусатдиъ бегьем дару мобилизацияйин кьюбпи пай ккебгъбакан улхбар гъахуз себеб адар. Дидин гьякьнаан уьлкейин кIулиъ айирира, Правительствойин вакиларира швнуб-саб ражари гъаврикк ккаъбан мялуматар тувна. Гьаци вушра, мобилизацияйин месэла инсанарин жюрбежюр якьин дару фикрари ва теклифари алабцIна. Жямяаьтлугъдин арайиъ тарагънайи кучIларин кьяляхъ, Урусатдиъ айи аьгьвалат гъизгъин апIуз ккунди, Украинайин гьюкмин вакилар ва дявдин операция гъабхурайивалихъди рази дару нацистар дийигъна.
РФ-диъ бегьем дару мобилизация гъубшу йисан аьхириъ ккудубкIнийи. Дидин дахилнаъди вари уьлкейиан 300 агъзур кас дявдин гъуллугъназ гъушнийи. Гьадму кьадарнакан саб пай эскрари гъира кмиди вердиш апIру центрариъ гьязурлугвалар гъахури ими.
Аьхиримжи вахтна СМИ-йин дакьатариъ Урусатдин гьюкмар армияйин гъуллугъназ 400 агъзур контрактник гъадагъуз гьязур шулайиваликанра улхбар а. Дурари ихь армия мюгькам дапIну ккунду. Эгер гьюкмарихьан думу планар уьмриз кечирмиш апIуз гъабхьиш, мобилизацияйин месэла бегьемди хъябкьди.
Хьадукран призыв ккебгъбан гьякьнаан мялуматар тувруган, республикайин военный камиссар Дайтбег Мустафаевди къайд гъапIганси, Урусатдиъ хусуси метлеб айи дявдин операция ккебгънайивализ дилигди, Дагъустандиъ уьлкейин оборонайин министерствойин урхбан идарйирик урхуз кучIвуз ккунидарин кьадар цIиб гъабхьундар. Дагъустандин гизаф жигьилариз дявдин гъуллугъ кьабулди ву. Хъа урхуз кучIвуз дархьидари контрактдиинди гъуллугъ гъабхуваликан фикрар апIуру.
Узу гьаму макьала бикIайиз улихьна, контрактдиинди гъуллугъ апIурайи ихь ватанагьли Рустам Мягьямедовдихъди (ччвур дигиш дапIна) сюгьбат гъубхнийза. Ич арайиъ гъабхьи сюгьбат исихъ туврача.
«Военный гъуллугънахъ бицIидихъанмина юкIв хъайиз. Амма узхьан оборонайин министерствойин урхбан идарайик урхуз кучIвуз гъабхьундайзухьан. Вахт гьавайиди дурубшбан бадали, узу технический университетдик урхуз кучIвнийза ва думу ужудар аьгъювалар ади ккудубкIнура вуйза. Кьюб-шубуб йишвхьан ляхниз теклифарра гъахьнийиз. Вушра, думу теклифар кьабул дарапIди, контрактдиинди военный гъуллугъназ гъягъбанди гъахьнийза. Кьюд йисазди контрактдиин къул дизигну, гъуллугъ апIуз хъюгънийза. Йиз контрактдин сад йис улдубчIвури, Урусатдин Федерацияйи хусуси метлеб айи дявдин операция ккебгънийи.
Думу ккебгъайиз улихьна учу гъуллугъ апIурайи дявдин частар Украинайин сяргьятарихъна гьаънийи. Гьелбетда, мициб аьгьвалатнаъ гъуллугъ апIувал рягьятди дар. Вушра, дявдин гъуллугъ давам апIураза. Сабпи ражари узу къул гъизигу контрактдин вахт ккудубшнийи. Отпускдизра гъафунза. Жара гъуллугъариъ айидаризтIан, гьамусяаьт СВО-йин зонайиъ айидариз отпуск чарасуз лазим ву. Отпускдин вахтна жвуван багахьлуйирихьна дуфну, кIулизра, кIвазра рягьятвал гъадабгъиган, цIийи кьувват ачмиш шулу.
Контрактдин вахт ккудубкIиган, хъана контрактдиин къул дизригдира гъибтуз шуйи, амма узу жара фикир гъапIунза: сабпиб, йиз юкIв хъайи ляхин, кьюбпиб, ужуб маважиб, шубубпиб, хайлин жара мумкинвалар», – аьлава гъапIнийи Рустам Мягьямедовди.
Дугъриданра, дугъу кIурайи гафар дюз ву. Ляхин хътарди, кепкарихъ ляхин абгури лицайиз, жигьил баяриз контрактдин ляхин ужуб мумкинвал ву. Яракьлу кьувватариз цIийи жюрейин яракь гъюра, дурарихъ лихуз дявдин пишекар гъуллугъчйир лазим ву. РД-йин шагьрарин ва районарин военный комиссариатариъ контракт-диинди гъуллугъ апIуз ккунидар кьабул апIбан ляхин давам шула.
Контрактдиин къул гъизигдариз дишлади 195 агъзур манат тувру; СВО-йин иштиракчйириз гьар вазлиъ 204 агъзур манаттIан артухъ маважиб тувра; контрактдиин къул гъизигдарихъди гьязурлуг’валин ляхин гъабхурайи вахтнара 40-50 агъзур манат маважиб гъюра; гьар вазлиъ бицIидариз 18 агъзуриинакьан пособие тувра; дявдин женгариъ хъуркьувалар гъазанмиш гъапIдариз аьлава вуди пулин дакьатар тувра.
СВО-йиъ иштирак шулайи эскрарин бицIидарин багъариз пулсузди гъягъюру, мектебдиъ урхурайидариз пулсузди хураг тувра, дурарин яшлу абйир-бабариз хулаъси, асас метлеб айи идарйириъра хъайивал апIбан кюмек тувру. Хусуси метлеб айи дявдин операция ккудубкIбан кьяляхъра дидин иштиракчйириз хайлин льготйир хьиди.
