Дагъустандин динагьлийир ислам диндин асас фарзарикан саб –гьяждиз гъягъювал тамам апIуз гьязур шула.
Гьаму йисан Урусатдин Федерацияйиан 25 агъзур касдихьан гьяждиз гъягъюз хьибди, думу кьадарнакан 10 агъзур йишв дагъустанлуйириз тувна. Региондин агъзур агьалийихьан сенатор Сулейман Керимовди жара дапIнайи дакьатарин гьисабнаан пулсузди гьяждиз гъягъюз хьибди. Думу путевкйирикан 200 СВО-йин зонайиъ гъийиху эскрарин багахьлуйирин арайиъ пай дапIна. Сулейман Керимовдин гьисабнаан вуйи имбуну путевкйир Дагъустандин районарин мистариъ тупут ипбиинди пай гъапIну. Гьаму мялуматар республикайин СМИ-йин журналистариз улихьнаси «Дагъустан» РИА-йин конференцйир гъахру залиъ РД-йин милли политикайин ва диндин ляхнариз лигру министр Энрик Муслимовди ва РД-йин Муфтийдин заместитель Мюгьяммад Мангуевди тувнийи.
Энрик Муслимовдин гафариинди, Дагъустандиъ, агьалйир гьяждиз гъягъбан кампания тешкил апIури, хайлин ляхин дубхна.
«Гьамусяаьт, гьяж тешкил апIру вахтна читинвалар дархьбан бадали, сагъламвал уьбхбан министерствойи, Роспотребнадзори, милли политикайин ва диндин ляхнариз лигру министерствойи, Дагъустандин муфтиятди, гьацира таможняйин гъуллугъари ляхин гъабхура. Гьяждиз гъягъювал тешкил апIбан цирклиъ Урусатдиъ варитIан аьхю тажруба айи туроператорарикан саб вуйи «Марва-тур» дагъустанлуйир гьяждиз гъахувалин месэлйир гьял апIбиин либхура», – гъапнийи Энрик Муслимовди.
Пресс-конференцияйиъ Мюгьяммад Мангуевди виз-йир, документар гьязур апIбахьна айи тIалабарикан ва жара месэлйирикан мялуматар тувнийи.
«Таджикистандин авиакомпанйирихъди прямой рейсарин гьякьнаан йикьрар йитIнача. Вари 30 рейс хьиди. Гьацира Мягьячгъала – Дубай рейснан самолетариъди, дилинтина автобусдиъди гъягъру рейсарра тешкил дапIна. Дагъустандиан гирами ругариина гьяждиз гъягъюрайидарин сабпи десте 2-пи июндиъ удубчIвиди.
Мягьячгъалайиан прямой рейснаъди гьяждиз гъягъру касди путевкайихъ 5500 доллар, хъа Мягьячгъалайиан Дубайдиз, хъа дилинтина автобусдиъди гъягърударин путевкайиз 4700 доллар удубчIвну. Гъийин йигъаз Дагъустандиз жара дапIнайи квотйир агьалйирин арайиъ пай дапIну ккудукIна.
Гъубшу йисан, ковид тарабгънайивализ лигну, 65 йистIан артухъ яшар духьнайи агьалйириз гьяждиз гъягъюз къадагъа гъапIнийи. Роспотребнадзорин тIалабниинди, гьамус вакцинайин руб йивнайивалин гьякьнаан сертификат лазим ву», – гъапнийи муфтийдин заместители.
2014-пи йисхъан мина, Саудовский Аравияйиз виза гьязур апIбан бадали, биометрический паспорт лазим вуйи. Гьяж тешкил апIру урусатдин компанйирин тIалабниинди, цци думу къайда дигиш гъапIну: Урусатдин агьалйириз харижи гьюкуматдиз гъягъюз ихтияр тувру, кьувватнаъ айи йирси ясана цIийи чешнейин паспортар чIяаьн шула.
