Табасаран райондиз 2-пи майдиъ ихь машгьур ватанагьли, Урусатдин Игит генерал-полковник Рустам Мурадов гъафну.
КIежюх гъул’ан мина райондизди гъюрайи рякъюхъ гьюрматлу хялижв муниципалитетдин глава Мягьямед Къурбановди, РД-йин Халкьдин Собраниейин депутатари, райондин агьалйири ва жямяаьтлугъ тешкилатарин вакилари табасаранарин ужуб аьдатниинди – мани уьлихъди ва кинцIарикан дапIнайи нитIфихъди кьабул гъапIнийи. Йишв’ина гъягъру рякъюъ Рустам Мурадовди, учв кьабул апIуз рангнан шарикар хьади, шадвал машнаъ ади удучIвнайи Дарвагъ, Ярса, ТIаттил, ГьепIил, Хючна гъуларин мектебариъ урхурайидарихъди ва мялимарихъди сюгьбатар гъухнийи.
Генерали ва дугъахъди дуфнайи делегацияйин вакилари Ярса ва ТIаттил гъулариъ Ватандин Аьхю дявдин иштиракчйириз дивнайи ядиграрихъ, фронтовикарин рюгьяриз гьюрмат апIури, кюкйир дивнийи.
Хъасин багьалу хялижв кIулиъ ади, уч духьнайидар вари Бухьнагъ гъулаъ спортдин майдан ачмиш апIбаз бахш дапIнайи серенжемдиз гъушнийи. Мина Табасаран райондин глава Мягьямед Къурбанов, Хив райондин глава Ярмет Ярметов, Казбековский райондин кIулиъ айи Гьяжимурад Мусаев, РД-йин Халкьдин Собраниейин депутатар Алавудин Мирзабалаев, Сефер Аьлиев, Имран Аваев ва Расим Гьяжиагъаев, райондин идарйирин кIулиъ айидар ва Бухнагъ гъулан агьалйир дуфнайи. 17 метр яркьушин ва 27 метр ярхишин айи, гъваларихъан сетка илтIибкIнайи, йисандин фуну вахтнаъ вушра ишлетмиш апIуз шлу, жиликк мани апIру гъурулуш ккипнайи спортдин майдан Бухьнагъ гъулан агьали, меценат Назим Рамазановди чан гъулаз гъапIу пешкеш ву.
Спортдин майдан ачмиш апIбан серенжемдиъ Мягьямед Къурбановди, багъри Ватандин ругариина хялижвди гъювализ Рустам Мурадовдиз чухсагъул гъапнийи. «ВаритIан читин аьгьвалатариъ уву Ватандиз вафалувал улупунва. Уву ич дамагъ ва чешне вува, жара миллетари ихь халкьдиз яв гьунарариинди кьимат тувра. Уву райондиз гъювал учуз аьхю машквар вучуз», – уч духьнайидарин фикир ачухъ гъапIнийи райондин кIулиъ айири. Дугъу, Бухьнагъ гъулан жямяаьтдиз жумарт пешкеш гъапIу Назим Рамазановдин терефназра ужудар гафар гъапнийи.
Серенжемдин иштиракчйирихьна илтIикIну, чан улхбаъ Урусатдин Игит Рустам Мурадовди, райондин гъулариъ спортдиз аьхю фикир тувбаз, райондин главайиз, депутатариз, меценатариз чухсагъул гъапнийи. «Гъийин серенжем дявдин гъуллугъчйирин званйириз дилигди, Дагъустандин вари игитариз бахш апIурайивал гьисаб апIураза. Урусатдин жара халкьарихъди сабси, ихь машгьур эскрари Урусатдин Федерацияйин намус уьбхюра», – гъапнийи генерал-полковникди.
Чан терефнаан Назим Рамаза-новдира чан багъри гъулаз хялижв хьувализ лигну, Урусатдин Игит, Рустам Мурадовдиз, хъа гьацира серенжем тешкил апIбаз кюмек туву Мягьямед Къурбановдиз, майдан тикмиш апIруган, кюмкнан хил гьачIабкку гъуландариз аферин гъапнийи.
Уьру лента гьадабтIбан кьяляхъ спортдин цIийи майдандиъ генерал-полковник Рустам Мурадовдин ччвурнахъ республикайин волейболиан турнир ачмиш гъапIнийи. Талитариъ Табасаран ва Хив районариан, Дагъустандин Огни шагьриан 4 командайи иштирак шулайи. Амма амси гьавайи ва убгъурайи мархьли талитар кIули гъахуз манигъвал гъапIнийи, гьаддиз турнир Хючна гъулаъ Кьалухъ Мирзайин ччвурнахъ хъайи спорткомплексдиъ давам гъапIнийи.
Финалин талитариъ Бухьнагъ гъулан волейболин команда Дагъустандин Огни шагьрин командайиин гъалиб духьну, генерал-полковник Рустам Мурадовдин турнирин сабпи гъалибчи гъабхьну. Гъалибчйириз ва ужуди волейбол уйнамиш гъапIдариз дипломар ва пешкешар тувнийи.
Тешкилатчйирин гафариинди, турнир гьар йисан гъабхуз планариъ а.
