Ватан, жвуван уьлке уьбхювал, дидин хатIасузвалин гъаразнаъ хьувал – гьарсар инсандин важиблу буржйирикан саб ву. Урусатдин Федерацияйиъ Ватан уьбхюри дявдин гъуллугънаъ айи эскрариз гьаммишан лайикьлу гьюрмат а. Думу гьюрмат гьавайиди гъафиб дар, фицики Ватандиз читин вахт улубкьган, баб-Ватанди дих гъапIган, дявдин гъуллугъчйир сабпи жергйириъди уьлке уьбхюз гъудужвуру, лазим гъабхьиш, дурари гьяйиф дарди чпин жанра фида апIуру. Гьациб аьгьвалатнаъ дустна душман, кьягьялна гучIбях аьгъю шулу. Магьа гъира гьациб вахт улубкьна. Урусатдин Федерацияйикан варитIан гизаф мянфяаьт ктабгъу машгьур артистар, гизаф политикар, США-йин ва ригъ алабхъру терефнан уьлкйирин санкцийирихьан гучI дубхьну, харижи уьлкйириз гьергну гъушну. Хъа уьлкейин маракьар уьрхюрайи агъзрариинди ихь эскрари Ватандиз вафалувал улупура.
2022-пи йисан 15-пи октяб-риъ Урусатдин Федерацияйин Президентдин указдиинди, Хив райондин УртIил гъулан агьали Жабраил Гьяжикеримовдиз чан гъуллугънан вазифйир тамам апIурайи вахтна «Йихурайидар уьрхбаз» медаль тувну.
Жабраил Гьяжикеримов гъулаз жикъи вахтнан отпускдиз дуфнайиваликан мялум гъабхьиган, дугъахъди телефондиан сюгьбат гъубхунза.
Жабраил Камилович Гьяжи-керимов 1985-пи йисан Хив райондин УртIил гъулаъ Камил ва Абрият Гьяжикеримоварин хизандиъ бабкан гъахьну. Дугъу Ляхла гъулан кьялан мектеб ккудубкIну. 2009-пи йисхъан мина Чечен Республикайиъ контракт-диинди дявдин гъуллугънаъ а.
«Урусатдин Яракьлу кьувватарин дахилнаъди, сержант звание ади, 2009-пи йисхъан мина контрактдин бинайи-инди Ватандиз гъуллугъ апIураза. Ватандин маракьар уьрхювал – йиз пише вуйиз, ва думу пише ктабгъувалиин сад йигъанкьан швумал гъахьундарза. Йиз фикриинди, дявдин гъуллугъназ дирбаш’вал кайидар, читинвалариккан кIул ккададабгърудар, жарариз уж’вал апIуз гьязур вуйидар душну ккунду. Ихь табасаранарин арайиъ дирбаш баяр гизаф а. Узу гъуллугъ гъабхурайи йишваъра хайлин табасаранар лихура.
2014-пи йисан Донбассдиъ Украинайин миллетчйирихъди гъярхьувалар духьнайиган, узу дина гъуллугънан командировкайиз гьаунзу. Гьамусяаьт гъабхурайи хусуси метлеб айи дявдин операция ичIи йишв’ин арайиз гъафиб дар. Донбассдиъ урус чIал апIру халкьариз илзигури гизаф йисар гъахьну… 2014-пи йисан 24-пи ноябриъ, йиз улихь дивнайи гъуллугънанна дявдин месэлйир лайикьлуди тамам апIбаз лигну, Суворовдин медалиинди лишанлу гъапIнийзу.
Гьамусяаьт узу гъуллугъ апIурайи Урусатдин Запорожский областдин Токмак шагьриъра аьгьвалат гъа-гъиди ву. Токмакдиан Запорожьейин чIатху шагьрариз 60-100 километр, хъа женгар гъягъюрайи йишваз 50-60 километртIан манзил адар. Шагьриз гьар йигъан ВСУ-йин кьувватари яракьдиан йивури, ватандаш инфраструктура чIур апIуру. Урусатдин дявдин гъуллугъчйирин метлеб – шагьур миллетчйирин алжагъбариккан уьбхювал ву. Кьюбпи – Жуковдин – медаль, 2022-пи йисан ноябрин вазлиъ Токмак шагьриъ лишанлу хьувализ лигну, тувуб вуйиз.
Узухъди СВО-йиъ айидар вари чпин улихь дивнайи месэлйирин ва метлебарин ужуди гъавриъ а. Миллетчйириин гъалибвал гъадабгъайизкьан женг гъабхуз гьязур вуча.
Эгер ерли агьалйирин учухьна вуйи рафтарикан улхуруш, гизафдари Урусатдин эскрар гьюрматниинди кьабул апIура. Хъа учу даккнидарра гизаф а. Варидариин хъугъ’вал апIуз шулдар, гьаддиз ич тереф уьбхрударихъдитIан аьлакьйир тешкил апIури шулдарча», – ктибтура Жабраил Гьяжикеримовди.
Хусуси метлеб айи дявдин операция ккудубкIну, Жабраил сагъ-саламатди хизандиз кьяляхъ гъювализ дугъан хпир Фарида ва кьюр велед ккилигура. Жикъи вахтнан отпускдиз дуфну имиди, Жабраил Гьяжикеримов хизандиин улукьбан кьяляхъ багъри УртIил гъулазра, чав 10-пи класс ккудубкIу Ляхлаарин мектебдизра гъушну.
СВО-йин иштиракчйирихъди сюгьбат гъабхбан кьяляхъ, дявдин операция хъана ухди ккудубкIну, дюн’яйин аьгьвалат саламатуб дубхьну ккун шулу. Гъит, наан ашра, ихь эскрар Аллагьди уьрхри, чпиз ккилигурайи абйир-бабарихьна, чпин хпарихьна ва веледарихьна сагъ-саламатди кьяляхъ гъюри.
