Гъубшу гьяфтайиъ Хив райондин Чювекк гъулаъ РД-йиъ айи МВД-йин УСБ-йин полковник, Чювекк гъул’ан вуйи Мюгьюдин Урдихановдин гьюрматназ спортдин пучIу атлетикайиан кросс кIули гъубшну.
Серенжемдиъ Хив райондин глава Ярмет Ярметов, Мюгьюдин Урдихановдин багахьлуйир, дустар ва гъуландар иштирак гъахьну.
Жаргъбан талитариъ, дидин иштиракчйирихьна ва хяларихьна илтIикIури, Ярмет Ярметовди Мюгьюдин Урдихановдин уьмрикан ктибтну. Думу жвуван улихь дивнайи варитIан гъагъи месэлйирра гьял апIрур, варибдихьна гьязур вуйир, багъри халкь ва ватан ккуни гьякьикьи ватанпервер вуди гъахьивал кIваин апIури, гъийин аргъаж шулайи наслиз Мюгьюдин Урдиханов нумуна вуйиваликан гъапну.
Хив райондин культурайин, жигьиларин политикайин, спортдин ва туризмдин отделиъ спортдин цирклиан асас пишекар вуйи Имамудин Агъабаевди думу талитарин гьякьнаан учуз мялум гъапIганси, кроссдиъ жаргъуз 100-дихьна инсанар гъафну.
«Хив райондиъ Мюгьюдин Урдихановдин гьюрматназ вуйи талитар кIули гъахури саки 10 йис ву. Дурар тешкил апIбан жягьтлувал улупур РД-йин Халкьдин Собраниейин депутат Нариман Асваров вуйи. Гьар йисан талитар Нариман Асваровдин, Урдихановарин хизанарин ва Мюгьюдин Урдихановдин жара багахь дустарин кюмекниинди кIули гъахура. Цци, дуфнайи хяларилан гъайри, кросссдиъ 15-рихьна шубар ва 80-тIан артухъ баяр иштирак гъахьну. ВаритIан яшлу иштиракчийин 41 йис, хъа варитIан бицIирин – 9 йис вуйи. Сабсана къайд дарапIди гъитуз шулдар, жара талитарихь тевиган, жаргъбан гьаму талитариъ иштирак хьуз ва дурариз тамаши апIуз инсанар аьхю аьшкьниинди гъюра. Мидланра гъайри, хъади-хъади швнуд-сад йисан кроссдиъ иштирак шулайи ва пешкешнан йишвар гъадагъури гъахьи ГъуштIил гъул’ан вуйи Гюльпери Агъамягьямедовайиз спонсорари, ужуб пешкешналан гъайри, аьлава пешкеш вуди телефонра тувну», — гъапну Имамудин Агъабаевди.
Талитарин натижйириинди жиларин арайиъ сабпи йишв ГъванцIил гъулан агьали Самрат Гьюсейновди, кьюбпи йишв Хив гъул’ан вуйи Гюлмягьямед Гюлмягьямедовди ва шубубпи йишв Гъвандикк гъулан вакил Ливадин Шябановди гъазанмиш гъапIну.
Шубарин арайиъ сабпи йишваз Мажвгул гъул’ан вуйи Амира Амурлаева лайикьлу гъахьну. Кьюбпи йишван сагьиб ГъуштIил гъул’ан вуйи Гюльпери Агъамягьямедова гъахьну, хъа шубубпи йишв Хив гъулан риш Селимат Сардаровайи гъадабгъну.
«ВаритIан яшлу иштиракчи» номинацияйиъ Гуниб райондин Корода гъулан вакил ТIагьир Мягьямедгьяжиев, хъа «ВаритIан жигьил иштиракчи» номинацияйиъ Мажвгул гъулан бай Амин Амурлаев гъалиб гъахьну. «Гъалибвалихьна вуйи гьевес» номинацияйиъ гъалибвал Чювекк гъул’ан вуйи Ясмина Шихкеримовайи гъадабгъну.
Турнириъ пешкешнан йишвар гъазанмиш гъапIдар ва номинацйириъ гъалиб гъахьидар дипломариинди ва кьиматлу пешкешариинди лишанлу гъапIнийи.
