19-пи, 20-пи, 21-пи майдиъ Мягьячгъала шагьриъ People Data Design компанияйи программирование-йиан тешкил дапIнайи, командйирин арайиъ вуйи талитар кIули гъягъиди. Му мялумат «Табасарандин нурар» газатдин журналистариз Мягьячгъалайиан вуйи командайин иштиракчи, ихь ватанагьли Аьлибег Гьяжибаевди тувну. Дугъу ДГУ-йин информатикайин ва мялуматарин технологйирин факультетдин 1-пи курснаъ урхура. Ихь ватанагьлийин гафариинди, талитариъ гъалиб гъабхьи командайиз 240 агъзур манат ва жара кьиматлу пешкешар тувди.

 

«Талитарин 1-пи йигъан People Data Design компанияйи ва мина жара йишвариан дуфнайи IT-цирклин пишекрари жюрбежюр программйир гьязур апIбан гьякьнаан лекцйир урхиди, гьадму гьисабнаан телефонариз приложенйир, компьютерариъ апIру тамширин дизайн гьязур апIбакан, Web 3.0 технологйирикан.

Кьюдпи йигъан, 20-пи майдиъ, 24 сяаьтнан арайиъ IT–талитар (хакатон) хьиди. Хъа аьхиримжи йигъан 19-пи ва 20-пи майдиъ командйири чпи гъязур гъапIу проектар жюрийин улихь уьрхиди; хъасин натижйир йивиди ва гъалибчйириз пешкешар тувди.

Эгер талитариъ иштирак хьуз ккунидар аш, http://pdd-event.ru сайтдиъ регистрация апIинай», – аьлава гъапIну Аьлибег Гьяжибаевди.