31-пи майиъ «Дагъустан» РИА-йин конференцйир гъахру залиъ РД-йин яшамиш шлу хуларин гьюкуматдин кIулин инспектор Сергей Касьяновди пресс-конференция кIули гъубхну. Душваъ кIулин инспектори мялум гъапIганси, 1-пи июндихъанмина республикайиъ инсанар яшамиш шулайи 1340 гизаф мертебйирин хулар идара апIру компанйир адарди гъузди.

 

 

«31-пи майизкьан республикайиъ 170 идара апIру тешкилатар (УК) гьисабнаъ айи. Гьадрарикан 1-пи июндихъанмина лицензия ади гъузрайидар анжагъ 98-тIан дар. Имбударин вари лицензйир батIил гъапIну. БатIул апIбан асас себеб – дурари чпин лицензйир давам апIуз лазим вуйи документар вахтниинди гьязур гъапIундар.

Пуз ккундузузки, 170 идара апIру тешкилатарикан лицензия давам апIуз документар тувну ккунидарин кьадар 117-тIан дайи. Гьяйифки, думу кьадарнакан анжагъ 65 тешкилатдитIан документар тувундар, ва гьадму 65 УК-йикан 56 тешкилатди яшамиш шлу гизаф мертебйирин хуларин республикайин гьюкуматдин инспекцияйин ахтармишар асантди тамам дапIну, чпин лицензйир давам гъапIну, хъа имбунудар вари 1-пи июндианмина республикайин адаъну. УК имдру хуларин ляхнар вахназ вуди муниципальный администрац-йирин давам апIиди.

Мисал вуди гъадабгъиш, Каспийск шагьриъ айи 52 УК-йикан имбудар анжагъ 25 ву. Шагьрин гьацI пай гизаф мертебйирин хулариъ идара апIру тешкилатар имдар, пуз шулу. Думу месэла гьял апIбан бадали, гьадму хулариъ яшамиш шулайи касари чпи жягьтлувал улупну, я лицензия айи жара тешкилатдик кучIвну, ясана чпин арайиъ ТСЖ тешкил дапIну ккунду», – аьлава гъапIну Сергей Касьяновди.