Майдин 16-пи йигъан Хив гъулан РКДЦ-йиъ райондиъ мялум дапIнайи «БицIидарин милли сес – 2023» конкурсдин финалин натижйир гъивну.
КIваин апIуз ккундучуз, думу серенжемар Хив райондин администрацияйин культурайин, спортдин, жигьиларин политикайин ва туризмдин отдели тешкил гъапIну.
Конкурсдиъ 6 йислан 11 йис’ина яш дубхьнайи, табасаран, лезги ва урус чIал апIру бицIидар иштирак гъахьнийи.
Мяълийир апIрудар жюрийи юкьуб командайиз пай гъапIну. Конкурс шубуб этапдиъди кIули гъубхнийи. Конкурсдин штиракчйир гъядягъруган, дурарин мяълийир апIбан бажаранвализ, сеснан успагьивализ ва марццивализ, мяъли апIбан къайдайиз фикир туври гъахьну.
Натижйириинди конкурсдиъ сабпи йишв Хив гъул’ан вуйи Мадина Ярметовайи, кьюбпи йишв Заан Яракк гъулан риш Хадижа Мирзоевайи, шубубпи йишв Хирижв гъулан вакил Эвелина Ярягьмедовайи гъазанмиш гъапIну. Хъа тамашичйирин терефнаан вуйи пешкеш Хив гъул’ан вуйи Фатима Гьюсейновайи гъадабгъну. Гъалибчйир пулин пешкешариинди, гьюрматнан грамотйиринди ва кубокариинди лишанлу гъапIнийи.