Урусатдин жюрбежюр регионариан Ватандин Аьхю дявдин йисари саб шилра имдарди гъудургу эскрар агурайи 40 агъзуртIан артухъ урхурайидар гьар йисан «Гюрматнан вахтайихъна» гъюру. Ватанпервервалин гьаму акцияйи Ватандин Аьхю дявдин женгар гъахьи йишвариъ ахтармиш апIбан ляхнар кIули гъахру гизаф клубар сатIи апIура. Дурарин метлеб – Ватан уьбхюри гъийихдариз гьюрмат апIуб кIваълан гьадрапIувал ву.

 

 

27-пи апрелиъ военный оркестрин мукьмиккди республикайин ватанпервервалин тешкилатар, мектебариъ урхурайидар, кадетар ва гьюкмин органарин вакилар, Мягьячгъалайин кьялан майдандилан хъюгъну, Лениндин комсомолин ччвурнахъ хъайи паркдиз гъушну. Думу паркдиъ уч духьнайидари азад гъапIу эскриз тикмиш дапIнайи ядигарихъ кюкйир дивну.

Серенжемдиз уч духьнайидари саб дакьикьайиъ ккебехъну дийигъну, ихь азадвал бадали чпин уьмрар тувдарин гьюрмат гъюбхнийи.

Гьаму йисан Дагъустандиъ «Игитарин вахта» 27-пи апрелилан 30-пи апрелизкьан давам хьибди. Республикайиз Урусатдин Федерацияйин 13 Игит хяларди гъиди. Дурарин арайиъУрусатди гъабхурайи хусуси метлеб айи дявдин операцияйин иштиракчйирра а. Дагъустандиъ «Игитарин вахтайин» проект уьмриз кечирмиш апIури юкьубпи йис ву. Проектдин метлеб – Ватан бадали игитвал улупу Урусатдин Игитарихъди сюгьбатар гъахбиинди, жигьил наслиз ватанпервервалин тербия тувувал ву.

Игитар Мягьячгъала, Каспийск шагьрариъ, Хив, Ахцигь, Гуниб, Къизлар, Шамил, ЧIарода, Табасаран районариъ жигьиларихъди, юнармейцйирихъди, волонтерарихъди, жигьиларин жямяаьтлугъ тешкилатарихъди гюрюшмиш хьиди. Республикайин жигьилар Ватандин гъийин деврин Игитарихъди таниш хьиди, дурари Урусатдин тарихдин машгьур гьядисйир кIваин апIиди