29-пи майиъ Хив гъулаъ М. Шамхаловдин ччвурнахъ хъайи мектебдин бинайиин тешкил дапIнайи ЕГЭ-йин 381-пи пунктдиъ (ППЭ) Хив райондин 124 выпускникди урус чIалнаан ЕГЭ тувну.
Имтигьян ккебгъайиз улихьна ППЭ-йиз Хив райондин глава Ярмет Ярметов гъафну.
Дугъу выпускникариз урус чIалнаан ва имбу вари предметариан саб вуйи гьюкуматдин имтигьнар тувбаъ хъуркьувалар ккун гъапIну. Хъасин 381-пи нумрайин ППЭ-йин кIулиъ айирихъди ва ГЭК-дин вари ихтиярар айи вакиларихъди пункт ЕГЭ гъабхувалихьна гьязурди аш ахтармиш гъапIну.
381-пи нумрайин ППЭ-йин кIулиъ айи Зейдуллагь Маллагъурбановдин гафариинди, пунктдин вари 8 аудитория имтигьнар гъахуз гьязурди а.
Урус чIалнаан вуйи ЕГЭ чарасуз вуди тувну ккуни кьюб имтигьникан саб ву. Гьаддиз саки вари выпускникар му экзаментдиан 36 баллтIан артухъ гъадагъуз чалишмиш шулайи, фицики саб вуздизра му кьадартIан исди вуйи баллар кьабул апIуз ихтияр адар.
Урус чIалнаан ЕГЭ 10 дакьикьа ккимиди юкьуб сяаьтна кIулиъ гъубшнийи. Имтигьнин кьюб пайнаъ 27 табшуругъ тувнайи. Выпускникариз натижйир июндин 16-пи йигъхъан мялум хьиди.
